Gold: రికార్డు గరిష్టాల నుంచి దిగివస్తున్న బంగారం ధరలు! నేడు తులం బంగారం రేటు ఎంతంటే?

గడిచిన కొన్ని రోజులుగా ఆకాశమే హద్దుగా దూసుకుపోయిన బంగారం ధరలు ఇప్పుడు ఒక్కసారిగా నేలచూపులు చూస్తున్నాయి. అంతర్జాతీయ మార్కెట్లో ఏర్పడిన పరిణామాల వల్ల అటు అంతర్జాతీయ COMEX మార్కెట్‌లోనూ, ఇటు దేశీయ MCX మార్కెట్‌లోనూ పసిడి ధరలు భారీగా పడిపోయాయి. ముఖ్యంగా వెండి ధరల్లో వచ్చిన మార్పు చూసి పెట్టుబడిదారులు విస్మయానికి గురవుతున్నారు. వెండి రేటు ఏకంగా 10 శాతానికి పైగా కుప్పకూలడం విశేషం.

ఎందుకు పడిపోతున్నాయి?

బంగారం, వెండి ధరలు ఇలా వరుసగా పడిపోవడానికి ప్రధానంగా అంతర్జాతీయ రాజకీయ, ఆర్థిక కారణాలు ఉన్నాయి. మార్కెట్ నిపుణుల అభిప్రాయం ప్రకారం, అమెరికా, ఇరాన్ మధ్య నెలకొన్న ఉద్రిక్తతలు కొంత తగ్గడం దీనికి ప్రధాన కారణం. ఈ రెండు దేశాలు అణు ఒప్పందంపై చర్చలు జరిపేందుకు సిద్ధమవ్వడం, ఒమన్‌లో సమావేశం కావడం మార్కెట్‌ లో సెంటిమెంట్‌ ను మార్చేసింది. ఉద్రిక్తతలు తగ్గుముఖం పట్టడంతో ఇన్వెస్టర్లు సురక్షితమైన పెట్టుబడిగా భావించే బంగారం నుంచి తమ పెట్టుబడులను ఉపసంహరించుకుంటున్నారు.

డాలర్ బలం.. పసిడికి సెగ!

మరోవైపు.. అంతర్జాతీయ కరెన్సీ మార్కెట్‌ లో అమెరికా డాలర్ విలువ పెరగడం కూడా బంగారం ధరలపై ప్రతికూల ప్రభావాన్ని చూపింది. సాధారణంగా డాలర్ బలపడినప్పుడు ఇతర దేశాల కరెన్సీలలో బంగారం కొనడం భారమవుతుంది, దీనివల్ల డిమాండ్ తగ్గి ధరలు పడిపోతాయి. COMEX మార్కెట్‌లో బంగారం ధర 4,800 డాలర్ల మార్కు కంటే దిగువకు పడిపోగా వెండి 70 డాలర్ల మద్దతు ధరను కోల్పోయి 63 డాలర్ల వద్ద ట్రేడ్ అవుతోంది.

దేశీయ మార్కెట్ (MCX) పరిస్థితి

భారతదేశంలో కూడా దీని ప్రభావం స్పష్టంగా కనిపిస్తోంది. గత వారం రికార్డు స్థాయిలో 1,80,779 రూపాయల వద్ద ఉన్న 10 గ్రాముల బంగారం ధర ఇప్పుడు భారీగా తగ్గి 1,52,260 రూపాయల వద్ద ముగిసింది. అంటే కేవలం నాలుగు సెషన్లలోనే దాదాపు 28,500 రూపాయల భారీ పతనం చోటుచేసుకుంది. వెండి కూడా కిలోకు 4.2 లక్షల రూపాయల గరిష్ట స్థాయి నుంచి దాదాపు 1.73 లక్షల రూపాయల వరకు తగ్గింది.

కొనేవారికి ఇదే సరైన సమయమా?

మార్కెట్ నిపుణుడు అనుజ్ గుప్తా అభిప్రాయం ప్రకారం.. అమెరికా-ఇరాన్ చర్చల ఫలితాలను బట్టి రాబోయే రోజుల్లో మార్కెట్ మరింత అస్థిరంగా ఉండవచ్చు. సురక్షితమైన పెట్టుబడిగా భావించే బంగారంపై డిమాండ్ తగ్గడం, డాలర్ పుంజుకోవడం వల్ల ప్రస్తుతానికి ధరలు తగ్గుముఖం పట్టాయి. తక్కువ ధరకు బంగారం కొనాలనుకునే వారికి ఇది ఒక మంచి అవకాశంగా కనిపిస్తోంది.

ఏదేమైనా అంతర్జాతీయంగా నెలకొన్న భౌగోళిక రాజకీయ పరిస్థితులు, అమెరికా డాలర్ బలోపేతం కావడం వల్ల ప్రస్తుతానికి పసిడి ధరలు తగ్గుముఖం పట్టాయి. అయితే మార్కెట్ నిపుణుల అభిప్రాయం ప్రకారం.. బంగారం ధరల్లో ఇలాంటి తగ్గుదల దీర్ఘకాలిక ఇన్వెస్టర్లకు ఒక మంచి కొనుగోలు అవకాశంగా మారుతుంది. రాబోయే రోజుల్లో అమెరికా-ఇరాన్ చర్చల పర్యవసానాలు మరియు అంతర్జాతీయ మార్కెట్ ధోరణులను బట్టి ధరల్లో మరింత మార్పులు ఉండవచ్చు. కాబట్టి పెట్టుబడిదారులు మార్కెట్ హెచ్చుతగ్గులను ఎప్పటికప్పుడు గమనిస్తూ.. ధరలు కనిష్ట స్థాయికి చేరినప్పుడు సరైన నిర్ణయం తీసుకోవడం ఉత్తమం.