Gold Price: రూ.40,000 దిగువకు బంగారం, 5 రోజుల్లో రూ.5,000 తగ్గుదల

అంతర్జాతీయవ్యాప్తంగా కరోనావైరస్ కేసులు పెరుగుతుండటంతో బంగారంపై ఆ ప్రభావం పడుతోంది. గత ఐదారు రోజులుగా తగ్గిన బంగారం ధరలు మంగళవారం ప్రారంభంలో పెరిగి, మళ్లీ తగ్గుముఖం పట్టాయి. బంగారంపై పెట్టుబడి పెట్టే అంశంలో ఇన్వెస్టర్లు కూడా కాస్త గందరగోళంలో ఉన్నారు. ఎప్పుడు తగ్గుతాయో.. ఎప్పుడు పెరుగుతాయో.. భవిష్యత్తు ఎలా ఉంటుందో అనే గందరగోళంలో ఉన్నారు.

5 సెషన్‌లలో రూ.5,000 తగ్గింది

గోల్డ్ ఫ్యూచర్స్ మంగళవారం ఉదయం 0.27 శాతం పెరిగి రూ.39,624కు చేరుకుంది. కిలో వెండి ధర 0.22 శాతం పెరిగి రూ.36,287గా ఉంది. ఎంసీఎక్స్‌లో ఈ రోజు ఏప్రిల్ గోల్డ్ ఫ్యూచర్స్ 10 గ్రాములకు రూ.480 (1.2 శాతం) తగ్గి రూ.39,037కు చేరుకుంది. బంగారం ధర గత ఐదు సెషన్‌లలోనే ఏకంగా రూ.5,000కు పైగా తగ్గింది.

44,500 నుండి రూ.40,000 దిగువకు

ఐదు సెషన్లకు ముందు బంగారం ధర రూ.44,500గా ఉంది. ఇప్పుడు రూ.40,000కు దిగువకు వచ్చింది. వెండి ధర ఎంసీఎక్స్‌లో ఈ రోజు 1.7 శాతం తగ్గి రూ.35,593కు చేరుకుంది. గత ఐదు సెషన్లలో వెండి ధర రూ.4,200 తగ్గింది. అంటే 10 శాతం తగ్గుదల నమోదు చేసింది.

1700 డాలర్ల నుండి 1511 డాలర్లకు

అంతర్జాతీయ మార్కెట్లోను బంగారం ధరలు తగ్గిపోయాయి. కొద్ది రోజుల క్రితం ఔన్స్ బంగారం 1700 డాలర్ల కంటే పైకి చేరుకుంది. ఇప్పుడు స్పాట్ గోల్డ్ ఔన్స్ 0.2 శాతం తగ్గి 1511 డాలర్లకు చేరుకుంది. అంతకుముందు సెషన్‌లో 5 శాతం పడిపోయింది.

మద్దతు ధర

ఔన్స్ బంగారం 1535 డాలర్లకు తక్కువగా ఉన్నంత వరకు బలహీనంగానే ఉండవచ్చునని, తక్షణ మద్దతు ధర 1470 వద్ద కనిపిస్తోందని బులియన్ మార్కెట్ నిపుణులు చెబుతున్నారు. 1545 డాలర్లకు పైకి చేరుకుంటే మాత్రం బంగారం ధర పెరిగే అవకాశాలు ఎక్కువగా ఉన్నాయని అంటున్నారు.

మరికొంతకాలం అస్థిరంగా..

బంగారం ధరలు మరికొంతకాలం అస్థిరంగా ఉండే అవకాశాలే ఎక్కువగా ఉన్నాయని బులియన్ మార్కెట్ నిపుణులు అంటున్నారు. ప్రపంచవ్యాప్తంగా కరోనా కల్లోలం కారణంగా ఇన్వెస్టర్లు ఈక్విటీ మార్కెట్ల నుండి పసిడి పెట్టుబడుల వైపు మళ్లుతున్నారు. ఇటీవల వరకు భారీగా ధరలు ఉండటంతో పసిడి పెట్టుబడులు తగ్గినప్పటికీ, ఇప్పుడు ధరలు తగ్గడంతో మళ్లీ పెట్టుబడులకు మొగ్గు చూపుతున్నారు.