Gold prices: వెండితో పోలిస్తే బంగారం సేఫేనా? ఈ రిపోర్ట్ చూస్తే మీ పెట్టుబడి ప్లాన్ మార్చుకుంటారు!

ప్రస్తుతం ప్రపంచవ్యాప్తంగా నెలకొన్న భౌగోళిక రాజకీయ పరిస్థితులు , అనిశ్చితి వల్ల బంగారం ధరలు (Gold prices) ఒక్కసారిగా పుంజుకున్నాయి. 2024 ప్రారంభం నుండి బంగారం అద్భుతమైన రిటర్న్స్‌ను ఇస్తోంది. అయితే అనుభవజ్ఞులైన ఇన్వెస్టర్లు మాత్రం ఒక విషయాన్ని గట్టిగా గుర్తు చేస్తున్నారు. బంగారం ధరలు పెరిగినంత వేగంగానే ఒక్కోసారి నిరాశపరుస్తాయని వారు హెచ్చరిస్తున్నారు. ముఖ్యంగా 2026 ప్రారంభంలో బంగారం ధరలు ఔన్స్‌కు 5,500 డాలర్ల మార్కును దాటాయి. ధరలు ఆ తర్వాత స్వల్పంగా తగ్గుతూ వస్తున్నాయి. ఈ రోజు (మార్చి 22) నాటికి పది గ్రాముల 24 క్యారెట్ల బంగారం ధర సుమారు రూ.1,45,970 వద్ద కొనసాగుతోంది. అదే విధంగా 22 క్యారెట్ల బంగారం ధర కూడా తగ్గి రూ.1,33,800 వద్ద ట్రేడవుతోంది.

బంగారం ఎప్పుడు పెరుగుతుంది?

సాధారణంగా ప్రపంచంలో యుద్ధాలు లేదా ఆర్థిక సంక్షోభాలు వచ్చినప్పుడు బంగారం ధరలు పెరుగుతాయి. ఉదాహరణకు.. 2022లో రష్యా-ఉక్రెయిన్ యుద్ధం మొదలైనప్పుడు పసిడి ధర 2,000 డాలర్లను దాటింది. అలాగే 2020 కోవిడ్ సమయంలో స్టాక్ మార్కెట్లు 30 శాతం పడిపోయినా, బంగారం మాత్రం స్థిరంగా ఉండి ఆ తర్వాత 36 శాతం లాభాలను ఇచ్చింది. అంటే మార్కెట్లో భయం ఉన్నప్పుడు బంగారం పెరుగుతుంది. ఆర్థిక వ్యవస్థ బాగున్నప్పుడు తగ్గుతుంది. గడచిన 2025లో వచ్చిన ర్యాలీ వల్ల బంగారం ఏకంగా 65 శాతం లాభాలను అందించడం విశేషం.

స్టాక్స్ వర్సెస్ గోల్డ్: ఏది బెస్ట్?

చాలామంది బంగారం అనేది ద్రవ్యోల్బణాన్ని తట్టుకునే ఆస్తి అని భావిస్తారు. కానీ గత 40 ఏళ్ల డేటాను పరిశీలిస్తే, బంగారం కంటే స్టాక్ మార్కెట్లే ఎక్కువ లాభాలను ఇచ్చాయని నిపుణులు చెబుతున్నారు. 1985 నుండి 2025 మధ్య కాలంలో S&P 500 స్టాక్స్ ఏటా 11.9 శాతం రిటర్న్స్ ఇస్తే, బంగారం కేవలం 6.7 శాతం మాత్రమే ఇచ్చింది. ద్రవ్యోల్బణం తర్వాత చూస్తే స్టాక్స్ 8.9 శాతం లాభాలను ఇస్తే, బంగారం కేవలం 3.8 శాతం దగ్గరే ఆగిపోయింది. దీర్ఘకాలిక పెట్టుబడిదారులకు స్టాక్స్ , బాండ్లే మేలని గణాంకాలు చెపుతున్నాయి. 1989 నుండి 1999 మధ్య ఆర్థిక వృద్ధి బలంగా ఉన్నప్పుడు బంగారం ధర ఏకంగా 27 శాతం పడిపోయిన విషయాన్ని మనం మర్చిపోకూడదు.

వెండితో పోలిస్తే బంగారం సురక్షితమేనా?

వెండి ధరలు బంగారంతో పోలిస్తే చాలా వేగంగా మారుతుంటాయి. 2025లో వెండి ధరలు 150 శాతం పెరిగినప్పటికీ, 2026 ఫిబ్రవరిలో కేవలం ఒక్క వారంలోనే సగం విలువను కోల్పోయాయి. అందుకే స్థిరత్వం కోరుకునే వారికి వెండి కంటే బంగారమే సురక్షితమని నిపుణుల అభిప్రాయం.

ఏదేమైనా బంగారం ధరలు (Gold prices) ఆకాశాన్ని తాకుతున్నప్పటికీ, కళ్ళు మూసుకుని భారీగా పెట్టుబడి పెట్టడం ప్రమాదకరం. బంగారం అనేది మీ పోర్ట్‌ఫోలియోలో కేవలం రక్షణ కవచం లాంటిది మాత్రమే. ఇది ఆపద కాలంలో ఆదుకుంటుంది కానీ, దీర్ఘకాలంలో భారీ సంపదను సృష్టించడంలో స్టాక్ మార్కెట్లతో పోటీ పడలేదు. 1971-80 మధ్య కాలంలో బంగారం 40 శాతం వార్షిక వృద్ధిని చూపించినా ఆ తర్వాత 1980 నుండి సగటున కేవలం 6 శాతం లాభాలను మాత్రమే ఇచ్చింది. కాబట్టి, ప్రస్తుత మార్కెట్ ఒడిదుడుకులను గమనిస్తూ, కేవలం లాభాల కోసమే కాకుండా భవిష్యత్తు రక్షణ కోసం కొంత మేర బంగారాన్ని కలిగి ఉండటం మంచిది.