10 గ్రాములు రూ. లక్షా 11 వేలు దాటిన బంగారం ధర.. పండుగ సీజన్‌లో కొనుగోలుపై ఏం ఆలోచిస్తున్నారు..

భారతదేశంలో బంగారం ధరలు 10 గ్రాములకు రూ. 1.11 లక్షలు దాటేశాయి. ఇది ఇప్పటివరకు ఎప్పుడూ చూడని రికార్డు స్థాయిలోకి వచ్చింది. సాధారణంగా దసరా-దీపావళి సీజన్‌లో బంగారం కొనుగోలు జోరు పెరుగుతుంది. కానీ ఈసారి ధరల దూకుడుతో జ్యువెలర్స్ కొంచెం జాగ్రత్తగా ఉన్నారు, వినియోగదారులు ఆలోచిస్తూ అడుగులు వేస్తున్నారు.

ఇండియా బులియన్ & జ్యువెలర్స్ అసోసియేషన్ (IBJA) ప్రకారం ప్రస్తుతం ఫిజికల్ మార్కెట్లో 10 గ్రాముల బంగారం ధర రూ. 1,11,710గా ఉంది. దీనిపై 3% GST కలిపితే వినియోగదారులకు ఇది రూ. 1,15,061 అవుతోంది. గత ఏడాది ఇదే సమయంలో 10 గ్రాములకు సుమారు రూ. 80,000 మాత్రమే ఉండేది. అంటే ఏడాదిలోనే 42% పెరుగుదల అయ్యింది.

సౌరభ్ గాడ్గిల్, PNG జ్యువెలర్స్ మేనేజింగ్ డైరెక్టర్, ఇలా చెబుతున్నారు ఈసారి పండుగ సీజన్‌లో పాత బంగారం మార్చి కొత్త డిజైనర్ పీసెస్ తీసుకోవాలనే ట్రెండ్ బాగా పెరుగుతుంది. గత సంవత్సరం 20-25% వరకు మాత్రమే పాత బంగారం మార్పిడి జరిగింది. ఈసారి అది 45% వరకు వెళ్లొచ్చు. ఇది చూస్తే, చాలా మంది క్యాష్ పెట్టి కొత్త బంగారం కొనే బదులు, ఇంట్లో ఉన్న పాత బంగారం అమ్మి లేదా మార్చి కొత్తవి కొనడమే ప్లాన్ చేస్తున్నట్లు అర్థమవుతోంది.

ధరలు గట్టిగా పెరగడంతో ఈసారి పండుగ సీజన్‌లో బంగారం కొనుగోళ్లలో కొంచెం మార్పు కనిపించొచ్చు. నిపుణులు చెబుతున్నట్టు, ఈసారి ప్రజలు కొనే బంగారం పరిమాణం దాదాపు 15% వరకు తగ్గొచ్చని చెబుతున్నారు. కానీ ధరలు చాలా పెరిగిపోవడంతో, తక్కువగా కొన్నా కూడా మొత్తం ఖర్చు మాత్రం 25-30% వరకు ఎక్కువవుతుందట. అంటే సింపుల్‌గా చెప్పాలంటే కొద్దిగా కొన్నా కూడా బిల్లులు పెద్దగానే వస్తాయి.

సురేంద్ర మెహతా, IBJA జాతీయ కార్యదర్శి చెబుతున్నదేమిటంటే బంగారం ధరలు ఇప్పుడు తిరిగి రూ. 1 లక్షకు తగ్గే అవకాశం లేదని ప్రజలు అర్థం చేసుకున్నారు. అందుకే వారు మళ్లీ జ్యువెలరీ దుకాణాలకు వస్తున్నారు. గత వారం రోజులుగా ముంబయిలోని జావేరి బజార్లో ట్రేడింగ్ యాక్టివిటీ బాగా పెరిగింది. ఇది చూస్తే, ప్రజలు ఇంకా పెరగకముందే కొనేసేద్దాం అనే ఆలోచనతో ముందుకు వస్తున్నారని చెప్పొచ్చు.

ప్రస్తుతం అంతర్జాతీయ మార్కెట్లో కూడా బంగారం ధరలు దూసుకుపోతున్నాయి. గ్లోబల్ మార్కెట్లో బంగారం ధర ఔన్సుకు $3,670 దాటింది. ఇది ఇప్పటి వరకు ఎప్పుడూ లేని రికార్డు. మార్కెట్ నిపుణుల అభిప్రాయం ప్రకారం, త్వరలోనే ఇది $4,000 ఔన్సు దాకా చేరే అవకాశం ఉంది. ఈ పెరుగుదలతో, సేఫ్ ఆస్తిగా భావించే బంగారంలో ఇన్వెస్ట్‌మెంట్ డిమాండ్ కూడా మళ్లీ పెరుగుతోంది. ధరలు ఇంకా పెరుగుతాయని భావించి, చాలా మంది ఇన్వెస్టర్లు తిరిగి బంగారం కొనుగోళ్లలోకి దూకుతున్నారు.

ఈసారి పండుగ సీజన్‌లో బంగారం కొనుగోళ్లలో కొంచెం కొత్త ట్రెండ్లు కనిపించబోతున్నాయి. కొత్త బంగారం కొనడం కంటే, చాలా మంది తమ పాత బంగారాన్ని ఇచ్చి మార్పిడి చేసుకోవడానికే ఎక్కువ ఆసక్తి చూపిస్తున్నారు. అంతేకాదు, పెద్ద మొత్తంలో కాకుండా తక్కువ పరిమాణంలోనే కొనుగోళ్లు చేస్తున్నా, ధరలు ఎక్కువగా ఉండటంతో బిల్లులు మాత్రం పెద్దవే అవుతున్నాయి. ఈసారి వినియోగదారులు కూడా కొనాలా వద్దా అని బాగా ఆలోచించి అడుగులు వేస్తున్నారు. మరోవైపు, పెట్టుబడిగా కూడా బంగారంపై డిమాండ్ మళ్లీ పెరుగుతోంది. ఇంత భారీ ధరల మధ్య, జ్యువెల్లర్లు కూడా కొత్త స్టాక్ తీసుకునే విషయంలో కొంచెం జాగ్రత్తగా వ్యవహరిస్తున్నారు.

బంగారం ధరలు ఇంత దూకుడుగా ఉండటంతో, ఈసారి పండుగ సీజన్‌లో "ఎంత గ్రాములు కొన్నావు?" కంటే ఎంత పెట్టుబడి పెట్టావు? అనేదే ఎక్కువగా వినిపించే మాట అవుతుంది.