రూ.45,000 దాటిన బంగారం ధర, రికార్డ్ ధర.. రికార్డ్ డిస్కౌంట్.. అమ్మకానికి సరికొత్త ప్లాన్!

బంగారం ధరలు భారీగా పెరుగుతూ.. స్వల్పంగా తగ్గుతున్నాయి. శుక్రవారం ఎంసీఎక్స్‌లో 10 గ్రాములకు 0.4 శాతం తగ్గి రూ.44,238 వద్ద క్లోజ్ అయింది. అంతకుముందు రూ.44,961 రికార్డ్ హైకి చేరుకుంది. వెండి ధర కిలో 0.43 శాతం తగ్గి రూ.47,170 వద్ద క్లోజ్ అయింది. అంతకుముందు ఇది రూ.50,123 రికార్డ్ హైకి చేరుకుంది.

ఢిల్లీ మార్కెట్లో...

భారతీయ మార్కెట్లలో పలుచోట్ల బంగారం ధర 10 గ్రాములకు రూ.45,000 దాటి రికార్డ్ హైకి చేరుకుంది. కరోనా వైరస్ ప్రభావంతో ఇన్వెస్టర్లు సురక్షిత బంగారం వైపు చూస్తున్నారు. దీంతో ధర భారీగా పెరుగుతోంది. ఢిల్లీ బులియన్ మార్కెట్లో నిన్న 99.9 శాతం స్వచ్ఛత కలిగిన 10 గ్రాముల బంగారం రూ.770 పెరిగి రూ.45,340కి చేరుకుంది. గురువారం ధర రూ.44,570 వద్ద ఉంది.

రూపాయి పతనం..

ఓ వైపు ఈక్విటీల నేలచూపు, మరోవైపు రూపాయి పతనంతో ఇన్వెస్టర్లు పసిడి వైపు చూస్తున్నారని, దీంతో ధరలు భారీగా పుంజుకున్నాయని చెబుతున్నారు. బంగారంతో పాటు వెండి మరింత పెరిగింది. పారిశ్రామిక వర్గాలు, నాణేల తయారీదారుల నుంచి లభించిన కొనుగోళ్ల మద్దతుతో కిలో వెండి రూ.190 పెరిగి రూ.48,180కు చేరుకుంది. న్యూయార్క్‌ బులియన్‌ మార్కెట్లో ఔన్స్ గోల్డ్ ధర 1,678 డాలర్లు పలుకగా, వెండి 17.34 డాలర్లుగా ఉంది. అయితే ఆదివారం మాత్రం ధరలు తగ్గాయి.

బంగారం కొనుగోలు తగ్గడంతో... కొత్త ప్లాన్

ఇండియాలో బంగారం ధరలు భారీగా పెరుగుతుండటంతో కొనుగోళ్లు కూడా తగ్గుతున్నాయి. దీంతో అమ్మకాలు పెంచుకునేందుకు బులియన్ డాలర్లు భారీ డిస్కౌంట్స్ ఇచ్చేందుకు కూడా మొగ్గు చూపుతున్నారు. చైనా, హాంగ్‌కాంగ్‌లలోను బంగారం కొనుగోలుపై ఆసక్తి తగ్గింది.

5 నెలల గరిష్టానికి డిస్కౌంట్

దేశంలోని డీలర్లు దాదాపు ఔన్స్‌కు దాదాపు 25 డాలర్ల మేర తగ్గింపు ఇస్తున్నారట. గత సెప్టెంబర్ నుండి 14 డాలర్ల డిస్కౌంట్ ఉంది. బంగారం ధరపై డిస్కౌంట్ 5 నెలల గరిష్టానికి చేరుకుంది.

ఫిబ్రవరిలో భారీగా పడిపోయిన బంగారం దిగుమతులు

ఇటీవల డాలరు మారకంతో రూపాయి 16 నెలల కనిష్టానికి పడిపోయింది. కరోనా వైరస్ ప్రభావం వల్ల ధరలు పెరుగుతున్నాయి. దీంతో ఫిబ్రవరిలో బంగారం దిగుమతులు గత ఏడాది ఇదే నెలతో పోలిస్తే 41 శాతం పడిపోయాయి.