నాలుగు రోజుల్లో రూ.4,000 పెరిగిన బంగారం ధర, నేడు స్వల్ప ఊరట

గత వారం బంగారం ధరలు ఎంత భారీగా.. హఠాత్తుగా తగ్గుతూ వచ్చాయో ఈ వారం అలాగే పెరిగాయి. నాలుగు రోజుల్లోనే 10 గ్రాములకు బంగారం ధర రూ.4,000 వరకు పెరిగింది. అయితే ఈ రోజు (శుక్రవారం, మార్చి 27) ధరలు స్వల్పంగా తగ్గాయి. బంగారం కొనుగోలుదారులకు కొంతలో కొంత ఊరట కల్పించింది. నేడు మల్టీ కమోడిటీ ఎక్స్చేంజ్ (MCX)లో ఏప్రిల్ బంగారం ఫ్యూచర్స్ ధర 0.8 శాతం తగ్గి రూ.43,195గా ఉంది.

రూ.4,000 వరకు పెరిగి..

ఇంతకుముందు ఒక్క సెషన్‌లోనే బంగారం ధర 10 గ్రాములకు 3 శాతం లేదా 1,300 పెరిగింది. జూన్ గోల్డ్ ఫ్యూచర్స్ నేడు 0.5 శాతం తగ్గి 43,420గా ఉంది. వెండి ధరలు కూడా స్వల్పంగా తగ్గాయి. కిలో వెండి 0.08 శాతం తగ్గి రూ.41,290గా ఉంది. ఏప్రిల్ గోల్డ్ ఫ్యూచర్స్ గత నాలుగు రోజులుగా భారీగా పెరుగుతోంది. సోమవారం నుండి గురువారం వరకు 10 గ్రాములకు రూ.3,700 పెరిగింది.

రూ.350 తగ్గుదల

ఈ నెలలో రికార్డ్ గరిష్టం రూ.45,000కు చేరుకున్న బంగారం ధర ఆ తర్వాత కాస్త దిగి వచ్చింది. గత వారం రూ.40,000 దిగువకు చేరుకుంది. కానీ మళ్లీ పెరుగుదల ప్రారంభమైంది. దీంతో రూ.43 వేలను దాటేసింది. ఈ రోజు మాత్రం ఉదయం రూ.351 తగ్గి రూ.43,191 వద్ద ఉంది.

అంతర్జాతీయ మార్కెట్లో..

అంతర్జాతీయ మార్కెట్లో బంగారం ధర 0.5 శాతం తగ్గి ఔన్స్‌కు 1,621.07 డాలర్ల వద్ద ఉంది. మొత్తంగా ఈ వారంలో బంగారం ధర 8 శాతం మేర పెరిగింది. అంతర్జాతీయ మార్కెట్లో గత పదేళ్లలో ఓ వారంలో బంగారం ధర భారీగా పెరిగే రికార్డు దిశగా వెళ్తోంది. కానీ ఈ రోజు తగ్గడం ఊరట కలిగించే అంశం.

ఖరీదైన లోహాలు...

మిగతా అతి ఖరీదైన లోహాల విషయానికి వస్తే ప్లాటినమ్ ఔన్స్ 0.5 శాతం పడిపోయి 732 డాలర్ల వద్ద, వెండి 0.2 శాతం పడిపోయి 14.35 డాలర్ల వద్ద ఉంది. ప్రపంచంలోనే అతిపెద్ద గోల్డ్ బ్యాక్డ్ ఎక్స్చేంజ్ ట్రేడెడ్ ఫండ్ (ETF) గురువారం 046 శాతం పెరిగి 953.54 టన్నులకు చేరుకుంది.