బంగారం ధరలపై వరల్డ్ గోల్డ్ కౌన్సిల్ సంచలన నివేదిక.. కొనుగోలుపై నిపుణులు ఏం చెబుతున్నారంటే..

Gold Prices Correct Sharply: భారతీయ వినియోగదారులలో రాబోయే మూడు నెలల్లో బంగారం ధరలు నిరంతరం పెరుగుతూనే ఉంటాయనే నమ్మకం క్రమంగా తగ్గుతున్నట్లు వరల్డ్ గోల్డ్ కౌన్సిల్ (WGC) తమ Q3 2026 నివేదికలో స్పష్టం చేసింది. కాంటార్ భాగస్వామ్యంతో 12 మెట్రో, టైర్-I నగరాలలోని 1,957 మంది వినియోగదారులపై నిర్వహించిన ఈ సర్వేలో.. ధరలు మరింత పెరుగుతాయని అంచనా వేస్తున్న వారి వాటా తొలి విడతలో ఉన్న 69 శాతం నుండి రెండవ విడతలో 61 శాతానికి పడిపోయింది. ఈ అంచనాల మార్పు పెట్టుబడిదారులలో కొంత పునరాలోచనను రేకెత్తించినప్పటికీ.. సర్వేలో పాల్గొన్న స్పష్టమైన మెజారిటీ ప్రజలు ఇప్పటికీ ధరలు మరింత పెరుగుతాయనే ఆశాభావంతోనే ఉన్నారు.

ధరల రికార్డు స్థాయిల వల్ల కొనుగోళ్ల సమయంపై అనిశ్చితి నెలకొన్నప్పటికీ.. బంగారంపై భారతీయ పెట్టుబడి డిమాండ్ ఏమాత్రం తగ్గలేదు. బార్లు, నాణేలు, గోల్డ్ ఈటీఎఫ్‌లతో (ETFs) సహా భారతీయ పెట్టుబడి డిమాండ్ మూడవ త్రైమాసికంలో 12 శాతం పుంజుకుని సుమారు 60 టన్నులకు చేరుకుంది. ఇందులో గోల్డ్ ఈటీఎఫ్ డిమాండ్ గత త్రైమాసికంలో నమోదైన 3.6 టన్నుల నుండి 5.3 టన్నులకు పెరగడం విశేషం. బార్లు, నాణేల కొనుగోళ్లు వరుసగా 9 శాతం పెరిగి 55 టన్నులకు చేరినప్పటికీ.. గత ఏడాదితో పోలిస్తే ఇవి 40 శాతం తక్కువగా ఉన్నాయి. ఇన్వెస్టర్లు బంగారాన్ని పూర్తిగా పక్కన పెట్టకుండా.. సరైన ధరల శ్రేణిలో మరింత ఆలోచనాత్మకంగా కొనుగోళ్లు జరుపుతున్నారనడానికి ఈ గణాంకాలు నిదర్శనంగా నిలుస్తున్నాయి.

ప్రస్తుతం చోటుచేసుకుంటున్న ధరల దిద్దుబాటును బంగారం నుంచి వైదొలగడానికి కారణముగా భావించకూడదని ఆగ్మాంట్ చీఫ్ రీసెర్చ్ ఆఫీసర్ డాక్టర్ రెనిషా చైనాణి విశ్లేషించారు. అంతర్జాతీయంగా డాలర్ బలపడటం, వడ్డీ రేట్ల కోత అంచనాలు తగ్గడం లేదా ఇన్వెస్టర్లు లాభాలను స్వీకరించడం వల్ల ఇటువంటి తాత్కాలిక క్షీణతలు వస్తుంటాయని.. ఇవి ద్రవ్యోల్బణాన్ని ఎదుర్కొనే బంగారు పోర్ట్‌ఫోలియో లక్ష్యాలను ఏమాత్రం మార్చవని ఆమె పేర్కొన్నారు. ఒకేసారి పెద్ద మొత్తంలో పెట్టుబడి పెట్టడానికి బదులుగా.. గోల్డ్ ఈటీఎఫ్‌లు లేదా డిజిటల్ గోల్డ్‌లో సిప్‌ల (SIPs) ద్వారా కొనుగోళ్లను అనేక వారాల పాటు విస్తరించి, పోర్ట్‌ఫోలియోలో బంగారం వాటాను 15 నుండి 20 శాతానికి సరిచేసుకోవడం ఉత్తమమైన మార్గమని సూచించారు.

Also Read

షాక్ కొడుతున్న బంగారం ధరలు .. పసిడి రేటు ఈ రోజు ఎంత భారీగా పెరిగిందంటే.. నవంబర్ 5, గురువారం ధరలు ఇవే..

ఇండియా బులియన్ అండ్ జ్యువెలర్స్ అసోసియేషన్ ప్రెసిడెంట్ పృథ్వీరాజ్ కోఠారి మాట్లాడుతూ.. అంతర్జాతీయంగా స్పాట్ గోల్డ్ ఔన్సుకు $4,000 వద్ద ట్రేడ్ అవుతూ తన గరిష్ట స్థాయి $5,600 కంటే 28 శాతం తక్కువగా ఉన్నప్పటికీ, గత దశాబ్ద కాలంలో 200 శాతం లాభాలను ఇచ్చిందని గుర్తుచేశారు. రూపాయి పరంగా చూస్తే.. ఎంసిఎక్స్ (MCX) బంగారం 10 గ్రాములకు రూ. 1,40,000 వద్ద ఉండి పదేళ్లలో ఏకంగా 360 శాతం (సంవత్సరానికి 16.5% చొప్పున) పెరిగింది. ప్రపంఛవ్యాప్తంగా సెంట్రల్ బ్యాంకులు 2026లో ఇప్పటివరకు 675 టన్నుల బంగారాన్ని తమ నిల్వలకు జోడించడమే దీని దీర్ఘకాలిక బలానికి నిదర్శనమని.. 5 నుండి 10 సంవత్సరాల కాలపరిమితి ఉన్న ఇన్వెస్టర్లు ప్రతినెలా ఎస్‌ఐపిల ద్వారా కొనుగోళ్లు కొనసాగించాలని స్పష్టం చేశారు.

అలాగే MMTC-PAMP మేనేజింగ్ డైరెక్టర్ సమిత్ గుహా, అకోయిరా బై ఆగ్మాంట్ డైరెక్టర్ ఆరవ్ బఫ్నా వ్యాఖ్యానిస్తూ.. చిన్న బంగారు నాణేలు, కడ్డీల పట్ల కొనుగోలుదారులు ఎక్కువ మొగ్గు చూపుతున్నారని తెలిపారు. ఒకేసారి కాకుండా విడతల వారీగా కొనుగోలు చేసే వ్యూహం వివిధ ధరల శ్రేణులలో సగటును సాధించడానికి దోహదపడుతుందని.. ఈక్విటీ మార్కెట్లలో ఒడిదుడుకులు వచ్చినప్పుడు బంగారం సంపదను కాపాడుతుందని వివరించారు. ఇన్వెస్టర్లు స్వల్పకాలిక ధరల అంచనాల ఊగిసలాటలో పడకుండా.. తమ మొత్తం ఆర్థిక ప్రణాళికలో బంగారాన్ని ఒక స్థిరమైన సాధనంగా ఉంచుకోవడం శ్రేయస్కరమని నిపుణులు స్పష్టం చేస్తున్నారు.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.