బంగారం కొనుగోలులో భారతీయుల తెలివికి జోహార్లు.. టైటాన్ ఎండీ అజయ్ చావ్లా సంచలన వ్యాఖ్యలు..

అంతర్జాతీయంగా బంగారం మార్కెట్లో ధరలు తీవ్ర ఒడిదుడుకులను ఎదుర్కుంటున్నాయి. పెట్టుబడిదారులు ఈ పసిడి ధరల మార్పులతో తీవ్ర ఆందోళనకు గురవతున్నారు. బంగారం ధరలు పెరిగేతే భారీగా పెరగడం అలాగే తగ్గితే భారీగా తగ్గడం వంటివి చోటు చేసుకుంటున్నాయి. హెచ్చు తగ్గుల్లో తీవ్ర మార్పులతో ఇన్వెస్టర్లు పెట్టుబడులపై అయోమయానికి గురవుతున్నారు. ఇక సామాన్యులు అయితే ఈ ధరలు ఎప్పుడు తగ్గుతాయో మరెప్పుడు పెరుగుతాయో అర్థం కాక తలలు పట్టుకుంటున్నారు. ఈ నేపథ్యంలోనే బంగారం ధరలపై నిపుణులు పలు అభిప్రాయాలను వ్యక్తం చేస్తున్నారు.

Gold ధరల్లో కొనసాగుతున్న హెచ్చుతగ్గులు భారతీయ వినియోగదారుల కొనుగోలు ఉత్సాహాన్ని ఏమాత్రం తగ్గించలేవని Titan Company మేనేజింగ్ డైరెక్టర్ Ajoy Chawla తెలిపారు. ఈక్విటీ మార్కెట్‌లో పెట్టుబడిదారులు ధరల దిద్దుబాట్లను అవకాశాలుగా మలుచుకుంటున్నట్లే.. బంగారం కొనుగోలుదారులు కూడా తగ్గుదలలను సరైన ప్రవేశ అవకాశాలుగా భావిస్తున్నారని ఆయన తెలిపారు.

గతంలో బంగారం ధరలు వేగంగా పెరిగినప్పుడు చాలామంది వినియోగదారులు కొనుగోళ్లను వాయిదా వేసుకున్నారని.. అయితే ఇప్పుడు ఆ వ్యూహం పూర్తిగా మారిందని చావ్లా చెప్పారు. ధరలు మరింత తగ్గుతాయని నిరవధికంగా వేచి ఉండకుండా.. మార్కెట్‌లో చిన్న దిద్దుబాటు వచ్చిన ప్రతీసారి కొనుగోలు చేయాలని వినియోగదారులు నిర్ణయించుకుంటున్నారని వివరించారు. కంచె మీద కూర్చున్నవారిగా చాలా మంది గతంలో నష్టపోయారు. అందుకే ఇప్పుడు షేర్ మార్కెట్‌లో చేసినట్లే.. ప్రతి ధరల దిద్దుబాటును మార్కెట్‌లోకి ప్రవేశించే అవకాశంగా ఉపయోగించుకుంటున్నారని ఆయన పిటిఐకి ఇచ్చిన ఇంటర్వ్యూలో అన్నారు.

బంగారం వ్యాపారంలో అస్థిరత కొనసాగుతుందని అంగీకరించిన చావ్లా.. అయినప్పటికీ డిమాండ్ మాత్రం బలంగా ఉందని స్పష్టం చేశారు. తప్పిపోయిన వారు తిరిగి లోపలికి రావడానికి ప్రయత్నిస్తారు. పాల్గొనాలనే తపన వినియోగదారుల్లో స్పష్టంగా కనిపిస్తోందని ఆయన పేర్కొన్నారు. డిసెంబర్ త్రైమాసికంలో పండుగల సీజన్.. కొత్త డిజైన్‌ల ఆవిష్కరణలు, వివాహ డిమాండ్ కారణంగా టైటాన్ ఆభరణాల విభాగం గణనీయమైన వృద్ధిని నమోదు చేసిందన్నారు. ప్రత్యేకంగా తనిష్క్ బ్రాండ్‌కు వినియోగదారుల నుంచి మంచి స్పందన లభించిందని తెలిపారు.

2026 ఫిబ్రవరి ప్రారంభంలో Gold ధరలు 10 గ్రాములకు రూ.1.61 లక్షల వరకు చేరి.. అనంతరం ప్రపంచ సంకేతాలు, లాభాల స్వీకరణ కారణంగా కొంత తగ్గాయని ఆయన గుర్తు చేశారు. అయినప్పటికీ.. సంవత్సరం మొదటి భాగంలో కొనుగోలు చేయని వినియోగదారులు, పండుగలు, వివాహాల సీజన్‌ను దృష్టిలో ఉంచుకుని ముందుగానే మార్కెట్‌లోకి వచ్చారని తెలిపారు. ప్రపంచ స్థాయిలో కొనసాగుతున్న అనిశ్చితి కూడా బంగారంపై సానుకూల సెంటిమెంట్‌ను పెంచుతోందని చావ్లా అభిప్రాయపడ్డారు.

సాంస్కృతిక సంప్రదాయాలు, వివాహాలు, పండుగలు వంటి అంశాలు భారతదేశంలో Gold డిమాండ్‌ను మరింత బలోపేతం చేస్తున్నాయని చెప్పారు. ఇళ్లలో కూడా బంగారాన్ని ఖర్చుగా కాకుండా ఒక ఆస్తిగా చూడాలనే ఆలోచన బలపడుతోందని ఆయన వ్యాఖ్యానించారు. ముఖ్యంగా మహిళలు ఆభరణాల ప్రాముఖ్యతను సురక్షిత పెట్టుబడిగా నొక్కిచెబుతూ.. కుటుంబ ఆర్థిక నిర్ణయాల్లో కీలక పాత్ర పోషిస్తున్నారని తెలిపారు.

FOMO (తప్పిపోతామనే భయం) కూడా ఇటీవల డిమాండ్‌ను పెంచిన ప్రధాన కారణమని చావ్లా పేర్కొన్నారు. ఇప్పుడు కొనడం మంచిదని భావించి చాలా మంది వినియోగదారులు మార్కెట్‌లోకి వచ్చారు. ఈ ధోరణి జనవరి వరకు కొనసాగిందని అన్నారు. అయితే బంగారం ధరలు అమెరికా ఫెడరల్ రిజర్వ్ వడ్డీ రేట్లు, బాండ్ దిగుబడులు, ప్రపంచ ద్రవ్యత వంటి అంశాలతో ముడిపడి ఉండటంతో, ధరల హెచ్చుతగ్గులు అనివార్యమని ఆయన హెచ్చరించారు. దీర్ఘకాలిక దృష్టితో చూస్తే ఈ అస్థిరత పెద్ద సమస్య కాదని.. బంగారం ఇంకా బలమైన పెట్టుబడిగానే కొనసాగుతుందని చావ్లా స్పష్టం చేశారు.