తెరుచుకున్న ఆర్థిక వ్యవస్థలు, తగ్గుతున్న బంగారం ధరలు

ఇండియన్ మార్కెట్లో బంగారం ధరలు ఈ రోజు (జూన్ 5) తగ్గాయి. భారత ఆర్థిక వ్యవస్థ తిరిగి తెరుచుకుంటున్న విషయం తెలిసిందే. అలాగే ఈక్విటీ మార్కెట్లు లాభాల్లోకి వచ్చాయి. ఈ ప్రభావం బంగారంపై కనిపిస్తోంది. నేడు బంగారం ధరలు ఎంసీఎక్స్ 0.7 శాతం తగ్గి 10 గ్రాముల బంగారం ధర రూ.46,369 పలికింది. మధ్యాహ్నం గం.11.30 సమయానికి 10 గ్రాములు 46,288 పలికింది. అంతకుముందు సెషన్‌లో బంగారం ధర రూ.700 పెరిగింది. వెండి ధర కిలో 0.8 శాతం తగ్గి రూ.48,402 పలికింది.

అంతర్జాతీయ మార్కెట్లో బంగారం ధర

అంతర్జాతీయ మార్కెట్లో బంగారం ధరలు ఔన్స్ 0.2% పెరిగి 1,714.78 డాలర్లు పలికింది. ఈ వారం డాలర్ ఇతర కరెన్సీలతో పోలిస్తే 1.5 శాతం మేర తగ్గింది. ఈ ప్రభావం బంగారంపై ఉంటుంది. ఇతర ఖరీదైన మెటల్స్ విషయానికి వస్తే ప్లాటిమ్ 0.4 శాతం పెరిగి ఔన్స్ ధర 840.39 డాలర్లు, వెండి ఔన్స్ 17.72 పలికింది.

ఆర్థిక వ్యవస్థలు తెరుచుకుంటుండటంతో

ఇప్పటి వరకు కరోనా కారణంగా క్లోజ్ అయిన అంతర్జాతీయ ఆర్థిక వ్యవస్థలు క్రమంగా తెరుచుకుంటున్నాయని, బంగారంపై ఒత్తిడి తగ్గుతోందని బులియన్ మార్కెట్ నిపుణులు చెబుతున్నారు. బంగారం రూ.46,700 నుండి రూ.46,800 లెవల్‌కు చేరుకోవచ్చునని చెబుతున్నారు. అమెరికా - చైనా మధ్య ఉద్రిక్తతలు, కరోనా వ్యాప్తి వంటి అంశాలు బంగారంపై ముందు ముందు కూడా ప్రభావం చూపుతాయని చెబుతున్నారు.

హైదరాబాద్‌లో నేడు బంగారం ధరలు

హైదరాబాదులో బంగారం ధరలు స్థిరంగా ఉన్నాయి 24 క్యారెట్ల 10 గ్రాముల బంగారం ధర రూ.48,640 పలికింది. నిన్న కూడా ఇదే ధర ఉంది. 22 క్యారెట్ల బంగారం ధర రూ.44,560 పలికింది. గత పది రోజుల్లో హైదరాబాదులో బంగారం ధరలు స్వల్పంగా తగ్గాయి. 26 మే 2020న 10 గ్రాముల 24 క్యారెట్ల బంగారం ధర రూ.49,010 పలికింది. జూన్ 1వ తేదీతో మాత్రం స్వల్పంగా పెరిగాయి. ఈ నెల ప్రారంభంలో రూ.49,220 ఉండగా నేడు రూ.48,640 పలికింది.