బంగారం ధర సెప్టెంబర్‌లో రూ..1. 70 లక్షలకు.. గంటల వ్యవధిలో కుప్పకూలిన పసిడి రేటు.. మార్కెట్లో ఏం జరుగుతోంది..

అంతర్జాతీయ బులియన్ మార్కెట్‌లో Gold పరుగు ఆగేలా కనిపించడం లేదు. 2026 ఆగస్టు నెలలో బంగారం ధరలు వరుసగా ఐదవ వారం కూడా గరిష్ఠాల వైపు పయనిస్తూ.. 1999 తర్వాత అత్యుత్తమ నెలవారీ వృద్ధిని నమోదు చేసే దిశగా దూసుకుపోతున్నాయి. ఆగస్టు 27 రాత్రి ఆల్-టైమ్ ఆసియా-ట్రేడింగ్ పరిమితులను దాటుకుంటూ స్పాట్ గోల్డ్ ఔన్సుకు అత్యున్నతంగా 4,607.90 డాలర్లకి చేరుకుంది. భారత కాలమానం ప్రకారం ఆగస్టు 28 ఉదయం నాటికి స్వల్ప ప్రాఫిట్ బుకింగ్ నమోదైనప్పటికీ.. అంతర్జాతీయ మార్కెట్లో ఔన్స్ ధర 4,596 డాలర్ల వద్ద నిలకడగా కొనసాగుతోంది. ఒక డాలర్ విలువను రూ. 95 గా లెక్కిస్తే, రూపాయిల్లో ఔన్స్ బంగారం బేస్ ధర సుమారు రూ. 4.41 లక్షలుగా ఉంది.

డాలర్ సూచీలో బలహీనత, అమెరికా డెట్ మార్కెట్ ఆందోళనలు, వివిధ దేశాల సెంట్రల్ బ్యాంకులు పెద్ద ఎత్తున పసిడిని కొనుగోలు చేయడమే ఈ రికార్డు ర్యాలీకి ప్రధాన కారణమని విశ్లేషకులు భావిస్తున్నారు. యూఎస్ 30 ఏళ్ల ట్రెజరీ బాండ్ రాబడి (Yield) 20 ఏళ్ల గరిష్ట స్థాయి అయిన 5.34% కి చేరుకున్నప్పటికీ.. బంగారంపై ఇన్వెస్టర్ల ఆసక్తి తగ్గకపోవడం గమనార్హం. సాధారణంగా బాండ్ రాబడులు పెరిగినప్పుడు వడ్డీ చెల్లించని బంగారం ఆకర్షణ తగ్గుతుంది. కానీ, అమెరికా ప్రభుత్వ అప్పు ఏకంగా 40 ట్రిలియన్ డాలర్లకు (రూ. 3,800 లక్షల కోట్లు) చేరుకోవడంతో ఇన్వెస్టర్లు సురక్షితమైన ఇన్వెస్ట్‌మెంట్‌గా బంగారానికే మొగ్గు చూపుతున్నారు.

ఈ క్రమంలో బాండ్ మార్కెట్‌లో లిక్విడిటీని పెంచేందుకు యూఎస్ ట్రెజరీ కీలక నిర్ణయం తీసుకుంది. సెప్టెంబర్ 9 నుండి నవంబర్ 4, 2026 వరకు అమలులో ఉండేలా పాత బాండ్ల బైబ్యాక్ పరిమితిని ఒక్కో ఆపరేషన్‌కు 2 బిలియన్ డాలర్ల నుండి 4 బిలియన్ డాలర్లకు (రూ.38,000 కోట్లు పెంచనున్నట్లు ప్రకటించింది. మాజీ ఇన్వెస్ట్‌మెంట్ బ్యాంకర్ ఫెలిక్స్ ప్రెన్ దీనిని పరోక్ష ద్రవ్య సరఫరా పెంచడంగా (మనీ ప్రింటింగ్) వర్ణించినప్పటికీ.. పాత బాండ్ల స్థానంలో కొత్త సెక్యూరిటీలను జారీ చేస్తున్నందున ఇది అధికారికంగా కొత్త నోట్ల ముద్రణ కాదని యూఎస్ అధికారులు స్పష్టం చేశారు.

Also Read

గత 27 ఏళ్ల రికార్డును బద్దలు కొట్టిన బంగారం ధర.. అయినా డబ్బు సురక్షితంగా లేదంటున్న ఇన్వెస్టర్లు..

భారతదేశంలో బంగారం ధరల పరిస్థితి ఏమిటి?

అంతర్జాతీయ బేస్ ధరతో పోలిస్తే భారత్‌లో దిగుమతి సుంకాలు, జీఎస్టీ, డీలర్ ప్రీమియం మరియు ఆభరణాల తయారీ ఛార్జీలు కలవడం వల్ల రిటైల్ మార్కెట్ ధరలు చాలా ఎక్కువగా ఉన్నాయి. ఆగస్టు 27 రాత్రికి ఎంసీఎక్స్ (MCX) లో 10 గ్రాముల బంగారం కాంట్రాక్ట్ రూ. 1,59,189 వద్ద ముగిసింది. ఢిల్లీ, ముంబై వంటి ప్రధాన నగరాల్లో 24-క్యారెట్ల 10 గ్రాముల బంగారం ధర సుమారు రూ. 1,63,740 నుండి రూ. 1,63,890 మధ్యలో నమోదు కాగా, 22-క్యారెట్ బంగారం ధర రూ. 1,50,100 వద్ద ఉంది.

ట్రేడింగ్ ఎకనామిక్స్, సిటీ బ్యాంక్ అంచనాల ప్రకారం, రాబోయే సెప్టెంబర్ నెలలో భారత మార్కెట్లో (MCX) 10 గ్రాముల బంగారం ధరల శ్రేణి రూ. 1.55 లక్షల నుండి రూ.1.66 లక్షల మధ్య ఉండే అవకాశం ఉంది. ఒకవేళ అంతర్జాతీయ మార్కెట్‌లో బంగారం 4,900 డాలర్ల రెసిస్టెన్స్ దాటితే, దేశీయ మార్కెట్‌లో త్వరలోనే రూ. 1.70 లక్షల నూతన మైలురాయిని తాకవచ్చని టెక్నికల్ విశ్లేషకులు అంచనా వేస్తున్నారు.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.