Gold price: 2013 తర్వాత అతిపెద్ద పతనం ఇదే! బంగారం కొనేందుకు ఇదే సరైన సమయమా?

సాధారణంగా ఆర్థిక అనిశ్చితి లేదా యుద్ధం లాంటి పరిస్థితులు ఉన్నప్పుడు పెట్టుబడిదారులు సురక్షితమైన ఆస్తిగా భావించే బంగారం వైపు మొగ్గు చూపుతారు. కానీ, 2026 మార్చి నెలలో పరిస్థితి రివర్స్ అయ్యింది. బంగారం (gold) మార్కెట్ చరిత్రలో 2013 జూన్ తర్వాత అత్యంత బలహీనమైన నెలగా ఈ మార్చి రికార్డు సృష్టించింది. అంతర్జాతీయ మార్కెట్‌లో బంగారం ధరలు అనూహ్యంగా పడిపోయి ఔన్సుకు 4,608 డాలర్లకు చేరుకున్నాయి. వర్ల్డ్ గోల్డ్ కౌన్సిల్ (WGC) నివేదిక ప్రకారం, ఈ పతనానికి ప్రధాన కారణం పెట్టుబడిదారులు తమ నిధులను బంగారం నుండి వెనక్కి తీసుకోవడమే.

పసిడి పతనానికి ప్రధాన కారణాలేంటి?

బంగారం ధరలు తగ్గడానికి కేవలం ఒక్క కారణం మాత్రమే లేదు. ప్రపంచవ్యాప్తంగా గోల్డ్ ఈటీఎఫ్‌ల (ETFs) నుండి ఏకంగా 12 బిలియన్ డాలర్ల (సుమారు 84 టన్నుల బంగారం) పెట్టుబడులు ఒకే నెలలో బయటకు వెళ్లిపోయాయి. ముఖ్యంగా ఉత్తర అమెరికా, యూరోప్ దేశాల్లోని ఇన్వెస్టర్లు పెద్ద ఎత్తున బంగారాన్ని అమ్మేయడం మార్కెట్‌ను దెబ్బతీసింది.

మరో వైపు, అంతర్జాతీయంగా ఇరాన్ యుద్ధం కారణంగా నెలకొన్న ఆర్థిక మందగమనం కూడా బంగారం ధరలపై ప్రతికూల ప్రభావాన్ని చూపింది. సాధారణంగా యుద్ధం ఉంటే ధరలు పెరగాలి, కానీ ప్రపంచ ఆర్థిక వ్యవస్థ మందగించడం, డాలర్ విలువ పెరగడం వంటి అంశాలు పసిడిని కిందకు లాగేలా చేశాయి. అమెరికాలో రియల్ బాండ్ యీల్డ్స్ పెరగడం కూడా గోల్డ్ మార్కెట్‌కు గట్టి దెబ్బ తగిలింది.

ఆసియా దేశాల్లో విరుద్ధమైన పరిస్థితి

ప్రపంచవ్యాప్తంగా బంగారం ధరలు పడిపోతుంటే, ఆసియా దేశాల్లో మాత్రం ఇన్వెస్టర్లు దీనిని ఒక అవకాశంగా తీసుకున్నారు. ధరలు తగ్గినప్పుడు కొనుగోలు చేయాలనే 'డిప్ బయింగ్' ట్రెండ్ ఆసియాలో కనిపించింది. దీనివల్ల సుమారు 1.9 బిలియన్ డాలర్ల పెట్టుబడులు ఆసియా మార్కెట్లోకి వచ్చాయి. భారత్ వంటి దేశాల్లో బంగారం ధర తగ్గడంతో సామాన్యులు , జ్యువెలర్స్ కొనుగోళ్లు పెంచడం విశేషం.

టెక్నికల్ అంశాల ప్రభావం

బంగారం ధర ఒకసారి పడిపోవడం మొదలయ్యాక, టెక్నికల్ ఫ్యాక్టర్స్ , కమోడిటీ ట్రేడింగ్ అడ్వైజర్స్ (CTAs) తమ పొజిషన్లను క్లోజ్ చేశారు. కీ లెవల్స్ (Key levels) దాటి ధర కిందకు రావడంతో భారీ ఫండ్స్ తమ వద్ద ఉన్న గోల్డ్ స్టాక్‌ను విక్రయించాయి. దీనివల్ల పతనం మరింత వేగవంతమైంది.

బంగారం మెరుపు మళ్ళీ వస్తుందా?

బంగారం తన మెరుపును పూర్తిగా కోల్పోయిందని అనుకోవడం పొరపాటే. ప్రపంచ గోల్డ్ కౌన్సిల్ నివేదిక ప్రకారం, ఏప్రిల్ ప్రారంభం నుండి మళ్ళీ ఈటీఎఫ్ (ETF) పెట్టుబడులు మెల్లగా పెరుగుతున్నాయి. డాలర్ విలువలో వస్తున్న మార్పులు బంగారం ధరలకు మళ్ళీ ఊతాన్ని ఇచ్చే అవకాశం ఉంది. ప్రస్తుతం బంగారం (gold) మార్కెట్ కొంత స్థిరత్వానికి లోనవుతోంది. దీర్ఘకాలిక ఇన్వెస్టర్లకు ఇలాంటి ధరల పతనం ఒక మంచి కొనుగోలు అవకాశంగా మారుతుంది. అయితే, అంతర్జాతీయ ఉద్రిక్తతలు , యూఎస్ ఆర్థిక విధానాలను గమనిస్తూ అడుగులు వేయడం ఉత్తమం.