బంగారం ధరలు ఈ రేటు వద్దకు వస్తేనే కొనండి.. కీలక సూచన చేస్తున్న బులియన్ నిపుణులు..

ప్రపంచ బులియన్ మార్కెట్లో బంగారం, వెండి ధరలు ప్రస్తుతం అంతర్జాతీయ పరిణామాల నేపథ్యంలో బలంగా నిలబడుతున్నాయని ఆనంద్ రాఠీ షేర్స్ అండ్ స్టాక్ బ్రోకర్స్ సంస్థకు చెందిన కమోడిటీస్ & కరెన్సీస్ రీసెర్చ్ అనలిస్ట్ వేదికా నర్వేకర్ విశ్లేషించారు. ప్రపంచవ్యాప్తంగా వివిధ దేశాల సెంట్రల్ బ్యాంకులు జరుపుతున్న నిరంతర కొనుగోళ్లు ఈ పసిడి ధరలకు సుదీర్ఘ కాలం పాటు మద్దతునిస్తూనే ఉండే అవకాశం ఉందని ఆమె అభిప్రాయపడ్డారు.

అమెరికా-ఇరాన్ మధ్య కుదిరిన మధ్యంతర శాంతి ఒప్పందం, వ్యూహాత్మక హార్ముజ్ జలసంధి పునఃప్రారంభం కానుండటంతో మార్కెట్ల దృష్టి ఒక్కసారిగా యుద్ధ భయాల నుండి ఆర్థిక అంశాల వైపు మళ్లింది. భౌగోళిక రాజకీయ ఉద్రిక్తతలు సడలడంతో ముడి చమురు ధరలు, ద్రవ్యోల్బణ అంచనాలు తగ్గుముఖం పట్టాయి.

ఇది యూఎస్ ఫెడరల్ రిజర్వ్ వడ్డీ రేట్లను మరింత కఠినతరం చేస్తుందనే భయాలను తగ్గించింది. ఫలితంగా, అమెరికా ట్రెజరీ దిగుబడులు, డాలర్ ఇండెక్స్ బలహీనపడటం బులియన్‌కు సానుకూలంగా మారింది. అంతర్జాతీయ మార్కెట్లో స్పాట్ Gold ఔన్సుకు $4,000 మద్దతు స్థాయిని పరీక్షించిన అనంతరం తిరిగి కోలుకుని విజయవంతంగా $4,300 మార్కును దాటింది.

ఈ వారం జరగనున్న యూఎస్ ఫెడ్ సమావేశంపైనే అందరి దృష్టి ఉంది. వడ్డీ రేట్ల కోతకు సంబంధించి విధానకర్తలు ఇచ్చే సంకేతాలు బంగారం తదుపరి గమనాన్ని శాసిస్తాయి. దీనితో పాటు అమెరికా ద్రవ్యోల్బణ డేటాతో పాటు స్విట్జర్లాండ్‌లో అమెరికా-ఇరాన్ ఒప్పందంపై జరగబోయే అధికారిక సంతకాల పరిణామాలను కూడా పెట్టుబడిదారులు నిశితంగా పర్యవేక్షిస్తున్నారు.

ప్రస్తుత మార్కెట్ ధరల విషయానికి వస్తే.. అంతర్జాతీయ మార్కెట్లో స్పాట్ Gold ధర ప్రస్తుతం ఔన్సుకు $4,320 వద్ద కొనసాగుతోంది. దీనికి $4,150, $4,020 స్థాయిలు ప్రధాన మద్దతుగా నిలుస్తుండగా, $4,390, $4,620 స్థాయిలు కీలక ప్రతిఘటనలుగా (రెసిస్టెన్స్) ఉన్నాయి.

ఇక దేశీయ మార్కెట్ అయిన MCX లో బంగారం ధర ప్రస్తుతం 10 గ్రాములకు రూ. 1,52,470 వద్ద ట్రేడవుతోంది. దేశీయంగా బంగారానికి రూ. 1,46,200 మరియు ₹1,41,700 వద్ద సపోర్ట్ లెవెల్స్, అలాగే రూ.1,54,700 రూ. 1,62,800 వద్ద ప్రతిఘటన స్థాయిలు కనిపిస్తున్నాయి.

Also Read

బంగారం, వెండి ధరలు రేపు తగ్గుతాయా పెరుగుతాయా ..ఈ అర్థరాత్రి డిసైడ్ చేయనున్న అమెరికా..

MCX గోల్డ్ వ్యూహం

ప్రస్తుత మార్కెట్ ధర: రూ. 1,52,470
మద్దతు: రూ. 1,46,200 నుంచి రూ. 1,41,700 (కొనుగోలు స్థాయి)
ప్రతిఘటన: రూ. 1,54,700 నుంచి రూ. 1,62,800 (కొనుగోలు ఆపేస్థాయి)

ఇక వెండి విషయానికి వస్తే.. ఇటీవల ధరల్లో తీవ్రమైన అస్థిరత కనిపించినప్పటికీ ప్రాథమికంగా వెండికి అంతర్జాతీయంగా డిమాండ్ బలంగానే ఉంది. 2026 ఆర్థిక సంవత్సరంలో వరుసగా ఆరవ ఏడాది కూడా వెండికి అంతర్జాతీయంగా సరఫరా కొరత ఏర్పడే అవకాశం ఉందని అంచనా వేస్తున్నారు. ప్రస్తుతం అంతర్జాతీయ మార్కెట్లో వెండి ధర ఔన్సుకు $70 వద్ద ఉంది. దీనికి $64, $61 వద్ద మద్దతు స్థాయిలు, అలాగే $72.50, $76.50 వద్ద ప్రతిఘటన స్థాయిలు ఉన్నాయి. అదే సమయంలో దేశీయంగా MCX లో వెండి ధర కిలాగ్రాముకు రూ. 2,49,340 వద్ద ట్రేడవుతోంది. దేశీయ మార్కెట్లో వెండికి రూ. 2,27,800 రూ. 2,17,000 స్థాయిలు మద్దతుగా, రూ.2,56,250, రూ.2,72,800 స్థాయిలు కీలక ప్రతిఘటనలుగా విశ్లేషకులు పేర్కొంటున్నారు.

MCX సిల్వర్ వ్యూహం

ప్రస్తుత మార్కెట్ ధర: రూ. 2,49,340
మద్దతు: రూ. 2,27,800 నుంచి రూ. 2,17,000 (కొనుగోలు స్థాయి)
ప్రతిఘటన: రూ. 2,56,250 నుంచి రూ. 2,72,800 (కొనుగోలు ఆపే స్థాయి)

అంతర్జాతీయంగా చమురు ధరలు తగ్గడం తక్షణ ద్రవ్యోల్బణ భయాలను తగ్గించినప్పటికీ, ఫెడ్ రిజర్వ్ వెంటనే దూకుడుగా కాకుండా జాగ్రత్తగా వడ్డీ రేట్లపై నిర్ణయం తీసుకునే అవకాశం ఉంది. డాలర్ నుండి తమ నిల్వలను మార్చుకోవాలని చూస్తున్న సెంట్రల్ బ్యాంకుల కొనుగోళ్లు పసిడి ధరలకు ఒక బలమైన రక్షణ కవచంలా నిలుస్తున్నాయి. ద్రవ్యోల్బణం అదుపులో ఉండి, ఆర్థిక వృద్ధి సాధారణంగా సాగినంత కాలం బంగారంలో దీర్ఘకాలిక బుల్లిష్ (లాభాల) ధోరణి కొనసాగుతుందని, ధరల్లో వచ్చే ఏవైనా స్వల్పకాలిక తగ్గుదలలు వ్యూహాత్మక కొనుగోళ్లకు మంచి అవకాశాలుగా మారుతాయని నిపుణులు అంచనా వేస్తున్నారు.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.