బంగారం ధరలు ఈ స్థాయి వద్దకు దిగబోతున్నాయి.. కొనుగోలుపై కీలక నిర్ణయం తీసుకోమంటున్న ఆర్థిక నిపుణులు

అమెరికా - ఇరాన్ మధ్య నెలకొన్న ఉద్రిక్తతలు అంతర్జాతీయ మార్కెట్‌ను కుదిపేస్తున్నాయి. దీని ప్రభావం నేరుగా బంగారం ధరలపై కనిపిస్తోంది. ప్రస్తుత పరిస్థితుల్లో బంగారం ధరలు ఒక నిర్దిష్ట పరిధిలో స్థిరంగా ఉన్నట్లు కనిపిస్తున్నప్పటికీ.. లోలోపల మార్కెట్ తీవ్రమైన అస్థిరతకు లోనవుతోందని ఎల్‌కేపీ సెక్యూరిటీస్ విశ్లేషకులు జతీన్ త్రివేది పేర్కొన్నారు. ఇటీవల ఎంసీఎక్స్ (MCX) Gold ఫ్యూచర్స్ కొంత పతనాన్ని చవిచూసిన తర్వాత తిరిగి కోలుకుని రూ.1,46,900 స్థాయికి చేరుకున్నాయి. ధరల్లో వచ్చిన ఈ మార్పు కేవలం తాత్కాలికమేనని.. ప్రస్తుతం మార్కెట్ ఒక స్థిరీకరణ దశలో ఉందని విశ్లేషణలు చెబుతున్నాయి.

ఈ అస్థిరతకు ప్రధాన కారణం కేవలం యుద్ధ వాతావరణమే కాకుండా, అమెరికా ఫెడరల్ రిజర్వ్ వడ్డీ రేట్లపై తీసుకునే నిర్ణయాల్లో ఉన్న అనిశ్చితి కూడా ఒక ముఖ్య కారణం. భౌగోళిక రాజకీయ పరిస్థితులు ఆందోళనకరంగా మారినప్పుడు పెట్టుబడిదారులు సాధారణంగా బంగారాన్ని 'సురక్షిత ఆశ్రయం' (Safe-haven) గా భావిస్తారు. దీనివల్ల మార్కెట్ సున్నితంగా మారుతూ, ఇంట్రాడే ట్రేడింగ్‌లో ధరలు అనూహ్యంగా హెచ్చుతగ్గులకు లోనవుతున్నాయి.

సాంకేతిక విశ్లేషణ పరంగా చూస్తే..ఎక్స్‌పోనెన్షియల్ మూవింగ్ యావరేజ్ (EMA) క్లస్టర్ వద్ద ధరలు కదులుతుండటం వల్ల సమీప భవిష్యత్తులో ఏదో ఒక దిశలో స్పష్టమైన ట్రెండ్ రావడం కష్టమని తెలుస్తోంది. బోలింజర్ బ్యాండ్‌లు వెడల్పుగా ఉండటం మార్కెట్‌లో ఉన్న తీవ్రమైన ఒడిదుడుకులను ప్రతిబింబిస్తోంది.

మరోవైపు.. రిలేటివ్ స్ట్రెంత్ ఇండెక్స్ (RSI) ప్రస్తుతం 50 స్థాయి వద్ద ఉండటంతో మార్కెట్ తటస్థ స్థితిలో ఉందని చెప్పవచ్చు. గతంలో ఉన్న బేరిష్ మొమెంటం క్రమంగా తగ్గుముఖం పట్టినట్లు MACD సూచిస్తున్నప్పటికీ.. ధరలు మళ్లీ వేగంగా పెరుగుతాయని చెప్పడానికి బలమైన బుల్లిష్ సంకేతాలు ఇంకా లభించలేదు. ప్రస్తుతానికి Gold ధర రూ. 1,47,500 నుండి రూ.1,47,800 మధ్య తక్షణ నిరోధాన్ని ఎదుర్కొంటోంది. ఒకవేళ దీనిని దాటితే రూ. 1,49,500 వరకు పెరిగే అవకాశం ఉంది. దిగువ స్థాయిలో రూ. 1,46,000 వద్ద తక్షణ మద్దతు ఉండగా..రూ. 1,44,500 స్థాయి ఒక ప్రధాన డిమాండ్ జోన్‌గా పనిచేస్తోంది.

మొత్తంగా చూసినట్లయితే డాలర్ సూచీ, బాండ్ దిగుబడులలో వచ్చే మార్పులు ఈ సెషన్‌లో బంగారం ధరలను రూ. 1,45,000 నుండి రూ. 1,49,000 మధ్య పరిమితం చేసే అవకాశం ఉంది. అయితే, అంతర్జాతీయంగా ఏదైనా పెద్ద మార్పు జరిగితే అకస్మాత్తుగా బ్రేక్‌అవుట్ వచ్చే అవకాశం ఉంది కాబట్టి వ్యాపారులు కీలక స్థాయిలను నిశితంగా గమనిస్తూ ఉండాలి. మార్కెట్ ప్రస్తుతం అస్థిరంగా ఉన్నందున, స్పష్టమైన దిశానిర్దేశం వచ్చే వరకు వేచి చూడటం ఉత్తమమని నిపుణుల అభిప్రాయపడుతున్నారు.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.