బంగారం ధర ఇంకేంత పెరుగుతుంది ? సామాన్యులు కొనడానికి రైట్ టైం ఎప్పుడు.. ?

అంతర్జాతీయంగా బంగారం వినియోగంలో మన దేశం రెండవ స్థానంలో ఉంది. కానీ మన దేశంలో పెద్ద ఎత్తున బంగారం ఉత్పత్తి లేదు. అందువల్ల భారతదేశ పసిడి డిమాండ్‌లో ఎక్కువ భాగం దిగుమతుల ద్వారా అవుతుంది. బంగారం ధర ప్రస్తుతం దేశంలోనే కాకూండా అంతర్జాతీయ మార్కెట్‌లో కొత్త రికార్డుకు చేరుకుంది. గత వారం నాటికి ఔన్స్ బంగారం ధర $2,882 డాలర్లు. లండన్ స్పాట్ మార్కెట్లో ఈ ఏడాది ఇప్పటివరకు బంగారం ధరలు 9 శాతం పెరిగాయి. ఈ కాలంలో మన దేశంలో కూడా ధరలు 10 శాతానికి పైగా పెరిగాయి.

సాధారణంగా యుద్ధ ఉద్రిక్తతలు, పెరిగిన డిమాండ్, రూపాయి విలువ తగ్గడం వంటి కారణాల వల్ల బంగారం ధర పెరగవచ్చు. ప్రస్తుతం బంగారం ధరలు పెరగడానికి ప్రధాన కారణం అమెరికా కొత్త అధ్యక్షుడు డోనాల్డ్ ట్రంప్. డొనాల్డ్ ట్రంప్ కెనడా, మెక్సికో, చైనా నుండి దిగుమతి చేసుకునే వస్తువులపై సుంకాలు భారీగా విధించారు. చైనా వస్తువులపై 10 శాతం, కెనడా, మెక్సికో నుంచి దిగుమతి చేసుకునే వస్తువులపై 25 శాతం సుంకం విధిస్తూ ట్రంప్ ఉత్తర్వులపై సంతకం కూడా చేశారు. అయితే ట్రంప్ చర్య పెద్ద సుంకాల యుద్ధానికి దారితీస్తుందని అలాగే ప్రపంచ ఆర్థిక వృద్ధిపై ప్రభావం ఉంటుందనే భయాలు ఉన్నాయి.

డోనాల్డ్ ట్రంప్ చర్య వల్ల రూపాయితో సహా ఇతర కరెన్సీలతో పోలిస్తే డాలర్ విలువ పెరిగింది. పెట్టుబడిదారులు స్టాక్స్‌లో పెట్టుబడి పెట్టడానికి బదులుగా సురక్షితమైన పెట్టుబడులుగా భావించే బంగారం ఇంకా వెండి వైపు మొగ్గు చూపుతున్నారు. ఈ కారణాల వల్ల కూడా అంతర్జాతీయ మార్కెట్లో బంగారం ధర బాగా పెరిగింది. అమెరికా డాలర్‌తో పోలిస్తే రూపాయి విలువ తగ్గితే, బంగారం దిగుమతి చేసుకునే ఖర్చు పెరుగుతుంది. ఈ పెరిగిన ధరలు కస్టమర్ల పైకి బదిలీ అవుతుంది, దింతో దేశీయంగా బంగారం ధర పెరుగుదలకు దారితీస్తుంది. గత వారం అమెరికా డాలర్‌తో పోలిస్తే రూపాయి విలువ ఆల్‌టైమ్ కనిష్ట స్థాయి 87.64కి పడిపోయింది.

గత 5 సంవత్సరాలలో రూపాయి విలువ 24 శాతానికి పైగా క్షీణించింది. అలాగే మన దేశంలో పెళ్లిళ్ల సీజన్ ప్రారంభమైనందున బంగారానికి డిమాండ్ పెరిగింది. దింతో బంగారం ధర రోజురోజుకు పెరుగుతూ వస్తుంది. అంతర్జాతీయ మార్కెట్లో బంగారం ధర అస్థిరంగా ఉన్నప్పటికీ భౌగోళిక రాజకీయ ఉద్రిక్తతలు తగ్గుముఖం పడుతున్న సంకేతాలు ఇంకా ఆర్థిక వృద్ధిని పెంచడానికి వివిధ ప్రభుత్వాలు తీసుకున్న చర్యల కారణంగా బంగారం ధర క్రమంగా తగ్గే అవకాశం ఉందని నిపుణులు అంచనా వేస్తున్నారు.