Gold: బంగారం ధరల్లో పెనుమార్పు ! ఈ వారమే ఆ రికార్డు బద్ధలవుతుందా? నిపుణులు ఏమంటున్నారంటే..

మీరు కూడా బంగారం కొనాలని ప్లాన్ చేస్తున్నారా? అయితే ఈ వార్త మిమ్మల్ని ఆశ్చర్యానికి గురిచేయవచ్చు. ప్రస్తుతం అంతర్జాతీయ మార్కెట్‌లో బంగారం ధరలు (gold rates) సృష్టిస్తున్న సంచలనం అంతా ఇంతా కాదు. మునుపెన్నడూ లేని విధంగా పసిడి ధరలు ఆల్ టైం హయ్యెస్ట్ మార్క్ ను తాకుతున్నాయి. తాజాగా ఒక ఔన్స్ బంగారం ధర ఏకంగా $4,850 (సుమారు ₹4.44 లక్షలు) మార్కును దాటేసింది. ఈ వేగం చూస్తుంటే ఈ వారం చివరి నాటికే ఇది $5,000 మైలురాయిని చేరుకోవడం ఖాయంగా కనిపిస్తోంది. ఇదే గనుక జరిగితే.. బంగారం చరిత్రలో ఇదొక సంచలనంగా నిలిచిపోతుంది.

ఎందుకీ భారీ పెరుగుదల? ట్రంప్ ఎఫెక్ట్ ఎంత?

గ్లోబల్ మార్కెట్‌లో బంగారం ధరలు పెరగడానికి ప్రధాన కారణం అంతర్జాతీయ భౌగోళిక రాజకీయ పరిస్థితులు. ముఖ్యంగా అమెరికా అధ్యక్షుడిగా ట్రంప్ తీసుకుంటున్న కొన్ని సంచలన నిర్ణయాలు మార్కెట్లను కుదిపేస్తున్నాయి. గ్రీన్‌ ల్యాండ్‌ ను కొనుగోలు చేయాలనే ట్రంప్ ప్రతిపాదన అలాగే యూరోపియన్ యూనియన్ (EU) పై కొత్తగా విధించిన టారిఫ్ లు ప్రపంచ దేశాల మధ్య వాణిజ్య యుద్ధానికి (Trade War) దారితీస్తున్నాయి.

దీనికి తోడు, అమెరికా ట్రెజరీ బాండ్లను ఇన్వెస్టర్లు భారీగా విక్రయిస్తుండటంతో డాలర్ విలువపై ఒత్తిడి పెరుగుతోంది. డాలర్ బలహీనపడినప్పుడల్లా ఇన్వెస్టర్లు తమ పెట్టుబడులను భద్రంగా ఉంచుకోవడానికి బంగారం, వెండి వైపు మళ్ళుతారు. దీనివల్ల డిమాండ్ పెరిగి ధరలు ఆకాశాన్నంటుతున్నాయి.

నిపుణుల అభిప్రాయం ఏంటి?

ప్రముఖ మెటల్ నిపుణుడు రషాద్ హాజియేవ్ అభిప్రాయం ప్రకారం, బంగారం ధరలు ఎవరికీ అందనంత వేగంగా దూసుకుపోతున్నాయి. "బంగారం ఎవరికీ అవకాశం ఇవ్వకుండా నేరుగా $5,000 మార్కు వైపు దూసుకెళ్తోంది" అని ఆయన పేర్కొన్నారు. అలాగే 'కోబీసి లెటర్' నివేదిక ప్రకారం, ఈ వారం ముగిసేలోపే బంగారం (gold) కొత్త రికార్డులను తిరగరాయవచ్చు.

జపాన్ మార్కెట్లలో మారుతున్న పరిస్థితులు, పెరుగుతున్న బాండ్ ఈల్డ్స్ కూడా బంగారం ధరలకు మద్దతుగా నిలుస్తున్నాయి. సాధారణంగా ఆర్థిక అనిశ్చితి ఉన్నప్పుడు బంగారాన్ని 'సేఫ్ హెవెన్' (సురక్షితమైన పెట్టుబడి) గా భావిస్తారు. ఇప్పుడు ప్రపంచవ్యాప్తంగా అదే జరుగుతోంది. చాలామంది బంగారంలో పెట్టుబడులను మొదలుపెడుతున్నారు.

మన రూపాయల్లో లెక్కలేంటి? (INR Rates)

అంతర్జాతీయంగా ఒక ఔన్స్ ధర $4,850 అంటే భారత మార్కెట్లో ధరలు మైండ్ బ్లాక్ చేస్తున్నాయి. ప్రస్తుతం మన దేశంలో 10 గ్రాముల (తులం) బంగారం ధర రికార్డు స్థాయిలో ₹1,52,500 మార్కును కూడా దాటేసింది.

• అంతర్జాతీయ ధర: $4,850/oz (సుమారు ₹4.44 లక్షలు)
• భారతదేశంలో (10 గ్రాములు): ₹1,50,000 నుండి ₹1,55,000 మధ్య (పన్నులతో కలిపి)

ఒకవేళ గోల్డ్ రేట్ $5,000 మార్కును తాకితే.. మన దేశంలో తులం బంగారం ధర మరింత పెరిగే అవకాశం ఉందని మార్కెట్ విశ్లేషకులు హెచ్చరిస్తున్నారు. మీరు గనుక బంగారంపై పెట్టుబడి పెట్టాలని ఆలోచిస్తుంటే లేదా పెళ్లిళ్ల కోసం కొనాలనుకుంటే ఈ ధరల పెరుగుదలపై ఒక కన్నేసి ఉంచడం మంచిది. ఈ ట్రెండ్ ఇలాగే కొనసాగితే.. సామాన్యుడికి బంగారం అందని ద్రాక్షలా మారే అవకాశం ఉంది.