బంగారం ధర రూ. 2 లక్షలకు చేరక ముందే అలర్ట్ అవ్వండి.. పసిడి ప్రియులకు కీలక సూచన చేస్తున్న జేపీ మోర్గాన్..

Gold Price Forecast 2027: గత కొన్ని నెలలుగా తీవ్ర అమ్మకాల ఒత్తిడిని ఎదుర్కొంటున్న పసిడి ప్రియులకు, పెట్టుబడిదారులకు నిపుణులు ఆసక్తికరమైన సూచనలు చేస్తున్నారు. ఈ ఏడాది జనవరి 29న మల్టీ-కమోడిటీ ఎక్స్ఛేంజ్ (MCX)లో 10 గ్రాముల బంగారం ధర రూ. 1,80,779 వద్ద సర్వకాలిక రికార్డు గరిష్టాన్ని తాకిన విషయం తెలిసిందే.

అయితే, ఆ తదనంతరం సంభవించిన దిద్దుబాటు (Correction) కారణంగా ప్రస్తుతం దేశీయంగా 10 గ్రాముల బంగారం ధర సుమారు రూ. 1,42,500 వద్ద.. అంతర్జాతీయంగా COMEX గోల్డ్ ఔన్సుకు $4,015 వద్ద ట్రేడవుతోంది. అంతర్జాతీయంగా జీవితకాల గరిష్ట స్థాయి $5,626.80 తో పోలిస్తే పసిడి 28.50 శాతం, MCX రికార్డులతో పోలిస్తే 21 శాతం తక్కువలో లభిస్తుండటంతో.. ఇప్పుడు బంగారం కొనడం సరైన నిర్ణయమేనా అనే సందిగ్ధంలో ఇన్వెస్టర్లు ఉన్నారు.

గ్లోబల్ ఇన్వెస్ట్‌మెంట్ దిగ్గజం జేపీమోర్గాన్ (JPMorgan) వెలువరించిన నివేదిక ప్రకారం.. 2027 చివరి నాటికి అంతర్జాతీయ మార్కెట్లో బంగారం ధరలు ఔన్సుకు $6,300 మార్కును చేరుకోవచ్చని అంచనా వేసింది. ప్రస్తుత INR-USD మారకపు విలువ ప్రకారం ఇది నిజమైతే.. 2027 ముగిసే సమయానికి భారతదేశంలో 10 గ్రాముల పసిడి ధర ఏకంగా రూ. 2.13 లక్షల వద్దకు చేరే అవకాశాలు ఉన్నాయి.

ఈ ధరల పెరుగుదలకు తక్షణ కారణాలను 'పేస్ 360' (PACE 360) చీఫ్ గ్లోబల్ స్ట్రాటజిస్ట్ అమిత్ గోయల్ విశ్లేషిస్తూ.. అమెరికా 10-సంవత్సరాల బాండ్ ఈల్డ్స్ 5 శాతం దిగువకు పడిపోవడం, డాలర్ ఇండెక్స్‌లో ప్రాఫిట్ బుకింగ్ రావడం పసిడికి తక్షణ ప్రేరకంగా మారనుంది. ఏఐ-బూమ్ ప్రభావంతో డాలర్ నిధుల ఉపసంహరణ పెరిగి, బంగారం, వెండి లోహాలకు మద్దతు లభిస్తుంది. 2026 నాటికి అంతర్జాతీయంగా $4,600, MCXలో పసిడి రూ. 1,60,000 తాకే అవకాశం ఉందని పేర్కొన్నారు.

అవినాష్ మెంటర్ రీసెర్చ్ ఫౌండర్ అవినాష్ గోరక్షకర్ అభిప్రాయం ప్రకారం.. 2026 యూఎస్ మధ్యంతర ఎన్నికలు (US Midterm Elections) భౌగోళిక రాజకీయాల్లో కీలకంగా మారనున్నాయి. ఒకవేళ ప్రతిపక్షాలు గెలిచి అమెరికా అధ్యక్షుడికి వ్యతిరేక ఫలితాలు వస్తే.. విధానపరమైన అనిశ్చితి వల్ల బంగారం 'సేఫ్ హెవెన్' (Safe Haven) ఆస్తిగా మరింత పుంజుకుంటుంది. ఒకవేళ ట్రంప్ నాయకత్వంలోని రిపబ్లికన్లు గెలిచి, ఇరాన్‌పై కఠిన వైఖరి అవలంబిస్తే చమురు ధరలు పెరిగి బంగారంపై ప్రతికూల ప్రభావం పడవచ్చు.

మరోవైపు ద్రవ్యోల్బణాన్ని 2 శాతానికి తీసుకురావడమే ధ్యేయంగా ఫెడ్ చీఫ్ కెవిన్ వార్ష్ వ్యూహాలు రచిస్తున్నప్పటికీ.. అమెరికా-రష్యా చమురు ఒప్పందాలు మధ్యప్రాచ్య ఉద్రిక్తతలను తగ్గించాయి. 2027 నాటికి రష్యా-ఉక్రెయిన్ యుద్ధం పూర్తిగా ముగిస్తే.. ప్రపంచవ్యాప్తంగా వడ్డీ రేట్లు తగ్గి 2027 జూన్ నాటికి పసిడి ధరలు రూ. 1,70,000 నుండి రూ. 1,72,000 వరకు పెరగవచ్చని మార్కెట్ నిపుణుడు అనుజ్ గుప్తా వివరించారు.

పసిడి ధరలు రూ. 2 లక్షల మార్కును దాటాలంటే ద్రవ్యోల్బణానికి శాశ్వత పరిష్కారం లభించడంతో పాటు 'హార్ముజ్ జలసంధి' (Strait of Hormuz) ద్వారా స్వేచ్ఛా వాణిజ్యం పునఃప్రారంభం కావడం అత్యంత అవసరమని నిపుణులు స్పష్టం చేస్తున్నారు. 2026 ధంతేరస్ (Dhanteras), దీపావళి పండగలకు ముందే బంగారం ధరలు చారిత్రక రికార్డు వైపు పయనించే అవకాశాలు పుష్కలంగా ఉన్నందున, ప్రస్తుత ధరల తగ్గుదల దీర్ఘకాలిక పెట్టుబడిదారులకు అద్భుతమైన కొనుగోలు అవకాశమని విశ్లేషకులు ముగింపుగా వెల్లడించారు.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.