బంగారం ధర పెరుగుదలపై షాకింగ్ న్యూస్.. ఏప్రిల్ నెలలో ఈ రేటును దాటడం ఖాయం అంటున్న నిపుణులు..

ప్రపంచవ్యాప్తంగా ప్రస్తుతం నెలకొన్న భౌగోళిక రాజకీయ ఉద్రిక్తతలు, ఆర్థిక అనిశ్చితి నేపథ్యంలో.. బంగారం ధరల భవిష్యత్తుపై ప్రముఖ పెట్టుబడిదారుడు పీటర్ షిఫ్ చేసిన వ్యాఖ్యలు అత్యంత ప్రాధాన్యత సంతరించుకున్నాయి. ఇటీవల బంగారం ధరల్లో కొంత తగ్గుదల కనిపించినప్పటికీ.. ఇది ఒక శక్తివంతమైన దశకు నాంది అని, త్వరలోనే ధరలు సరికొత్త రికార్డులను సృష్టించబోతున్నాయని ఆయన అంచనా వేస్తున్నారు.

మార్చి నెలలో బంగారం ధరలు 2008 తర్వాత అత్యంత దారుణమైన పనితీరును కనబరిచాయి. ఫిబ్రవరి చివరిలో ఇరాన్ సంఘర్షణ ప్రారంభమైనప్పటి నుండి మార్చిలో Gold దాదాపు 11 శాతం క్షీణించింది. అయితే మార్చి 23న నమోదైన కనిష్ట స్థాయిల నుండి ధరలు అనూహ్యంగా పుంజుకున్నాయి. కేవలం ఒక వారంలోనే 15 శాతం మేర వృద్ధి చెంది, అంతర్జాతీయ మార్కెట్‌లో ఔన్సుకు 4,700 డాలర్ల మార్కును దాటాయి. ఈ వేగవంతమైన రికవరీని బట్టి.. 1980 తర్వాత ఏప్రిల్ నెల బంగారం చరిత్రలోనే అత్యుత్తమ నెలగా నిలిచే అవకాశం ఉందని షిఫ్ అభిప్రాయపడ్డారు.

బంగారం ధర ప్రస్తుత వేగాన్ని కొనసాగిస్తే.. అది త్వరలోనే 5 వేల డాలర్ల మార్కును దాటి, ఆపై 6 వేల డాలర్ల దిశగా పయనిస్తుందని షిఫ్ జోస్యం చెప్పారు. పెట్టుబడిదారులు Gold ధరలు సామాన్యులకు అందనంత ఎత్తుకు చేరకముందే కొనుగోలు చేయడం ఉత్తమమని ఆయన సూచించారు. ఈ పెరుగుదల కేవలం యుద్ధం వల్ల కలిగిన తాత్కాలిక స్పందన మాత్రమే కాదని, పెట్టుబడిదారుల ఆలోచనా ధోరణిలో వస్తున్న లోతైన మార్పుకు ఇది సంకేతమని ఆయన వాదించారు.

షిఫ్ విశ్లేషణ ప్రకారం అమెరికన్ డాలర్, పేపర్ కరెన్సీలపై పెట్టుబడిదారులకు నమ్మకం సన్నగిల్లుతోంది. అమెరికాలో పెరుగుతున్న అప్పులు, ద్రవ్యోల్బణ ఒత్తిడి, ఆర్థిక అస్థిరత వంటి అంశాలు పెట్టుబడిదారులను 'సురక్షితమైన ఆస్తి' (Safe Haven) అయిన బంగారం వైపు మళ్ళిస్తున్నాయి. డొనాల్డ్ ట్రంప్ ప్రకటనలు లేదా యుద్ధ పరిణామాలు ఎలా ఉన్నప్పటికీ, డాలర్ నుండి బంగారం వైపు మళ్ళే ప్రక్రియ ఇప్పటికే వేగవంతమైందని ఆయన పేర్కొన్నారు. సుదీర్ఘ యుద్ధం, పెరిగిన చమురు ధరలు స్టాక్ మార్కెట్లు, బాండ్లకు ప్రతికూలమైనప్పటికీ, అవి బంగారానికి మాత్రం అనుకూల అంశాలుగా మారుతాయని ఆయన వివరించారు.

అంతర్జాతీయ మార్కెట్‌లో గురువారం నాడు స్పాట్ గోల్డ్ ధర 2 శాతం తగ్గి 4,664.39 డాలర్ల వద్ద ముగిసింది. ఇరాన్ వ్యూహాత్మక లక్ష్యాలపై దాడులు కొనసాగుతాయని అధ్యక్షుడు ట్రంప్ చేసిన వ్యాఖ్యల తర్వాత ముడి చమురు ధరలు 6 శాతం పెరిగాయి. చమురు ధరల పెరుగుదల వల్ల ద్రవ్యోల్బణం పెరుగుతుందనే ఆందోళనలతో, యూఎస్ ఫెడరల్ రిజర్వ్ వడ్డీ రేట్లను తగ్గించే అవకాశం తక్కువగా ఉందని మార్కెట్ భావిస్తోంది. 2026లో వడ్డీ రేట్ల కోతపై అంచనాలు 25% నుండి 12%కి పడిపోవడం బంగారం ధరపై స్వల్పకాలిక ఒత్తిడిని పెంచింది.

ఏదేమైనా పీటర్ షిఫ్ వాదన ప్రకారం.. ప్రపంచ ఆర్థిక వ్యవస్థ ఎదుర్కొంటున్న సంక్లిష్ట పరిస్థితులు బంగారానికి ఒక వరంలా మారనున్నాయి. స్వల్పకాలికంగా ధరలు తగ్గినప్పటికీ, ప్రతి తగ్గుదలనూ కొనుగోలు అవకాశంగా మలుచుకోవాలని ఆయన సూచిస్తున్నారు. పెరుగుతున్న ద్రవ్యోల్బణం, భౌగోళిక ఉద్రిక్తతల నడుమ బంగారం తన పరుగును కొనసాగించి, మునుపెన్నడూ లేని గరిష్ట స్థాయిలను తాకే అవకాశం పుష్కలంగా కనిపిస్తోంది.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.