బంగార ధరలు పెరిగితే వెంటనే అమ్మేసుకోండి.. కీలక హెచ్చరిక జారీ చేస్తున్న ఆర్థిక నిపుణులు..

ప్రస్తుతం బంగారం మార్కెట్ ఒక క్లిష్టమైన, అనిశ్చిత స్థితిలో కొనసాగుతోంది. అంతర్జాతీయంగా అమెరికా, ఇరాన్ మధ్య నెలకొన్న యుద్ధ వాతావరణం, భౌగోళిక రాజకీయ ఉద్రిక్తతలు బంగారం ధరల్లో తీవ్రమైన హెచ్చుతగ్గులకు ప్రధాన కారణమవుతున్నాయి. మోతీలాల్ ఓస్వాల్ ఫైనాన్షియల్ సర్వీసెస్ విశ్లేషకుల అభిప్రాయం ప్రకారం.. Gold ధరలు ప్రస్తుతం కొంత తగ్గుదల ధోరణిలో (Bearish tone) ఉండి, ఒక సర్దుబాటు ప్రక్రియ గుండా వెళ్తున్నాయి. అమెరికా అధ్యక్షుడు డొనాల్డ్ ట్రంప్ ఇరాన్‌తో త్వరలోనే ఒప్పందం కుదురుతుందని ఆశాభావం వ్యక్తం చేసినప్పటికీ.. క్షేత్రస్థాయిలో ఉద్రిక్తతలు తగ్గకపోవడం, ఇరాన్ ఈ ప్రతిపాదనలను తోసిపుచ్చడం ఇన్వెస్టర్లలో ఆందోళనను పెంచుతోంది.

సాంకేతికంగా పరిశీలిస్తే.. ఎంసీఎక్స్ (MCX) మార్కెట్‌లో బంగారం ధరలు ప్రస్తుతం కొన్ని కీలకమైన స్థాయిల మధ్య ఊగిసలాడుతున్నాయి. ఎగువ స్థాయిలో రూ. 1,48,500 నుండి రూ. 1,50,000 వరకు గట్టి నిరోధం (Resistance) కనిపిస్తోంది. ధరలు ఈ రూ. 1,50,000 మార్కును దాటి పైన స్థిరపడితేనే మళ్లీ పాత గరిష్టాల దిశగా దూసుకుపోయే అవకాశం ఉంటుంది.

లేనిపక్షంలో అమ్మకాల ఒత్తిడి కొనసాగవచ్చు. ఒకవేళ ధరలు తగ్గడం ప్రారంభిస్తే.. దిగువన రూ. 1,36,000 వద్ద బలమైన మద్దతు (Support) లభిస్తుందని నిపుణులు అంచనా వేస్తున్నారు. ఒకవేళ ఈ స్థాయి కూడా దాటి కిందకు పడిపోతే, ధరలు రూ. 1,28,500 వరకు క్షీణించే ప్రమాదం ఉంది. ఇది ఇన్వెస్టర్లు నిశితంగా గమనించాల్సిన అంశమని చెబుతున్నారు.

ప్రస్తుత పరిస్థితుల్లో మార్కెట్ వ్యూహం విషయానికి వస్తే.. నిపుణులు 'సెల్-ఆన్-రైజ్' (ధరలు పెరిగినప్పుడు అమ్మడం) పద్ధతిని అనుసరించాలని సూచిస్తున్నారు. బలమైన అమెరికా డాలర్, పెరుగుతున్న ట్రెజరీ బాండ్ల రాబడులు బంగారం ధరలపై ఒత్తిడిని పెంచుతున్నాయి. దీనివల్ల బంగారం లాభాలు పరిమితమవుతున్నాయి. అయితే, గత నెల రోజుల్లో Gold ధరలు సుమారు 15 శాతం మేర తగ్గడం వల్ల, దీర్ఘకాలిక పెట్టుబడిదారులకు ఇది ఒక మంచి కొనుగోలు అవకాశంగా కూడా కనిపిస్తోంది. ఏదేమైనా, ఒకేసారి పెద్ద మొత్తంలో కాకుండా, చిన్న చిన్న మొత్తాల్లో విడతల వారీగా పెట్టుబడి పెట్టడం సురక్షితమని విశ్లేషకులు చెబుతున్నారు.

Today Gold Silver Rate Live: భారీగా పతనమైన బంగారం, వెండి ధరలు

రాబోయే రోజుల్లో విడుదలయ్యే అమెరికా ఉద్యోగ గణాంకాలు, వినియోగదారుల విశ్వాసానికి సంబంధించిన డేటా మార్కెట్ దిశను నిర్ణయించడంలో కీలకం కానున్నాయి. ఇరాన్ యుద్ధంపై వచ్చే తాజా వార్తలు మరియు హోర్ముజ్ జలసంధి ద్వారా జరుగుతున్న చమురు రవాణాపై నెలకొన్న ఆంక్షలు బంగారం ధరలను ప్రభావితం చేస్తూనే ఉంటాయి. కావున, ట్రేడర్లు అత్యంత అప్రమత్తంగా ఉండి, స్టాప్-లాస్ (Stop-loss) వంటి జాగ్రత్తలు తీసుకుంటూ లావాదేవీలు నిర్వహించడం ఉత్తమమని చెబుతున్నారు. అంతర్జాతీయ అనిశ్చితి కొనసాగుతున్నంత కాలం బంగారం ధరలలో అస్థిరత తప్పదని మార్కెట్ వర్గాలు భావిస్తున్నాయి.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.