బంగారం ధర తగ్గిందని డబ్బంతా పోసి కొంటున్నారా..అయితే బ్యాకింగ్ రంగ నిపుణులు ఇచ్చే వార్నింగ్ తెలుసుకోవాల్సిందే..

పురాతన కాలం నుంచి బంగారం మనిషి జీవితంలో ఒక ప్రత్యేక స్థానం సంపాదించుకుంది. ఇది కేవలం ఒక లోహం మాత్రమే కాదు, చాలా ఏళ్ల పాటు దీనిని కరెన్సీలా వాడారు. యుద్ధాలు, కరువులు, ఆర్థిక మాంద్యాలు వచ్చినా కూడా బంగారం ఎప్పుడూ తనకున్న విలువను కోల్పోలేదు. అందుకే ప్రపంచవ్యాప్తంగా దీనిని సేఫ్ హావెన్ అని పిలుస్తుంటారు.

భారతదేశం, చైనా వంటి పురాతన నాగరికతలలో బంగారాన్ని శుభప్రదంగా భావిస్తారు. పెళ్లిళ్లు, పండుగలు, ముఖ్యమైన వేడుకలు అన్నీ బంగారం లేకుంటే అసంపూర్ణంగానే ఉంటాయి.ఈ రెండు దేశాలలో ఒకవైపు సంపద నిల్వగా పనిచేస్తే.. మరోవైపు శ్రేయస్సు, గౌరవానికి చిహ్నంగా నిలుస్తుంది. అందుకే చాలా కుటుంబాలు తరతరాలుగా బంగారం కొనుగోలు చేస్తూ వస్తున్నాయి.

గత కొన్ని దశాబ్దాలను మనం చూసుకున్నట్లయితే Gold అద్భుతమైన రాబడిని ఇచ్చింది. ముఖ్యంగా ప్రపంచంలో ఆర్థిక సంక్షోభాలు వచ్చినప్పుడు దీని విలువ అమాంతం పెరిగింది. డాలర్ విలువ తగ్గినప్పుడు బంగారం బలపడుతుంది. కరెన్సీ అస్థిరత ఉన్నప్పుడు పెట్టుబడిదారులకు ఇది అదనపు రక్షణగా నిలుస్తోంది. గత 10 ఏళ్లలో అంతర్జాతీయ మార్కెట్లలో బంగారం ధర దాదాపు మూడు రెట్లు పెరిగింది. భారతదేశంలో రూపాయి విలువ డాలర్‌తో పోలిస్తే పడిపోవడంతో ఈ పెరుగుదల ఇంకా ఎక్కువగా అనిపించింది. కరోనా మహమ్మారి, రష్యా-ఉక్రెయిన్ యుద్ధం, అమెరికాలో రాజకీయ అనిశ్చితి - ఇవన్నీ బంగారం ధరలను మరింత పైకి తీసుకువెళ్లాయి.

ఇక అమెరికా అధ్యక్షుడు డొనాల్డ్ ట్రంప్ పాలనలో వాణిజ్య ఉద్రిక్తతలు పెరగడంతో డాలర్ బలహీనమై, Goldపై పెట్టుబడిదారుల్లో విశ్వాసం పెరిగింది.ఇక కేంద్ర బ్యాంకులు కూడా గత మూడు సంవత్సరాలుగా పెద్ద ఎత్తున బంగారం కొనుగోలు చేస్తున్నాయి. ఫలితంగా గత ఏడాదిలోనే బంగారం ధర దాదాపు 50 శాతం పెరిగింది.

పెట్టుబడి చేసే ముందు తెలుసుకోవాల్సిన విషయాలు: బంగారం ప్రతి పెట్టుబడిదారుడి పోర్ట్‌ఫోలియోలో ఉండాలి అనేది నిపుణుల అభిప్రాయం. అయితే దానిని ఒక్కటే పెట్టుబడి పరిష్కారంగా చూడటం పొరపాటు అని నిపుణులు చెబుతున్నారు. మొత్తం సంపదలో 10-15 శాతం వరకు మాత్రమే బంగారంలో పెట్టుబడి పెట్టడం మంచిదని వారు సూచిస్తున్నారు. ఎందుకంటే బంగారం ఎల్లప్పుడూ పైకి మాత్రమే వెళ్ళదు. కొన్ని సంవత్సరాల్లో దీని పనితీరు బలహీనంగా ఉంటుంది.

గతంలో బంగారం ధరలు సంవత్సరాల తరబడి స్థిరంగా ఉండి, పెద్దగా లాభం ఇవ్వని సందర్భాలు కూడా ఉన్నాయి. అలాగే ఎక్కువ మంది స్పెక్యులేటర్లు దూకుడుగా Gold వర్తకం చేయడం వల్ల నష్టపోయిన సందర్భాలు కూడా ఉన్నాయి. వారెన్ బఫెట్ వంటి పెట్టుబడి దిగ్గజాలు కూడా బంగారాన్ని ఉత్పాదకత లేని ఆస్తిగా పిలుస్తారు. అంటే, షేర్లు లేదా వ్యాపారం లాగా బంగారం కొత్త విలువను సృష్టించదు, కేవలం భద్రతను మాత్రమే ఇస్తుందని అర్థం.

సురక్షిత పెట్టుబడి పద్ధతులు: బంగారాన్ని నేరుగా ఆభరణాల రూపంలో కొనుగోలు చేయడం ఒక మార్గం. అయితే ఈ రోజుల్లో పెట్టుబడిదారులు ఎక్కువగా ETFs (ఎక్స్చేంజ్ ట్రేడెడ్ ఫండ్స్), గోల్డ్ మ్యూచువల్ ఫండ్స్ వంటి ఆధునిక పద్ధతులను ఉపయోగిస్తున్నారు. ఇవి భద్రంగా ఉండటంతో పాటుగా లిక్విడిటీ ఎక్కువగా ఉంటుంది. మార్కెట్ ధరలకు దగ్గరగా లాభనష్టాలను ఇస్తాయి.

క్లుప్తంగా చెప్పాలంటే.. బంగారం ఎప్పటికీ ఆకర్షణ కోల్పోదు. ఇది సంపదకు, శ్రేయస్సుకు, ఆర్థిక భద్రతకు చిహ్నం. అయితే దీన్ని అతిగా కొనుగోలు చేయకుండా, సరిగ్గా ప్రణాళికతో పెట్టుబడి పెట్టాలి. దీర్ఘకాలిక పెట్టుబడిలో బంగారం మీ పోర్ట్‌ఫోలియోకు ఒక రక్షణ గోడలా పనిచేస్తుందని నిపుణులు చెబుతున్నారు.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి