కుప్పకూలిన బంగారం ధర.. 10 గ్రాములు ఏకంగా రూ. 5 వేలకు పైగా ఢమాల్.. కొనుగోలుపై నిపుణులు కీలక సూచన

భారతదేశంలో గత వారం రోజులుగా బంగారం ధరలు భారీ పతనాన్ని నమోదు చేశాయి. గత ఏడాది కాలంగా ఆకాశమే హద్దుగా దూసుకుపోయిన పసిడి ధరలు, ఒక్కసారిగా నేలచూపులు చూడటం అటు కొనుగోలుదారులను, ఇటు మదుపర్లను ఆశ్చర్యానికి గురిచేస్తోంది. మార్చి 16 నుండి 22, 2026 మధ్య కాలంలో చోటుచేసుకున్న ఈ పరిణామాలను గమనిస్తే, ప్రధానంగా అంతర్జాతీయ ఆర్థిక సమీకరణాలే ఇందుకు కారణమని అర్థమవుతోంది.

ప్రస్తుత మార్కెట్ ధరల ప్రకారం 24 క్యారెట్ల బంగారం గ్రాముకు రూ. 595 తగ్గి రూ. 14,002 వద్ద పలుకుతుండగా, 10 గ్రాముల ధర రూ. 5,950 తగ్గి రూ. 1,40,020గా ఉంది. అదేవిధంగా ఆభరణాల తయారీలో ఎక్కువగా వాడే 22 క్యారెట్ల బంగారం గ్రాము ధర రూ.545 తగ్గి రూ. 12,835 వద్ద (10 గ్రాములు రూ. 5,450 తగి రూ. 1,28,350) కొనసాగుతోంది. 18 క్యారెట్ల బంగారం ధర కూడా భారీగా తగ్గి గ్రాముకు రూ. 446 తగ్గి రూ. 10,502 వద్ద స్థిరపడింది. కేవలం ఏడు రోజుల్లోనే 24 క్యారెట్ల బంగారంపై 100 గ్రాములకు రూ. 1.50 లక్షలకు పైగా తగ్గడం ఒక రికార్డుగా చెప్పవచ్చు.

ఎకనామిక్ టైమ్స్ కథనం ప్రకారం.. అంతర్జాతీయ, దేశీయ బంగారం మార్కెట్లలో ప్రస్తుతం చోటుచేసుకుంటున్న పరిణామాలు గత 43 ఏళ్లలో ఎన్నడూ లేని విధంగా ఉన్నాయి. 1983 తర్వాత ఒకే వారంలో పసిడి ధరలు ఇంత భారీ స్థాయిలో పడిపోవడం ఇదే మొదటిసారి కావడం గమనార్హం. గత వారం ముగిసే సమయానికి అంతర్జాతీయ మార్కెట్‌లో ఔన్సు బంగారం ధర దాదాపు 10 శాతం క్షీణించి 4,352 డాలర్ల స్థాయికి పడిపోయింది. ఈ పతనం కేవలం గత వారంతో ఆగకుండా, తాజాగా సోమవారం సెషన్‌లో కూడా కొనసాగుతూ మదుపర్లను ఆందోళనకు గురిచేస్తోంది.

ఈ చారిత్రాత్మక క్షీణతకు ప్రధానంగా మూడు అంతర్జాతీయ కారణాలు కనిపిస్తున్నాయి. మొదటిది, మధ్యప్రాచ్యంలో ఇరాన్ - ఇజ్రాయెల్ మధ్య పెరుగుతున్న ఉద్రిక్తతల కారణంగా ముడి చమురు ధరలు ఒక్కసారిగా 50 శాతం పైగా పెరిగాయి. సాధారణంగా చమురు ధరలు పెరిగితే అది ద్రవ్యోల్బణానికి దారితీస్తుంది. రెండవ కారణం, అమెరికా ఫెడరల్ రిజర్వ్ వైఖరి. ద్రవ్యోల్బణాన్ని అదుపు చేసేందుకు ఫెడ్ వడ్డీ రేట్లను తగ్గించకపోగా, అక్టోబర్ నాటికి వాటిని మరింత పెంచే అవకాశం ఉందనే వార్తలు మార్కెట్‌ను కుదిపేశాయి.

దీనివల్ల వడ్డీ లేని Gold కంటే, స్థిరమైన ఆదాయాన్ని ఇచ్చే డాలర్, బాండ్ల వైపు పెట్టుబడిదారులు మొగ్గు చూపుతున్నారు. మూడవదిగా పెంటగాన్ ఆ ప్రాంతానికి యుద్ధనౌకలను పంపడం వంటి భౌగోళిక రాజకీయ పరిణామాలు మార్కెట్‌లో తీవ్రమైన అస్థిరతను సృష్టించాయి.

ప్రస్తుత తరుణంలో బంగారం ధరలు మరింత పడిపోతాయా లేక ఇది కొనుగోలుకు సరైన సమయమా అనే ప్రశ్నపై మార్కెట్ నిపుణులు భిన్నమైన విశ్లేషణలు అందిస్తున్నారు. ఇండస్‌ఇండ్ సెక్యూరిటీస్, మోతీలాల్ ఓస్వాల్ వంటి సంస్థల విశ్లేషకుల అభిప్రాయం ప్రకారం.. ప్రస్తుతానికి పసిడి ట్రెండ్ బలహీనంగానే కనిపిస్తోంది.

అంతర్జాతీయంగా ఔన్సు Gold ధర 4,250 డాలర్ల స్థాయిని దాటి కిందకు పడిపోతే.. అది 4,100 డాలర్ల వరకు వెళ్లే ప్రమాదం ఉందని వారు హెచ్చరిస్తున్నారు. అదేవిధంగా భారతీయ మార్కెట్ (MCX)లో 10 గ్రాముల బంగారానికి రూ. 1,36,000 వద్ద బలమైన మద్దతు ధర కనిపిస్తోంది. ఒకవేళ ఈ స్థాయిని కూడా కోల్పోతే ధర రూ. 1.30 లక్షల మార్కుకు చేరుకోవచ్చని అంచనా వేస్తున్నారు.

పెట్టుబడిదారులు ప్రస్తుతం వేచి చూసే ధోరణిని అవలంబించడం ఉత్తమమని నిపుణులు సూచిస్తున్నారు. మార్కెట్ తీవ్రమైన హెచ్చుతగ్గులకు లోనవుతున్నందున, ఒకేసారి పెద్ద మొత్తంలో పెట్టుబడి పెట్టడం కంటే, ధరలు తగ్గినప్పుడల్లా కొద్దికొద్దిగా కొనుగోలు చేసే పద్ధతిని (Buy the dip) అనుసరించడం శ్రేయస్కరం. ముడి చమురు ధరలు, యుద్ధ పరిణామాలు స్థిరపడే వరకు పసిడి ధరల్లో స్పష్టత రావడం కష్టమని, కాబట్టి రూ. 1,42,000, రూ. 1,35,000 వంటి కీలక స్థాయిలను నిశితంగా గమనిస్తూ నిర్ణయాలు తీసుకోవాలని చెబుతున్నారు.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.