Gold ETF: ఒక్కరోజే 14% పతనం.. గోల్డ్, సిల్వర్ ఇన్వెస్టర్లకు షాక్! ఇప్పుడు కొనాలా? అమ్మాలా?

అంతర్జాతీయ మార్కెట్లలో గత కొన్ని రోజులుగా ఆకాశమే హద్దుగా దూసుకుపోతున్న పసిడి, వెండి ధరలకు ఒక్కసారిగా బ్రేకులు పడ్డాయి. జనవరి 30న మార్కెట్లలో అనూహ్య పరిణామం చోటుచేసుకుంది. అప్పటివరకు రికార్డు గరిష్టాలను తాకుతూ ఇన్వెస్టర్లకు కాసుల వర్షం కురిపించిన గోల్డ్ ఈటీఎఫ్ లు (Gold ETF), సిల్వర్ ఈటీఎఫ్‌లు (Silver ETF) ఒక్కసారిగా కుప్పకూలాయి. కొన్ని ఈటీఎఫ్‌లు ఏకంగా 14 శాతం వరకు పడిపోవడంతో రిటైల్ ఇన్వెస్టర్లు తీవ్ర ఆందోళనకు గురవుతున్నారు.

ఈ భారీ పతనానికి అసలు కారణమేంటి?

బంగారం, వెండి ధరలు ఈ వారంలోనే ఆల్-టైమ్ రికార్డు గరిష్టాలను తాకాయి. ముఖ్యంగా వెండి ధరలు కేవలం జనవరి నెలలోనే 50 శాతం పైగా పెరిగి సరికొత్త రికార్డు సృష్టించాయి. అయితే ధరలు ఎప్పుడైతే గరిష్ట స్థాయికి చేరాయో.. అప్పుడు పెద్ద ఎత్తున ఇన్వెస్టర్లు తమ లాభాలను వెనక్కి తీసుకోవాలని (Profit Booking) నిర్ణయించుకున్నారు. ఈ అమ్మకాల ఒత్తిడి మార్కెట్‌ లో సునామీలా రావడంతో, ఫిజికల్ గోల్డ్ ధరలతో పాటు వాటిని ట్రాక్ చేసే గోల్డ్ ఈటీఎఫ్ (Gold ETF) ల విలువ కూడా వేగంగా పడిపోయింది.

దీనితో పాటు, అమెరికా ఫెడరల్ రిజర్వ్ (US Fed) తదుపరి చీఫ్ ఎవరనే దానిపై నెలకొన్న ఉత్కంఠ కూడా మార్కెట్లను కలవరపెట్టింది. వడ్డీ రేట్లు పెరగవచ్చనే సంకేతాలు వెలువడటంతో.. వడ్డీ లేని ఆస్తులైన బంగారం కంటే బాండ్లు , డాలర్ వైపు ఇన్వెస్టర్లు మళ్లడం ఈ పతనానికి మరో ప్రధాన కారణం.

దేశీయ మార్కెట్లలో ధరల ఒడిదుడుకులు

దేశీయ ఫ్యూచర్స్ మార్కెట్‌లో (MCX) 10 గ్రాముల బంగారం ధర రూ. 1,93,000 మార్కు నుంచి ఒక్కసారిగా రూ. 1,75,100 కి పడిపోయింది. అంటే కేవలం ఒక రోజులోనే దాదాపు 5 నుంచి 6 శాతం క్షీణత కనిపించింది. ఇక వెండి పరిస్థితి మరింత దారుణంగా ఉంది. కిలో వెండి ధర రూ. 3,75,900 కి చేరుకుంది. వెండిలో అస్థిరత సహజంగానే ఎక్కువగా ఉంటుంది, అందుకే సిల్వర్ ఈటీఎఫ్‌లు.. గోల్డ్ ఈటీఎఫ్ (Gold ETF) ల కంటే రెండింతలు ఎక్కువగా పతనమై ఇన్వెస్టర్లను బెంబేలెత్తించాయి.

ఇన్వెస్టర్లు ఇప్పుడు ఏం చేయాలి? (Buy the Dip?)

ధరలు తగ్గినప్పుడు కొనడం (Buy the dip) అనేది స్టాక్ మార్కెట్‌లో ఒక ప్రాచుర్యం పొందిన సూత్రం. అయితే పసిడి విషయంలో నిపుణులు రెండు రకాల అభిప్రాయాలు వ్యక్తం చేస్తున్నారు:

• లాంగ్ టర్మ్ ఇన్వెస్టర్లు: అంతర్జాతీయ భౌగోళిక రాజకీయ ఉద్రిక్తతలు , ద్రవ్యోల్బణం ఇంకా కొనసాగుతున్నందున.. బంగారం ఎప్పుడూ సురక్షితమైన పెట్టుబడే. ఈ పతనాన్ని ఒక 'హెల్తీ కరెక్షన్'గా భావించి, గోల్డ్ ఈటీఎఫ్ (Gold ETF) లలో ఇన్వెస్ట్ చేయడానికి ఇదొక మంచి అవకాశంగా చూడవచ్చు.
• షార్ట్ టర్మ్ లాభాల కోసం చూసేవారు: ప్రస్తుతానికి మార్కెట్ చాలా అస్థిరంగా ఉంది. కాబట్టి ఇప్పుడు ఉన్నపళంగా పెద్ద మొత్తంలో పెట్టుబడి పెట్టడం ప్రమాదకరం. దీనికి బదులుగా సిస్టమాటిక్ ఇన్వెస్ట్‌మెంట్ ప్లాన్ (SIP) పద్ధతిలో కొద్దికొద్దిగా కొనుగోలు చేయడం వల్ల రిస్క్ తగ్గుతుంది.

మొత్తంగా చూస్తే.. బంగారం, వెండిపై దీర్ఘకాలికంగా డిమాండ్ ఎప్పుడూ ఉంటుంది. ముఖ్యంగా కేంద్ర బ్యాంకులు నిరంతరం బంగారాన్ని కొనుగోలు చేస్తూనే ఉన్నాయి. అయితే స్వల్పకాలికంగా వచ్చే ఇలాంటి ఒడిదుడుకుల వల్ల భయపడి ఆస్తులను అమ్ముకోవడం కంటే ఓపిక పట్టడం మంచిది.

(గమనిక: ఈ వెబ్‌సైట్‌లోని అంశాలు సంబంధిత వ్యక్తుల లేదా విశ్లేషకుల వ్యక్తిగత అభిప్రాయాలు మాత్రమే. ఇవి " Goodreturns.in లేదా Greynium Information Technologies Private Limited " అధికారిక సలహాలు కావు. ఇందులో సమాచారం యొక్క ఖచ్చితత్వానికి మేము ఎలాంటి గ్యారెంటీ ఇవ్వము. మేము స్టాక్ మార్కెట్ పెట్టుబడి సలహాలు లేదా కొనుగోలు/అమ్మకాల సిఫార్సులు చేయము. ఈ కథనాలు కేవలం అవగాహన కోసం మాత్రమే ఉద్దేశించినవి. కాబట్టి, మీరు ఏదైనా పెట్టుబడి నిర్ణయం తీసుకునే ముందు తప్పనిసరిగా మీ ఆర్థిక సలహాదారుని సంప్రదించి తగిన నిర్ణయం తీసుకోగలరు. ఈ కథనాన్ని కేవలం సమాచారంగా మాత్రమే పరిగణించండి.)