బంగారం ధరలు పెరిగినా తగ్గేది లేదంటున్న కొనుగోలుదారులు..వజ్రాలపై పూర్తిగా తగ్గిన ఆసక్తి

ఈ సంవత్సరంలోని పెళ్లి సీజన్ భారత ఆభరణాల మార్కెట్‌లో ఒక్క పెద్ద మార్పుకు వేదికగా మారింది. గత కొన్నేళ్లుగా వజ్రాల ఆభరణాలు ఆధిపత్యం చాటుకున్నా, ఈసారి మాత్రం పసుపు లోహం అంటే బంగారం మరోసారి మెరిసిపోతోంది. బంగారం ధరలు చరిత్రలోనే అత్యధికస్థాయికి చేరినా.. వినియోగదారులు వెనుకడుగు వేయడం లేదు. ప్రస్తుత పరిస్థితిని పరిశీలిస్తే పెళ్లికాని కుటుంబాల ప్రాధాన్యం పూర్తిగా బంగారు ఆభరణాల వైపు మళ్లిందని స్పష్టమవుతోంది.

2025 జనవరిలో 10 గ్రాముల Gold ధర రూ. 78 వేలుగా ఉండగా, ఇప్పుడు అదే బంగారం రూ. లక్షా ఇరవై ఏడు వేలకు పైగా చేరింది. అంటే ఒక సంవత్సరంలోనే 60 శాతానికి పైగా భారీ పెరుగుదల నమోదైంది. ఇదే పరిస్థితి ఏ ఇతర వస్తువులో అంటే వినియోగదారులు కొనుగోళ్లు తగ్గించేవారేమో కానీ బంగారం విషయంలో చిత్రమే వేరుగా ఉంది. ఎందుకంటే పునఃవిక్రయ సమయంలో బంగారం దాదాపు 95 నుంచి 97 శాతం విలువను తిరిగి ఇస్తుంది. దీని పోలికగా, వజ్రాల రీసేల్ విలువ సాధారణంగా 80 నుంచి 90 శాతం మాత్రమే ఉంది. ఈ ప్రాక్టికల్ ప్రయోజనం ప్రజలను బంగారం వైపు మరింతగా ఆకర్షిస్తోంది.

జాయ్ అలుక్కాస్, పిఎన్‌జి, కళ్యాణ్ జ్యువెలర్స్, సెంకో గోల్డ్ వంటి ప్రముఖ ఆభరణాల సంస్థల ప్రకారం.. ప్రస్తుతం 22 క్యారెట్, 18 క్యారెట్, 14 క్యారెట్ లైట్ వెయిట్ డిజైన్లకు విశేష స్పందన లభిస్తోంది. తక్కువ తయారీ ఖర్చు ఉండే నాజూకు నమూనాలు, రోజువారీ ఉపయోగానికి అనువైన శైలులు కొనుగోలుదారుల ప్రధాన ఎంపికలుగా మారాయి. దీంతో బరువైన, ఖరీదైన వజ్రాల ఆభరణాలు ఇప్పుడు రెండో ఎంపికగా మారిపోయాయి.

అంతర్జాతీయంగా వజ్రాల మార్కెట్ తీవ్ర ఒత్తిడిని ఎదుర్కొంటోంది. అమెరికా, చైనా దేశాలలో డిమాండ్ గణనీయంగా పడిపోవడం వల్ల ధరలు స్థిరంగా ఉండిపోయాయి. అదనంగా, ట్రంప్ ప్రభుత్వం పెట్టిన 50 శాతం దిగుమతి సుంకం కారణంగా భారత వజ్రాల ఎగుమతులు దెబ్బతిన్నాయి. దీంతో మార్కెట్లో సరఫరా పెరిగి ధరల పెరుగుదల ఆగిపోయింది. మరోవైపు, చైనాలో పెరుగుతున్న ద్రవ్యోల్బణం కారణంగా ప్రజలు బంగారాన్ని సురక్షిత ప్రత్యామ్నాయంగా ఎంచుకుంటున్నారు.

కాన్ఫెడరేషన్ ఆఫ్ ఆల్ ఇండియా ట్రేడర్స్ (CAIT) అంచనా ప్రకారం.. ఈ సంవత్సరం పెళ్లిళ్ల సంఖ్య 4.8 మిలియన్లకు పైగా చేరొచ్చు. ప్రతి కుటుంబం సంప్రదాయంగా బంగారాన్ని శుభ సూచకంగా భావించడం వల్ల, ఈ భారీ వివాహ వాల్యూమ్ బంగారం విక్రయాలకు అపూర్వమైన లాభాలను తెచ్చిపెట్టనుంది. రిటైలర్లు ఇప్పటికే స్టోర్లలో కొనుగోలుదారుల రద్దీ పెరుగుతోందని చెబుతున్నారు.

ఏదేమైనా ఈ వివాహ సీజన్ పూర్తిగా పసిడి వేడుకగా మారింది. వజ్రం లగ్జరీ, ఫ్యాషన్‌కు గుర్తుగా నిలిచినా, బంగారం విలువ, సంప్రదాయం, పెట్టుబడి భద్రత కలిపిన సమ్మేళనం. కాబట్టి, భవిష్యత్తులో కూడా బంగారం మార్కెట్ మరింత బలపడే అవకాశాలు ఉన్నాయని నిపుణులు విశ్వసిస్తున్నారు.