వచ్చే ఏడాదికి రూ. లక్షా డెబ్భై వేలకు బంగారం ధర, పసిడి పెరుగుదల ఆగదంటున్న నిపుణులు

గత ఐదు సంవత్సరాల నుంచి బంగారం ధరలు ఆకాశాన్ని తాకుతున్నాయి. సెప్టెంబర్ 2020లో 10 గ్రాముల 24 క్యారెట్ Gold ధర రూ. 51,619 ఉండగా, ఇప్పుడు అది రూ. 1,11,000కి పైగా చేరింది. కేవలం ఒక సంవత్సరం క్రితం.. ధర రూ. 72,874 ఉండేది. ఇప్పుడు ఏకంగా రూ. లక్షా 10 వేలు దాటింది. గత ఐదు సంవత్సరాలలో బంగారం ధరలు సుమారు 112 శాతం పెరిగాయి. ఇలాంటి ర్యాలీని చూసి కొంతమంది పెట్టుబడిదారులు లాభాలను సంపాదించుకున్నారు, మరికొంత మంది ఇప్పటికీ ఈ ఉత్పత్తిలో భాగం కావాలని ఆశిస్తున్నారు.

గతంలో బంగారం ధరల పెరుగుదల.. కోవిడ్-19 మహమ్మారి, రష్యా-ఉక్రెయిన్ యుద్ధం, అమెరికా-ప్రపంచ సుంకాలు, భౌగోళిక రాజకీయ అనిశ్చితుల కారణంగా ప్రపంచవ్యాప్తంగా పెట్టుబడిదారులను ఆకర్షించింది. దీంతో equities మార్కెట్ (నిఫ్టీ 50) స్థిరంగా లేకపోవడంతో, పెట్టుబడిదారులు బంగారంలో పెట్టుబడి పెంచేందుకు ఆసక్తి చూపుతున్నారు. గోల్డ్ ETFs ద్వారా కూడా పెట్టుబడిదారుల డిమాండ్ బంగారం ధరలను భారీగా పెంచుతున్నట్టు కనిపిస్తుంది; గత ఏడాది గోల్డ్ ETFs 47 శాతం కంటే ఎక్కువ రాబడిని ఇచ్చాయి.

భవిష్యత్తులో Gold ధర పెరుగుదలకు కొన్ని ప్రధాన అంశాలను మనం చూసినట్లయితే.. కేంద్ర బ్యాంకుల కొనుగోళ్లు, భౌగోళిక రాజకీయ ఉద్రిక్తతలు, అమెరికా డాలర్ స్థిరత్వం, ద్రవ్యోల్బణం, ETF పెట్టుబడులు ముఖ్య పాత్ర పోషించబోతున్నాయి. ఆనంద్ రతి, ట్రేడ్‌జిని నిపుణులు అభిప్రాయం ప్రకారం.. బంగారం ధర సానుకూలంగా ఉండే అవకాశం ఎక్కువ, రాబోయే 1-5 సంవత్సరాల్లో 15-20 శాతం వరకు పెరుగుతుంది. 2026 మధ్యలో 10 గ్రాముల బంగారం ధర రూ. 1,18,000-1,20,000కి, 2-5 ఏళ్లలో రూ. 1,50,000-1,70,000కి చేరవచ్చని అంచనా వేస్తున్నారు.

పెట్టుబడిదారులు ఇప్పుడు సరైన వ్యూహం తీసుకోవాలని సూచిస్తున్నారు. నిపుణుల సలహా ప్రకారం ప్రతి పోర్ట్‌ఫోలియోలో బంగారం 5-10 శాతం వరకు ఉండటం మంచిది. ఇప్పటికే అధికంగా ఉన్నవారికి కొంత భాగాన్ని అమ్మి ఇతర ఆస్తులలో పెట్టుబడి పెట్టడం, తక్కువగా ఉన్నవారికి దానిని క్రమంగా కొనుగోలు చేయడం సురక్షితమైన వ్యూహంగా చెబుతున్నారు.

ఏదేమైనా బంగారం సురక్షిత పెట్టుబడి పద్ధతిగా కొనసాగుతోంది. స్థిరమైన రాబడులు, గ్లోబల్ మార్కెట్ పరిస్థితులు, భౌగోళిక మరియు ఆర్థిక అనిశ్చితి కారణంగా, ఇది రాబోయే సంవత్సరాల్లో పెట్టుబడిదారులకి ఆకర్షణీయంగా మారనుంది. అయితే, ఇలాంటి అంచనాలు మార్పుకు లోబడి ఉంటాయి కాబట్టి, పెట్టుబడిదారులు జాగ్రత్తగా మరియు వివేకవంతంగా నిర్ణయం తీసుకోవాలని సూచిస్తున్నారు.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి