నాలుగు కిలోమీటర్లకు రూ.800.. గోవాలో టాక్సీ మాఫియా దోపిడి.. టూర్లు బంద్ చేసుకుంటున్న పర్యాటకులు..

గోవా పర్యాటక రంగం మరోసారి తీవ్ర చర్చనీయాంశంగా మారింది. దేశ విదేశాల నుండి వచ్చే పర్యాటకులకు స్వర్గధామంగా నిలిచే గోవా, అక్కడ రాజ్యమేలుతున్న 'టాక్సీ మాఫియా' కారణంగా తన ప్రతిష్టను వేగంగా కోల్పోతోంది. స్థానిక టాక్సీ డ్రైవర్ల మితిమీరిన దోపిడీ, పర్యాటకుల పట్ల వారి దురుసు ప్రవర్తన, ప్రభుత్వ యాప్ ఆధారిత సేవల్లోని లోపాలను ఎత్తిచూపుతూ సోషల్ మీడియా వేదికగా పర్యాటకులు వ్యక్తం చేస్తున్న ఆవేదన ఇప్పుడు దేశవ్యాప్తంగా సంచలనం సృష్టిస్తోంది.

తాజాగా ఒక పర్యాటకుడు రెడ్డిట్ (Reddit) వేదికగా పంచుకున్న చేదు అనుభవం గోవాలోని దారుణ పరిస్థితులకు అద్దం పడుతోంది. కేవలం నాలుగు కిలోమీటర్ల స్వల్ప దూర ప్రయాణానికి స్థానిక టాక్సీ డ్రైవర్లు ఏకంగా రూ. 800 డిమాండ్ చేశారని ఆ పర్యాటకుడు ఆరోపించారు. "గోవా టాక్సీ డ్రైవర్లకు అసలు ఏమైంది? ఇంత దోపిడీనా?" అని ఆయన ప్రశ్నించారు. ప్రైవేట్ క్యాబ్‌ల ఆగడాలకు అడ్డుకట్ట వేయడానికి ప్రభుత్వం తీసుకొచ్చిన 'గోవా మైల్స్' (Goa Miles) యాప్ కూడా పూర్తిగా నిరుపయోగంగా మారిందని పర్యాటకులు వాపోతున్నారు.

ఈ యాప్‌లో క్యాబ్ బుక్ చేయాలంటే ముందే వాలెట్‌లో డబ్బులు లోడ్ చేయాల్సి ఉంటుంది. తీరా డబ్బులు యాడ్ చేశాక డ్రైవర్లు రారని, ఆ డబ్బులు మళ్లీ బ్యాంక్ ఖాతాకు వాపసు (రిఫండ్) రావడానికి కనీసం ఎనిమిది పనిదినాలు పడుతుందని నెటిజన్లు తూర్పారబడుతున్నారు. గోవా ఎంతో అందమైన రాష్ట్రమే అయినప్పటికీ, ఈ రవాణా మాఫియా అక్కడి పర్యాటక రంగాన్ని నిలువునా నాశనం చేస్తోందని ఆవేదన వ్యక్తం చేశారు.

ఈ పోస్ట్ సోషల్ మీడియాలో వైరల్‌గా మారడంతో.. భారతదేశంలోని వివిధ ప్రాంతాల నుండి గోవా వెళ్లిన పర్యాటకులు తమకు ఎదురైన ఇలాంటి అనుభవాలను పంచుకుంటున్నారు. ఇక్కడ టాక్సీ సంఘాలు ఏకపక్షంగా ధరలను నిర్ణయిస్తాయని, కస్టమర్లను దింపి తిరుగు ప్రయాణమయ్యే ఖర్చులను కూడా మొదటి కస్టమర్ నుండే వసూలు చేస్తారని కొందరు విశ్లేషించారు. రోజుమొత్తం ఖాళీగా ఉన్నా, కేవలం రెండు మూడు ట్రిప్పులతో పర్యాటకుల నుండి భారీగా డబ్బులు గుంజవచ్చనేది ఈ డ్రైవర్ల వ్యూహంగా కనిపిస్తోంది.

Also Read

బెంగళూరులో ఎబోలా వైరస్ కలకలం.. ఉగాండా నుంచి వచ్చిన మహిళకు వైరస్ లక్షణాలు..

పగటిపూట ప్రయాణించే వారికి ప్రభుత్వం నడిపే 'కేటీసీ ఈవీ షటిల్' (KTC EV Shuttle) బస్సులు అందుబాటులో ఉన్నప్పటికీ, రాత్రి 7:30 గంటల తర్వాత మాత్రం పర్యాటకులు పూర్తిగా ఈ ప్రైవేట్ టాక్సీ డ్రైవర్ల దయాదాక్షిణ్యాలపైనే ఆధారపడాల్సి వస్తోందని ప్రయాణికులు చెబుతున్నారు. ఊబర్ (Uber), ఓలా (Ola) వంటి ప్రముఖ అంతర్జాతీయ క్యాబ్ సర్వీసులను గోవాలోకి రానివ్వకుండా ఈ స్థానిక మాఫియా అడ్డుకుంటోందని, ఇక్కడికి వచ్చే వారు ఎవరైనా స్థానిక డ్రైవర్‌తో స్నేహం చేయడం తప్ప మరో మార్గం లేదని మరికొందరు సలహా ఇస్తున్నారు.

కేవలం అధిక ధరలే కాకుండా, పర్యాటకులపై భౌతిక, మానసిక దాడులకు దిగడం కూడా ఎక్కువైంది. ఈ నెల ప్రారంభంలో నలుగురు పర్యాటకుల బృందం తమ గోవా పర్యటనను మధ్యలోనే రద్దు చేసుకుని వెనుదిరగాల్సి వచ్చింది. ఉత్తర గోవాలో వారు అద్దెకు తీసుకున్న కారును పార్క్ చేస్తుండగా, ఒక స్థానిక క్యాబ్ డ్రైవర్ వచ్చి వారి వాహనాన్ని ఢీకొట్టాడు. తప్పు తనదే అయినప్పటికీ, సదరు డ్రైవర్ పర్యాటకులతో దురుసుగా ప్రవర్తించడమే కాకుండా, క్షణాల వ్యవధిలో మరో నలుగురైదుగురు స్థానిక డ్రైవర్లను అక్కడికి పిలిపించాడు.

అకస్మాత్తుగా వారంతా కలిసి పర్యాటకులను చుట్టుముట్టి బెదిరింపులకు దిగడంతో రోడ్డుపై పెద్ద వాగ్వాదం చోటుచేసుకుంది. దాదాపు అరగంట పాటు సాగిన ఈ ఘర్షణ పర్యాటకులను తీవ్ర భయాందోళనలకు గురిచేసింది. ట్రిప్ యొక్క ఉత్సాహం మొత్తం నీరుగారిపోవడంతో, చివరికి ఆ టాక్సీ మాఫియా అడిగినంత డబ్బు చెల్లించి వారు ప్రాణాలు దక్కించుకోవాల్సి వచ్చింది.

ఈ తరహా బెదిరింపులు, దోపిడీల కారణంగా పర్యాటకులు గోవా వైపు వెళ్లడానికి వెనుకాడే పరిస్థితి వస్తోంది. పర్యాటకమే ప్రధాన ఆదాయ వనరుగా ఉన్న గోవా రాష్ట్ర ప్రభుత్వం, ఇప్పటికైనా ఈ 'టాక్సీ మాఫియా'పై కఠిన చర్యలు తీసుకోకపోతే, భారతదేశ పర్యాటక రాజధానిగా ఉన్న గోవా తన గుర్తింపును పూర్తిగా కోల్పోయే ప్రమాదం ఉందని పర్యాటక రంగ నిపుణులు హెచ్చరిస్తున్నారు.