GMR News: గ్రీస్‌లో జీఎమ్ఆర్ గ్రూప్ పెట్టుబడులు.. ఆ అవకాశం కోసమే..!!

GMR News: జాతీయ అంతర్జాతీయ విమానాశ్రయాల అభివృద్ధిలో జీఎంఆర్ గ్రూప్ ప్రఖ్యాత సంస్థ. భారతీయులకు యూరప్ ముఖద్వారంగా పనిచేసే గ్రీస్ నగరంలో కొత్త పెట్టుబడి అవకాశాల కోసం గ్రూప్ ప్రస్తుతం అన్వేషిస్తోంది. జీఈకే టెర్నా భాగస్వామ్యంతో జీఎంఆర్ గ్రూప్ ఇప్పటికే గ్రీస్ లోని క్రీట్ వద్ద గ్రీన్ ఫీల్డ్ విమానాశ్రయాన్ని అభివృద్ధి చేస్తోంది.

ఇరు దేశాల మధ్య సంబంధాలను బలోపేతం చేసేందుకు భారత ప్రధాని నరేంద్ర మోడీ ఇటీవల హెలెనిక్ దేశాన్ని సందర్శించారు. ఇది 40 ఏళ్లలో ఒక భారత ప్రధాని చేసిన మొదటి పర్యటన. ఈ పర్యటన సందర్భంగా ప్రధాని మోదీ, గ్రీస్ ప్రధాని కైరియాకోస్ మిట్సోటాకిస్ ద్వైపాక్షిక సంబంధాలను వ్యూహాత్మక భాగస్వామ్యానికి, ప్రజల మధ్య బలమైన సంబంధాలను పెంపొందించడంతో పాటు రాజకీయ, భద్రత, ఆర్థిక రంగాల్లో సహకారాన్ని పెంపొందించడానికి కట్టుబడి ఉంటామని తెలిపారు.

గ్రీస్ ప్రధాని ఇచ్చిన బిజినెస్ లీజర్స్ విందులో జీఎంఆర్ గ్రూప్ ఎనర్జీ అండ్ ఇంటర్నేషనల్ ఎయిర్ పోర్ట్స్ తరఫున శ్రీనివాస్ బొమ్మిడాల పాల్గొన్నారు. ముఖ్యంగా కలమట విమానాశ్రయంలో పెట్టుబడుల అవకాశాలను జీఎంఆర్ ఆసక్తిగా అన్వేషిస్తున్నట్లు వెల్లడించారు. 2030 నాటికి ద్వైపాక్షిక వాణిజ్యాన్ని రెట్టింపు చేయాలన్న భారత్, గ్రీస్ ఆశయం ప్రశంసనీయమని అభిప్రాయపడ్డారు. అలాగే జీఈకే టెర్నా సహకారంతో జీఎంఆర్ క్రీట్‌లో అత్యాధునిక గ్రీన్ ఫీల్డ్ ఎయిర్ పోర్టు ప్రాజెక్టును చేపట్టడం ద్వారా పరివర్తనాత్మక ప్రయాణాన్ని ప్రారంభించింది. సుమారు రూ.6,000 కోట్ల పెట్టుబడితో చేపట్టిన ఈ ప్రాజెక్టు అంతర్జాతీయ ప్రయాణ అనుభవాల్లో విప్లవాత్మక మార్పులు తీసుకురానుంది.

గ్లోబల్ ఎయిర్పోర్ట్ ఆపరేషన్స్‌లో అగ్రగామిగా ఉన్న జీఎంఆర్ ఎయిర్‌పోర్ట్స్ ఇన్ఫ్రాస్ట్రక్చర్ లిమిటెడ్ ప్రస్తుతం భారతదేశంతో పాటు అంతర్జాతీయంగా ఆరు విమానాశ్రయాలను నిర్వహిస్తోంది. ఇండోనేషియాలోని మేడాన్, ఫిలిప్పీన్స్ లోని సెబు వరకు విస్తరించిన ఈ సంస్థ నైపుణ్యం గ్రీస్ లోని క్రీట్ ద్వీపంలో అత్యాధునిక విమానాశ్రయ నిర్మాణంలో కూడా స్పష్టంగా కనిపిస్తుంది.