ఏడాది క్రితం ప్రారంభమైన ఈ-ఫైలింగ్ పోర్టల్‌లో ఇప్పటికీ సమస్య

ఈ-ఫైలింగ్ పోర్టల్‌ను తీసుకు వచ్చి ఏడాది గడిచినా సమస్యలు తలెత్తుతూనే ఉన్నాయి. పన్ను చెల్లింపుదారులు ఈ పోర్టల్‌ను యాక్సెస్ చేయడంలో సమస్యలు ఎదుర్కొంటున్నారు. దీనిపై సాఫ్టువేర్ అందిస్తున్న ఇన్ఫోసిస్ తగిన చర్యలు తీసుకుంటున్నట్లు ఆదాయపు పన్ను శాఖ డిపార్టుమెంట్ వెల్లడించింది. ఈ-ఫైలింగ్ పోర్టల్‌లో పన్ను చెల్లింపుదారులు ఇబ్బందులు ఎదుర్కొంటున్న అంశం తమ దృష్టికి వచ్చిందని ఐటీ విభాగం తెలిపింది.

దీనిని ఇన్ఫోసిస్ దృష్టికి తీసుకు వెళ్లామని, పోర్టల్‌లో ట్రాఫిక్ ఎక్కువగా ఉందని, దీనిని నియంత్రించేందుకు చర్యలు తీసుకుంటున్నామని వివరణ ఇచ్చినట్లు ఆదాయపు పన్ను శాఖ విభాగం సామాజిక అనుసంధాన వేదిక ట్విట్టర్ ద్వారా వెల్లడించింది. ఆదాయపు పన్ను ఈ-ఫైలింగ్ పోర్టల్ అభివృద్ధి, నిర్వహణను ఇన్ఫోసిస్‌కు అప్పగించారు.

ఐ-ఫైలింగ్ కోసం ప్రభుత్వం రూ.165 కోట్లు చెల్లించింది. ఈ-ఫైలింగ్ పోర్టల్ గత ఏడాది (2021) జూన్ 7వ తేదీన ప్రారంభమైంది. ప్రారంభంలోను చాలా సమస్యలు తలెత్తాయి. ఇన్ఫోసిస్ ఎప్పటికప్పుడు సమస్యలు పరిష్కరిస్తున్నట్లు చెబుతూ వస్తోంది. అయితే తాజాగా మరోసారి ఇబ్బందులు తలెత్తుతున్నట్లు చెబుతున్నారు.