Digital Payments: ఇండియా శభాష్ అంటున్న జర్మన్ ప్రజలు.. ఎందుకంటే..

Digital Payments: భారత దేశంలో డిజిటల్ మనీ విప్లవం ప్రజల్లోకి విపరీతంగా చొచ్చుకెళ్లినట్లు ఇప్పటికే పలు గణాంకాలు స్పష్టం చేస్తున్నాయి. UPI తరహా చెల్లింపులను చూసి ప్రపంచం ఆశ్చర్యపోతోంది. ఈ ఎకోసిస్టమ్‌ ను అనేక అభివృద్ధి చెందిన ఆర్థిక వ్యవస్థలు నిశితంగా గమనిస్తున్నాయి. తాజాగా సందీప్ మాల్ అనే వ్యక్తి ట్వీట్ చేసిన పోస్ట్ నెట్టింట వైరల్ అవుతోంది. దేశీయ పేమెంట్ సిస్టం గురించి జర్మన్ ప్రజలు ఏమంటున్నారో అందులో వివరించారు.

సోషల్ మీడియా ప్లాట్‌ ఫామ్ ట్విట్టర్ ‌లో ఎంటర్ ప్రెన్యూర్ సందీప్ మాల్ ఓ పోస్ట్ షేర్ చేశారు. డిజిటల్ పేమెంట్స్ విధానం ద్వారా దేశంలో సులభంగా చేస్తున్న చెల్లింపులను చూసి తమ జర్మన్ కస్టమర్ ఆశ్చర్యపడినట్లు వెల్లడించారు. ఇందుకు సంబంధించిన ఓ వీడియోను ఆయన నెటిజన్లతో పంచుకున్నారు. Paytm బాస్ విజయ్ శేఖర్ శర్మను తన పోస్టులో ట్యాగ్ చేశారు.

'నా జర్మన్ కస్టమర్ ‌లతో కలిసి బ్రేక్ ఫాస్ట్ కోసం బయటకు వెళ్లాను. తిన్న తరువాత Paytmని ద్వారా డబ్బు చెల్లించాను. ఇంత సులభంగా, వేగంగా జరిగిన డిజిటల్ పేమెంట్ చూసి వారు ఆశ్చర్యానికి లోనయ్యారు. డిజిటల్ మనీలో భారతదేశం కంటే జర్మనీ 20 సంవత్సరాలు వెనుకబడి ఉందని వారు తెలిపారు. అందుకే @vijayshekhar గారు మీ కోసం దీన్ని రికార్డ్ చేసాను' అని సందీప్ మాల్ తన అనుభవాన్ని పంచుకున్నారు.

ఇండియాలో డిజిటల్ చెల్లింపుల వ్యవస్థ ఏళ్లతరబడి గణనీయంగా విస్తరించింది. ప్రభుత్వ అంచనాల ప్రకారం.. 2022లో రూ.2,050 లక్షల కోట్ల విలువైన 9 వేల కోట్ల డిజిటల్ లావాదేవీలు జరిగాయి. మార్చితో ముగిసిన త్రైమాసికంలో తమ చెల్లింపుల వాల్యూమ్‌ 40 శాతం, నెలవారీ లావాదేవీల వినియోగదారులు 40 శాతం చొప్పున పెరిగినట్లు Paytm పేర్కొంది. దీంతో దాని మాతృ సంస్థ One97 కమ్యూనికేషన్స్ షేర్లు బుధవారం దూసుకుపోయాయి. Paytm మాత్రమే కాక PhonePe, BharatPe వంటి అనేక సంస్థలు ఈ సేవలను అందిస్తున్నాయి.