2026 నాటికే భారీగా ఉద్యోగాల కోత! గాడ్ ఫాదర్ ఆఫ్ AI సంచలన హెచ్చరిక!

కంప్యూటర్ సైంటిస్ట్ జెఫ్రీ హింటన్ తాజా ఇంటర్వ్యూలో ఒక షాకింగ్ విషయాన్ని బయటపెట్టారు. మనం అనుకుంటున్న దానికంటే చాలా వేగంగా AI అభివృద్ధి చెందుతోందని, 2026 నాటికి ఇది "అనేక ఉద్యోగాలను" ప్రభావితం చేస్తుందని ఆయన హెచ్చరించారు. దీనిని ఆయన 'జాబ్‌లెస్ బూమ్' (Jobless Boom) అని పిలుస్తున్నారు. అంటే కంపెనీల ఉత్పాదకత పెరుగుతుంది. కానీ, అక్కడ మనుషులు ఉండరు!

ఆటోమేషన్.. కంపెనీల కొత్త వ్యూహం

ప్రస్తుతం కంపెనీలు 'ఉద్యోగుల సంఖ్య' కంటే 'అవుట్‌పుట్' (Output) కే ఎక్కువ ప్రాధాన్యత ఇస్తున్నాయి. AI టెక్నాలజీ ప్రతి 7 నెలలకు ఒకసారి అప్‌గ్రేడ్ అవుతుండటంతో.. కంపెనీలు భారీ జీతాలు ఇచ్చే మనుషుల కంటే, తక్కువ ఖర్చుతో వేగంగా పనిచేసే ఆటోమేషన్ సాఫ్ట్‌వేర్ల వైపు మొగ్గు చూపుతున్నాయి. ముఖ్యంగా టెక్ సర్కిల్స్‌లో జరుగుతున్న చర్చల ప్రకారం.. రూటిన్ కోడింగ్, టెస్టింగ్, డాక్యుమెంటేషన్ వంటి పనులకు ఇకపై ఫ్రెషర్స్ అవసరం లేకుండానే AI టూల్స్ ద్వారా పని కానిచ్చేస్తున్నారు. దీనివల్ల కంపెనీల ఉత్పాదకత పెరిగినప్పటికీ.. కొత్తగా కెరీర్ ప్రారంభించే వారికి అవకాశాలు సవాలుగా మారుతున్నాయి. జెఫ్రీ హింటన్ హెచ్చరించినట్లుగా ఈ 'టెక్ విప్లవం' జాబ్ మార్కెట్ లో డిమాండ్ సప్లై మధ్య ఉన్న సమతుల్యతను పూర్తిగా మార్చేయబోతోంది.

వైట్ కాలర్ ఉద్యోగాలకే ఎక్కువ ముప్పు?

గతంలో మెషీన్లు వస్తే కేవలం శారీరక శ్రమ చేసే పనులు పోతాయని అనుకునేవారు. కానీ, ఇప్పుడు AI నేరుగా 'వైట్ కాలర్' ఉద్యోగాలపై దాడి చేస్తోంది.

• వేగవంతమైన అభివృద్ధి: ప్రతి 7 నెలలకు ఒకసారి AI తన సామర్థ్యాన్ని రెట్టింపు చేసుకుంటోంది.
• నెలల పని గంటల్లోనే: గతంలో సాఫ్ట్‌వేర్ ఇంజనీర్లు నెలల తరబడి చేసే ప్రాజెక్టులను భవిష్యత్తులో AI కేవలం కొన్ని గంటల్లోనే పూర్తి చేసేస్తుంది.
• తక్కువ మందితో ఎక్కువ పని: సాఫ్ట్‌వేర్ ఇంజనీరింగ్ రంగంలో భారీ ప్రాజెక్టులకు ఇకపై చాలా తక్కువ మంది అవసరం పడతారని హింటన్ స్పష్టం చేశారు.

ఐటీ రంగానికి హెచ్చరిక

భారతదేశంలోని ప్రధాన టెక్ హబ్‌లు అయిన హైదరాబాద్ (Hyderabad), బెంగళూరు (Bengaluru) లో వేలాది మంది సాఫ్ట్‌వేర్ నిపుణులు ఉన్నారు. ఇప్పటికే కొన్ని కంపెనీలు కొత్తగా ఉద్యోగులను తీసుకోవడం తగ్గించి, ఆటోమేషన్ వైపు మొగ్గు చూపుతున్నాయి. కేవలం ఐటీ మాత్రమే కాదు, ఇతర మేనేజ్మెంట్ డేటా సంబంధిత ఉద్యోగాలపై కూడా ఈ ప్రభావం పడనుంది.

సీఈఓలు ఏమంటున్నారు?

అయితే పరిస్థితి అంతా నెగటివ్ గానే లేదు. టెనియో (Teneo) అనే సంస్థ నిర్వహించిన సర్వే ప్రకారం.. 67% మంది సీఈఓలు AI వల్ల ఎంట్రీ లెవల్ ఉద్యోగ నియామకాలు పెరుగుతాయని నమ్ముతున్నారు.

• కొత్త రకం ఉద్యోగాలు: AI ఇంజనీర్లు, ప్రాంప్ట్ ఇంజనీర్లు, AI ఫోకస్డ్ పొజిషన్లకు డిమాండ్ పెరుగుతోంది.
• ప్రొడక్టివిటీ బూస్ట్: కంపెనీలు తమ లాభాలను పెంచుకోవడానికి AI ని ఒక ఆయుధంగా వాడుకుంటున్నాయి.

మనం ఏం చేయాలి?

ప్రస్తుతం ఉన్న పరిస్థితులను ఉద్యోగులు అర్థం చేసుకోవాలి. మార్పు అనివార్యం అని గుర్తుంచుకోవాలి. 2026 లో రాబోయే ఈ మార్పును తట్టుకోవాలంటే, మన నైపుణ్యాలను (Skills) నిరంతరం అప్‌గ్రేడ్ చేసుకోవడమే ఏకైక మార్గం. ముఖ్యంగా టెక్ నిపుణులు కేవలం కోడింగ్‌పైనే కాకుండా AI టూల్స్‌ను ఎలా సమర్థవంతంగా వాడాలో నేర్చుకోవాలి.