భారత వృద్ధి రేటు 15-25 శాతం ప్రతికూలత ఉండవచ్చు

2020-21 ఆర్థిక సంవత్సరానికి గాను మొదటి క్వార్టర్ (ఏప్రిల్-జూన్) వృద్ధి రేటు 15 శాతం నుండి 25 శాతం ప్రతికూలత నమోదు చేస్తుందని ఆర్థిక నిపుణులు అంచనా వేస్తున్నారు. 1996లో క్వార్టర్లీ జీడీపీ ప్రారంభమైనప్పటి నుండి ఇది వరస్ట్ పర్ఫార్మెన్స్ అంటున్నారు. కరోనా కారణంగా ప్రపంచ జీడీపీతో పాటు భారత్ వృద్ధి రేటు కూడా భారీగా పడిపోనుంది. ఇంటర్నేషనల్ మానటరీ ఫండ్ ప్రకారం గ్లోబల్ వృద్ధి 2020లో 4.9 శాతం మేర ప్రతికూలత నమోదు చేస్తుంది.

బ్రిటన్ ఆర్థిక వ్యవస్థ జూన్ త్రైమాసికంలో 21.7 శాతం పడిపోతుందని ఐఎంఎఫ్ నివేదించింది. 2019-20 ఆర్థిక సంవత్సరంలో భారత వృద్ధి రేటు 3.1 శాతంగా నమోదయింది. 2012-13 నుండి ఇది కనిష్టం. ఇప్పుడు ఏకంగా ప్రతికూలత నమోదు చేస్తుందని అంచనా వేస్తున్నారు.

కరోనా మహమ్మారి, లాక్ డౌన్‌తో ఆర్థిక వ్యవస్థపై తీవ్ర ప్రభావం పడింది. దీంతో ఇప్పటికే డిమాండ్, వినియోగం, పెట్టుబడులు క్షీణించాయి. దీనికి తోడు రికార్డ్ క్వార్టర్ ప్రతికూలత నమోదు కావొచ్చునని సర్వే వెల్లడిస్తోంది. ప్రపంచ ఐదో అతిపెద్ద ఆర్థిక వ్యవస్థ జీడీపీ జూన్ క్వార్టర్‌లో 18.3 శాతం మేర క్షీణిస్తుందని రాయిటర్స్ పోల్‌లో ఆర్థికవేత్తలు అంచనా వేశారు.

అంతకుముందు క్వార్టర్‌లో 3.1 శాతం వృద్ధి రేటు నమోదయింది. ఈసారి 18.3 శాతం ప్రతికూలత ఉంటుందని ఆర్థికవేత్తలు అంచనా వేశారు. గత ఎనిమిదేళ్లలో అత్యంత వరస్ట్ రికార్డ్ ఇదే అవుతుంది. అదే సమయంలో రానున్న సెప్టెంబర్ క్వార్టర్‌లో 8.1 శాతం ప్రతికూలత, డిసెంబర్ త్రైమాసికంలో 1 శాతం ప్రతికూలతను అంచనా వేస్తున్నారు. ఈ అంచనాలను చూస్తే ఈ ఆర్థిక సంవత్సరంలో రికవరీ దారుణంగా ఉంటుందని భావిస్తున్నారు.