ముఖేష్ అంబానీని దాటేయడమే కాదు, ప్రపంచ ఆరో కుబేరుడిగా అదానీ

అదానీ గ్రూప్ చైర్మన్ గౌతమ్ అదానీ ప్రపంచ కుబేరుల జాబితాలో ఆరో స్థానానికి ఎగబాకారు. బ్లూమ్‌‍బర్గ్ బిలియనీర్స్ ఇండెక్స్ ప్రకారం అతని సంపద 118 బిలియన్ డాలర్లకు చేరుకుంది. అదానీ ఏప్రిల్ 4వ తేదీన 100 బిలియన్ డాలర్ల క్లబ్‌లోకి చేరారు. తద్వారా టాప్ 10 గ్లోబల్ బిలియనీర్స్ జాబితాలోకి వచ్చారు. 59 ఏళ్ల ఈ సెంటీ బిలియనీర్ ఇప్పుడు 100 బిలియన్ డాలర్లతో ఎలాన్ మస్క్, జెఫ్ బెజోస్, బిల్ గేట్స్ వంటి వారి పక్కన చేరారు.

ఇటీవలి వరకు ఆసియా, భారత్ కుబేరుడిగా రిలయన్స్ అధినేత ముఖేష్ అంబానీ నిలిచారు. ఇప్పుడు గౌతమ్ అదానీ ఆ స్థానాన్ని కైవసం చేసుకున్నారు. ప్రపంచ బిలియనీర్ల జాబితాలో 118 బిలియన్ డాలర్లతో గౌతమ్ అదానీ 6వ స్థానంలో ఉండగా, ముఖేష్ అంబానీ 11వ స్థానంలో ఉన్నారు. తద్వారా ఆసియా కుబేరుడిగా నిలిచారు. అదానీ సంపద మన కరెన్సీలో రూ.9 లక్షల కోట్లు.

వారంలోనే 18 బిలియన్ డాలర్లు పెరగడంతో గూగుల్ వ్యవస్థాపకులు లారీపేజ్, సర్గే బ్రిన్‌లను కూడా దాటేశారు అదానీ. ఈ క్రమంలో దేశంలోనే అత్యంత ధనవంతుడిగా నిలవడమేగాక, టాప్-10లో ఉన్న ఏకైక భారతీయుడిగా నిలిచారు. ఏడాది క్రితం కేవలం 57 బిలియన్ డాలర్ల సంపదతో ఉన్న అదానీ ఈ నెల 4న 100 బిలియన్‌ డాలర్ల క్లబ్‌లోకి తొలిసారిగా ప్రవేశించారు. దీంతో ముకేశ్‌ అంబానీని కూడా వెనక్కినెట్టారు.