gamers: టెక్కీలను తలదన్నేలా గేమర్స్ సంపాదన.. HP నివేదికలో కీలక అంశాలు

gamers: సాంకేతికత అందుబాటులోకి వస్తున్న కొద్దీ సంపాదనా మార్గాలు కూడా పెరిగాయి. దేశంలో గేమ్స్ ఆడుతూ ఆదాయం పొందే వారి సంఖ్య వృద్ధి చెందుతూ వస్తోంది. ఏటా భారీ మొత్తంలో ఆర్జిస్తున్నట్లు నివేదికలు చెబుతున్నాయి.

గతేడాదితో పోలిస్తే ఈసారి గేమింగ్ ద్వారా సంపాదించే ఆదాయంలో గణనీయమైన పెరుగదల నమోదైనట్లు గణాంకాలు సూచిస్తున్నాయి. గేమర్స్‌లో నిబద్ధత కలిగిన 45 శాతం మంది 2023లో 6 నుంచి 12 లక్షల వార్షిక ఆదాయాన్ని ఆర్జించినట్లు HP ఇండియా నివేదిక తెలిపింది. అభివృద్ది చెందుతున్న గేమింగ్ రంగం.. విభిన్న కెరీర్ మార్గాలకు అవకాశం కల్పిస్తోందని వెల్లడించింది.

'ప్రపంచ ఇ-స్పోర్ట్స్ రంగంలో భారతీయ యువత పెద్ద మొత్తంలో రాణిస్తున్నారు. కొత్త గేమింగ్ సంస్థలను స్థాపించే అవకాశాలు, సామర్థ్యం కూడా వారికి ఉన్నాయి' అని HP ఇండియా పర్సనల్ సిస్టమ్స్ సీనియర్ డైరెక్టర్ విక్రమే బేడి పేర్కొన్నారు. దేశంలో 15 నగరాలకు చెందిన 3 వేల మంది గేమర్స్‌పై ఈ సంస్థ సర్వే నిర్వహించింది. దీనిపై తాజాగా రిపోర్ట్ విడుదల చేసింది.

గేమింగ్ అనేది విశ్రాంతి తీసుకునేందుకు అనే పరిస్థితి నుంచి డబ్బు సంపాదించడానికి ఓ సాధనంగా మారింది. స్పాన్సర్‌షిప్‌లు, ఇ-స్పోర్ట్స్ టోర్నమెంట్‌లు ముఖ్యమైన ఆదాయ వనరులుగా నిలిచాయి. కాగా భవిష్యత్తులో ఇన్‌ఫ్లూయెన్సర్‌, ఇ-స్పోర్ట్స్ మేనేజ్‌మెంట్ వంటి కెరీర్ అవకాశాలు సైతం అందిపుచ్చుకునే అవకాశం లభిస్తుంది.