పెట్రోల్, డిజీల్, గ్యాస్ ధరలు ఎప్పుడైనా పెరగవచ్చు.. రూ.30 వేల కోట్ల నష్టాల్లో చమురు కంపెనీలు..ఇక భరించలేమంటూ..

ప్రభుత్వ రంగ చమురు సంస్థలు ఎదుర్కొంటున్న తీవ్ర ఆర్థిక సంక్షోభం, దేశంలో ఇంధన ధరల పెంపుపై ఆందోళన రేకెత్తిస్తోంది. పెట్రోల్, డీజిల్, గృహ వినియోగ ఎల్‌పిజి గ్యాస్‌ను అంతర్జాతీయ మార్కెట్ ధరల కంటే తక్కువకు విక్రయించడం వల్ల చమురు కంపెనీలు నెలకు దాదాపు 30 వేల కోట్ల రూపాయల భారీ నష్టాన్ని చవిచూస్తున్నాయి. గత రెండు నెలలుగా ప్రభుత్వం, Oil మార్కెటింగ్ కంపెనీలు ఈ అదనపు భారాన్ని భరిస్తున్నప్పటికీ, ప్రస్తుత పరిస్థితుల్లో ఈ విధానాన్ని నిరవధికంగా కొనసాగించడం సాధ్యం కాదని అధికారిక వర్గాలు అభిప్రాయపడుతున్నాయి.

పశ్చిమ ఆసియాలో కొనసాగుతున్న యుద్ధం కారణంగా ప్రపంచవ్యాప్తంగా చమురు సరఫరా వ్యవస్థ దెబ్బతిని ధరలు విపరీతంగా పెరిగాయి. జపాన్, స్పెయిన్, ఫ్రాన్స్ వంటి అభివృద్ధి చెందిన దేశాలు ఇప్పటికే పెట్రోల్ ధరలను 30 నుండి 35 శాతం వరకు పెంచినప్పటికీ, భారత్ మాత్రం సామాన్యులపై భారం పడకుండా ఇప్పటివరకు నియంత్రిస్తూ వచ్చింది.

ముడి చమురు ధరల పెరుగుదల గణాంకాలను పరిశీలిస్తే.. ఫిబ్రవరిలో బ్యారెల్‌కు సగటున 69 డాలర్లుగా ఉన్న ధర, గత నెలలో 114.4 డాలర్లకు చేరింది. మే నెలలో కూడా ఇది సగటున 105 డాలర్ల పైన కొనసాగుతోంది. అంతర్జాతీయ మార్కెట్‌లో ధరలు ఎక్కువగా ఉన్నప్పటికీ, దేశీయంగా తక్కువ ధరలకే విక్రయించాల్సి రావడంతో కంపెనీల బ్యాలెన్స్ షీట్లు దెబ్బతింటున్నాయి. దీనికి తోడు అంతర్జాతీయ మార్కెట్‌లో డాలర్‌తో పోలిస్తే రూపాయి విలువ బలహీనపడటం వల్ల ముడి చమురు దిగుమతి ఖర్చులు మరింత పెరిగాయి.

ప్రభుత్వం ఇప్పటికే పెట్రోల్‌పై 13 రూపాయలు, డీజిల్‌పై 10 రూపాయల మేర ఎక్సైజ్ సుంకాన్ని తగ్గించి వినియోగదారులకు కొంత ఉపశమనం కలిగించింది. దీనివల్ల ప్రభుత్వ ఖజానాకు నెలకు 14,000 కోట్ల రూపాయల ఆదాయం తగ్గుతోంది. ఆదాయం తగ్గి, ఖర్చులు పెరుగుతున్న నేపథ్యంలో ప్రభుత్వానికి కూడా ధరల నియంత్రణ విషయంలో వెసులుబాటు తగ్గిపోయింది.

Also Read

ముంచుకొస్తున్న ముడి చమురు ధరల ముప్పు.. హార్ముజ్ జలసంధి మూసివేతతో ప్రపంచ ఆర్థిక వ్యవస్థ ఆగమాగం..

వంటగ్యాస్ సిలిండర్లపై ఇస్తున్న సబ్సిడీ భారం కూడా ప్రభుత్వమే భరించాల్సి వస్తోంది. ఒకవేళ యుద్ధం ఆగిపోయి కాల్పుల విరమణ ప్రకటించినా, అంతర్జాతీయ మార్కెట్‌లో ధరలు స్థిరీకరణకు రావడానికి కనీసం నాలుగు నెలల సమయం పడుతుందని నిపుణులు అంచనా వేస్తున్నారు. ప్రస్తుతం దేశంలో రిటైల్ ద్రవ్యోల్బణం 3.4 శాతంగా ఉన్నప్పటికీ, ఇంధన ధరలు పెంచితే అది రవాణా రంగంపై ప్రభావం చూపి, తద్వారా నిత్యావసర వస్తువుల ధరలు పెరిగి ద్రవ్యోల్బణం మరింతగా ఎగబాకే ప్రమాదం ఉంది.

ఈ చిక్కుముడిని విప్పడం ప్రభుత్వానికి సవాలుగా మారింది. భారత్ పెట్రోలియం, హెచ్‌పిసిఎల్ వంటి సంస్థల మాజీ అధిపతులు కూడా ఇదే అభిప్రాయాన్ని వ్యక్తం చేస్తున్నారు. చమురు కంపెనీలు తమ ఉనికిని కాపాడుకోవాలన్నా, భవిష్యత్తులో పునరుత్పాదక ఇంధన వనరులపై పెట్టుబడులు పెట్టాలన్నా వాటి ఆర్థిక పరిస్థితి మెరుగ్గా ఉండాలి. బలహీనమైన ఆర్థిక స్థితితో కంపెనీలు ముందుకు సాగలేవు. కాబట్టి వినియోగదారులపై ఒక్కసారిగా భారం పడకుండా ఉండేందుకు, ప్రతిరోజూ స్వల్ప మొత్తంలో ధరలను పెంచడం వంటి వినూత్న మార్గాలను ప్రభుత్వం అన్వేషించాల్సిన అవసరం ఉంది. దేశ ఆర్థిక వ్యవస్థ, సామాన్య ప్రజల ప్రయోజనాల మధ్య సమతుల్యతను కాపాడుతూ త్వరలోనే ధరల పెంపుపై ఒక కఠినమైన నిర్ణయం తీసుకునే దిశగా ప్రభుత్వం అడుగులు వేస్తోంది.