12 వేల మంది ఉద్యోగులపై టీసీఎస్ వేటుకు కారణం ఇదే..అట్రిషన్ పెరుగుదల, మార్కెట్లో భయాందోళనలు

టాటా కన్సల్టెన్సీ సర్వీసెస్ (TCS) 2025-26 ఆర్థిక సంవత్సరంలో తన ఉద్యోగ బలాన్ని దాదాపు 2% తగ్గించనున్నట్లు సంచలన ప్రకటన చేసింది. దీని ప్రభావం కంపెనీలో దాదాపు 12,000 మందికిపైగా ఉద్యోగులపై పడనుంది. ఈ ఉద్యోగ తొలగింపుల నిర్ణయం ప్రధానంగా మధ్య, సీనియర్ మేనేజ్‌మెంట్ స్థాయిల్లోని ఉద్యోగులను ప్రభావితం చేస్తుందని టీసీఎస్ కంపెనీ పేర్కొంది.అయితే ఇదేమి కొత్త కాదు.గత కొన్ని త్రైమాసికాలుగా TCSలో ఉద్యోగాల తగ్గింపులు స్థిరంగా పెరుగుతున్నాయి. 2025 ఆర్థిక సంవత్సరం తొలి త్రైమాసికం (Q1 FY25)లో అట్రిషన్ (క్షీణత) రేటు 12.1 శాతంగా ఉండగా, ఇది 2026 ఆర్థిక సంవత్సరం మొదటి త్రైమాసికంలో (Q1 FY26) 13.8 శాతానికి పెరిగింది. ఇది గత రెండేళ్లలో అత్యధికమని చెప్పుకోవచ్చు.

అట్రిషన్ పెరిగే కొద్దీ.. మార్కెట్‌లోనూ దాని ప్రభావం స్పష్టంగా కనిపిస్తోంది. Q3, Q4 FY25లో టీసీఎస్ కంపెనీలో ఉద్యోగుల వలసలు పెరగడంతో.. స్టాక్ ధరలో తక్కువ నుంచి మధ్యస్థాయి వరకూ దిద్దుబాట్లు వచ్చాయి. అలాగే FY25 ప్రారంభంలో అట్రిషన్ తగ్గిన సమయంలో TCS స్టాక్ బలంగా పెరిగిన దాఖలాలు కూడా ఉన్నాయి. అయితే ఇదే సమయంలో.. ఉద్యోగుల తొలగింపుల ప్రకటన మార్కెట్‌లో మరో నెగటివ్ సౌండ్ ను చూపించింది. Q1 FY26లో టీసీఎస్ కంపెనీ స్టాక్ ధర మరింత ఖచ్చితమైన తగ్గుదల చూపించింది. గత ఐదు ట్రేడింగ్ సెషన్లలో TCS షేరు ధర 0.66 శాతం పడిపోయింది. గత నెలలో 9%కిపైగా తగ్గింది. గత ఆరు నెలల్లో 22శాతానికి పైగా తగ్గగా చివరికి గత సంవత్సరంలో 28 శాతం మేర టీసీఎస్ స్టాక్ ధర తగ్గింది.

స్టాక్ మార్కెట్లో తగ్గుదలకు కారణం ఏమిటి? టీసీఎస్ కంపెనీ తెలిపిన వివరాల ప్రకారం.. ఇది ఒక వ్యూహాత్మక పునఃనిర్మాణం. కొత్త సాంకేతికతలు, AI పరిజ్ఞానాన్ని కలుపుకుని సేవలను వేగంగా మెరుగుపరిచే దిశగా వెళ్తోంది TCS కంపెనీ. ఇందుకోసం.. ఉద్యోగులకు ట్రైనింగ్ కూడా ఇస్తోంది. ఎంత చేసినప్పటికీ ఉద్యోగాల కోత మాత్రం తప్పలేదు. రోజు రోజుకు పెరుగుతున్న ఉద్యోగుల అట్రిషన్, షేరు ధర తగ్గుదల మధ్య అవినాభావ సంబంధం కనిపిస్తోంది.

పెట్టుబడిదారులు ఉద్యోగుల స్థిరతను సంస్థ విశ్వసనీయతకు ప్రతీకగా చూస్తున్నారు. ఉద్యోగాల కోతలు, నిర్వహణ మార్పులు, AIకి మార్పులు ఈ అంశాలన్నీ పెట్టుబడిదారుల్లో కొత్త ఆలోచనలకు శ్రీకారం చుడుతున్నాయి. కంపెనీ విశ్వసనీయతపై ఆలోచనలో పడేస్తున్నాయి. అయిన్పటికీ టీసీఎస్ కంపెనీ బలంగా ముందుకు అడుగులు వేస్తోంది. TCS ఈ దశలో ఉద్యోగులను కోల్పోయినా దీర్ఘకాలిక వ్యూహానికి అనుగుణంగా కొత్త ఉద్యోగులతో ముందుకు వెళ్ళే అవకాశం ఉందని నిపుణులు అభిప్రాయపడుతున్నారు. పెట్టుబడిదారుల విశ్వాసాన్ని మళ్లీ గెలుచుకుంటుందని పలువురు విశ్లేషిస్తున్నారు.

వచ్చే ఏడాది వరకూ తమ స్టాఫ్‌లో 1,200 వేల మందిని తొలగించనునట్లు కంపెనీ కీలక ప్రకటన చేసిన సంగతి విదితమే. ఆదివారం మనీ కంట్రోల్ వార్తా సంస్థతో కంపెనీ చీఫ్ ఎగ్జిక్యూటివ్ కే.కృతివాసన్ ఈ వివరాలను వెల్లడించారు. ఐటీ రంగంలో చాలా మార్పులు వస్తున్నాయని.. కృత్రిమ మేధ, ఆపరేటింగ్ మోడల్ మార్పులు ఇలా కొత్త సాంకేతికత పుట్టుకొచ్చిందని తెలిపారు. అందుకు అనుగుణంగానే ఎవరైనా నడుచుకోవాలన్నారు. తొలగించిన వాళ్లకు వేతనంతో పాటు మంచి ప్యాకేజీ ఇస్తామని భరోసా ఇచ్చారు. నోటీస్ పీరియడ్‌ సమయానికి జీతం చెల్లిస్తామన్నారు. వీటితో పాటు ఆరోగ్య బీమాను కొనసాగిస్తూనే వాళ్లు ఇతర సంస్థల్లో ఉద్యోగం సాధించడానికి అవసరమైన సహకారం అందిస్తామని కృతివాసన్ పేర్కొన్నారు.