ఓ నెలలోనే గరిష్టం: రూ.1.1 లక్షల కోట్లు వెనక్కి

కరోనా మహమ్మారి కారణంగా మార్కెట్లు కుప్పకూలుతున్నాయి. దీంతో ఇండియన్ మార్కెట్ నుండి ఫారెన్ పోర్ట్‌పోలియో ఇన్వెస్టర్స్ (FPI) డబ్బులు వెనక్కి తీసుకుంటున్నారు. దేశవ్యాప్తంగా వైరస్ విజృంభించడంతో గత మార్చి నెలలో FPIng ఏకంగా లక్ష కోట్లకు పైగా నిధులను ఉపసంహరించుకున్నారు. మొత్తం రూ.1.18 లక్షల కోట్లు వెనక్కి తీసుకున్నారు.

మార్చి నెలలో ఈక్విటీ మార్కెట్ నుంచి రూ.61,793 కోట్ల నిధుల్ని వెనక్కి తీసుకున్న FPIలు, బాండ్ మార్కెట్ల నుంచి రూ. 56, 211 కోట్లను ఉపసంహరించుకున్నారు. మొత్తం రూ.1,18,184 కోట్లును ఫారెన్ పోర్ట్‌పోలియో ఇన్వెస్టర్స్ తరలించుకుపోయారు. సెప్టెంబర్ 2019 నుంచి వరుసగా ఆరు నెలలుగా వేలాది కోట్ల రూపాయలు పెట్టుబడులు పెట్టిన FPIలు గత నెలలో ఉపసంహరించుకున్నారు.

ఓ నెలలో ఇంత గరిష్ఠ స్థాయిలో వెనక్కితీసుకోవడం ఇదే తొలిసారి. ప్రస్తుత నెలలో జరిగిన తొలి 2 సెషన్లలో రూ.6,735 కోట్లు ఉపసంహరించుకున్నారు. వీటిలో ఈక్విటీల నుంచి రూ.3,802 కోట్లు, డెబిట్ మార్కెట్ల నుంచి రూ.2,933 కోట్లు. కరోనా మహమ్మారితో ప్రపంచ ఆర్థిక వ్యవస్థ కుదేలవుతుండటంతో FPIల నిధుల ఉపసంహరణకు మొగ్గుచూపారని మార్కెట్ నిపుణులు చెబుతున్నారు. 2008లో వచ్చిన ఆర్థిక మాంద్యం కంటే ప్రస్తుతం నెలకొన్న పరిస్థితులు మరీ దారుణంగా ఉన్నాయని చెబుతున్నారు.