Loan Fraud: రూ.30 కోట్ల బ్యాంక్ ఫ్రాడ్.. నలుగురు అధికారుల అరెస్ట్.. పూర్తి వివరాలు..

Loan Fraud: దేశంలో బ్యాంకుల పనితీరు బాగానే ఉంది. కానీ అప్పుడప్పుడూ కొంతమంది అధికారులు మోసాలకు పాల్పడిన వార్తలు వెలుగులోకి వస్తూనే ఉన్నాయి. అలా ఇండియన్ బ్యాంక్‌కు చెందిన నలుగురు సీనియర్ అధికారులు రూ.30 కోట్ల మోసానికి పాల్పడిన విషయం ప్రస్తుతం సంచలనంగా మారింది.

అధికారుల అరెస్ట్..

చెన్నై ఇండియన్ బ్యాంక్‌లో భారీ మోసానికి పాల్పడిన నలుగురు అధికారులకు 3 ఏళ్ల జైలు శిక్ష పడింది. చెన్నైలోని సీబీఐ ప్రత్యేక న్యాయస్థానం నలుగురు బ్యాంకు అధికారులతో పాటు మరో ఇద్దరికి ఒక్కొక్కరికి రూ.10,000 చొప్పున జరిమానా సైతం విధించారు. ఇందులో బ్యాంక్‌ చీఫ్‌ మేనేజర్‌ అజీజ్‌, సీనియర్‌ మేనేజర్‌ జీవీ శ్రీనివాసన్‌, సీనియర్‌ మేనేజర్‌ ముత్తయ్య, జనరల్‌ మేనేజర్‌ ఎస్‌. అరుణాచలం ఉన్నారు.

37 నెలల కఠిన కారాగార శిక్ష..

అదేవిధంగా M/s కిరణ్ ఓవర్సీస్ లిమిటెడ్‌కు చెందిన రంజీవ్ పాత్ర, అతని భార్య కిరణ్ పాత్ర ఒక్కొక్కరికి రూ.10,000 జరిమానాతో 37 నెలల పాటు కఠిన కారాగార శిక్షను అనుభవించాలి. చెన్నై కిరణ్ ఓవర్సీస్ లిమిటెడ్, ఢిల్లీకి చెందిన M/S కిరణ్ ఓవర్సీస్ లిమిటెడ్‌లకు కోర్టు ఒక్కొక్కటి రూ.10,000 జరిమానా విధించింది.

నకిలీ పత్రాలతో..

నిందితులు రుణం కోసం బ్యాంకుకు తప్పుడు, నకిలీ పత్రాలు సమర్పించారని, బ్యాంకు ఆర్థిక ప్రయోజనాలను కాపాడకుండా కొందరు బ్యాంకు అధికారులు రుణం మొత్తాన్ని విడుదల చేశారని విచారణలో తేలింది. నిందితుడి కారణంగా ఇండియన్ బ్యాంక్ రూ.39.18 కోట్ల నష్టాన్ని చవిచూసింది.