ఫారెక్స్ నిల్వల పరుగు, 601 బిలియన్ డాలర్లు దాటిన రిజర్వ్స్

భారత ఫారెక్స్ నిల్వలు గతవారం భారీగా పెరిగాయి. ఈ నిల్వలు 3.854 బిలియన్ డాలర్లు పెరిగి 601.363 బిలియన్ డాలర్లకు చేరుకున్నాయి. దేశంలోని విదేశీ మారకపు నిల్వలు గత నెల 27వ తేదీతో ముగిసిన వారంలో 3.854 బిలియన్ డాలర్లు పెరిగాయని, దీంతో 601.363 బిలియన్ డాలర్లకు చేరుకున్నాయని డేటా వెల్లడిస్తోంది. ఈ మేరకు శుక్రవారం రిజర్వ్ బ్యాంక్ ఆఫ్ ఇండియా(RBI) వారాంతపు గణాంకాలను విడుదల చేసింది.

అంతకుముందు వారం 4.230 బిలియన్ డాలర్లు ఎగిసి 597.509 బిలియన్ డాలర్ల వద్ద ఉన్నాయి. బంగారం నిల్వలు, ఫారెన్ కరెన్సీ అసెట్స్‌ల్లో పెరుగుదల ఇందుకు కారణంగా ఆర్బీఐ తెలిపింది. మే 27వ తేదీతో ముగిసిన వారంలో ఇవి 3.61 బిలియన్ డాలర్లు పెరిగి 536.988 బిలియన్ డాలర్లకు చేరుకున్నాయి. గోల్డ్ రిజర్వ్స్ 94 మిలియన్ డాలర్లు పెరిగి 40.917 బిలియన్ డాలర్లకు చేరుకున్నాయి.

సిక్స్ బాస్కెట్ కరెన్సీలో డాలర్ వ్యాల్యూ అంతకుముందు భారీగా పెరిగింది. అయితే ఇటీవల కాస్త తగ్గుముఖం పట్టింది. ఈ ప్రభావం కూడా ఫారెక్స్ నిల్వలపై ఉంటుంది. ఇదిలా ఉండగా అంతర్జాతీయ మానిటరీ ఫండ్ వద్ద స్పెషల్ డ్రాయింగ్ రైట్స్ (SDRs) 132 మిలియన్లు పెరిగి 18.438 బిలియన్ డాలర్లకు చేరుకున్నాయి.