Patanjali: పతంజలికి మరో షాక్.. ఆ టెస్టులో ప్రొడక్ట్ ఫెయిల్, భారీ జరిమానా

food safety: ఈ మధ్య కాలంలో బాబా రాందేవ్‌కు సంబంధించిన పతంజలికి వరుస ఎదురుదెబ్బలు తగులుతున్నాయి. ప్రకటనలపై ఇటీవల సుప్రీంకోర్టు చివాట్లు పెట్టింది. దీంతో బాబా ఓ మెట్టుదిగి ఎట్టకేలకు క్షమాపణ చెప్పాల్సిన పరిస్థితి ఏర్పడింది. తాజాగా పతంజలికి మరో షాక్ తగిలింది.

ఉత్తరాఖండ్‌ పితోర్‌ఘర్ జిల్లాలోని దీదీహత్ నుంచి సుమారు నాలుగు సంవత్సరాల క్రితం తీసిన పతంజలి ప్యాక్డ్ తేనె నమూనాను జిల్లా ఫుడ్ సేఫ్టీ ఆఫీసర్ RK శర్మ టెస్టింగ్ కోసం సేకరించారు. ఆ పరీక్షలో పతంజలి తేనె విఫలమైంది. దీంతో సంబంధిత డిపార్ట్‌మెంట్ చర్యలకు ఉపక్రమించింది. ఏకంగా లక్ష జరిమానా విధించింది.

ప్యాక్ చేసిన తేనె నమూనా నాణ్యత లేనిదని తేలింది. అందులో సుక్రోజ్ రెట్టింపు కంటే ఎక్కువగా ఉన్నట్లు రిపోర్ట్ వచ్చింది. ప్రామాణిక 5 శాతానికి బదులు రెట్టింపు కంటే ఎక్కువగా 11.1 శాతం ఉన్నట్లు తెలిసింది. ఈ కేసులో దీదీహత్‌లోని విక్రయదారుడికి, రాంనగర్‌కు చెందిన డిస్ట్రిబ్యూటర్ కంపెనీకి అధికారులు ఫైన్ వేశారు.

2020 జూలైలో ఈ నమూనాను సేకరించి రుద్రాపూర్‌లో ల్యాబ్‌కు అధికారులు పంపించారు. ఇక నవంబర్ 2021లో సంబంధిత విక్రేతపై డిపార్ట్‌మెంట్ దావా వేసింది. ఈ వ్యవహారంపై న్యాయమూర్తి జస్టిస్ ఏడీఎం డాక్టర్‌ ఎస్‌కే బరన్‌వాల్‌ తీర్పు చెప్పారు. ఉత్పత్తి విక్రేత కంపెనీకి 40 వేలు, సూపర్ స్టాకిస్ట్ మరో 60 వేలు జరిమానా వేశారు.