హైదరాబాద్‌లో గ్యాస్ సంక్షోభం.. రెస్టారెంట్లు మూత..జోరుగా బ్లాక్ మార్కెట్ దందా..

హైదరాబాద్ నగరంలో గ్యాస్‌ కొరత తీవ్రత కొనసాగుతోంది. పది రోజులుగా LPG సరఫరాలో విఘాతం ఏర్పడడంతో గృహ వినియోగదారులు, వ్యాపార వర్గాలు అన్ని విధాలా కష్టపడ్డారు. హైదరాబాద్ నుంచి మారుమూల జిల్లాల వరకు పరిస్థితి అదుపు తప్పినట్లు కనిపిస్తోంది. గృహ వంట గ్యాస్ బుకింగ్‌లు రెండు మూడు రోజులుగా రెట్టింపు అవుతున్నాయి. అందుకు అనుగుణంగా ఆయిల్ కంపెనీలు ఏజెన్సీలకు స్టాక్ సమయానుగుణంగా పంపించడానికి కసరత్తు చేస్తున్నాయి.

ఇక కమర్షియల్ గ్యాస్ సమస్య ఇంకా తీవ్రంగా ఉంది. హోటళ్లు, రెస్టారెంట్లు, క్యాంటీన్లు రోజువారీ ఐదు నుంచి పది సిలిండర్లు వాడే పరిస్థితిలో ఉంటాయి. అయితే, గ్యాస్ కొరత కారణంగా ఏజెన్సీలు తాత్కాలికంగా బుకింగ్ నిలిపివేసి.. బల్క్ సరఫరాలో అడ్డంకులు సృష్టించాయి. ఫలితంగా నగరంలోని క్లబ్‌లు, హోటళ్లు, రెస్టారెంట్లు పరిమిత మెనూ మాత్రమే అందిస్తున్నాయి. ఎక్కువగా గ్యాస్ వాడే స్వీట్లు, బేకరీ, పాత కూరలు, రొట్టెల తయారీ నిలిపివేయబడ్డాయి. చిన్న టిఫిన్‌ సెంటర్లు కూడా గ్యాస్‌ సమస్య వల్ల మూతపడుతున్నాయి.

హైదరాబాద్ ఐటీ కారిడార్ (మాదాపూర్, కొండాపూర్, గచ్చిబౌలి)లో పరిస్థితి ఇంకా విషమంగా మారింది. హాస్టళ్లలో గ్యాస్ నిల్వలు తక్కువగా ఉండటంతో యాజమానులు పెద్ద సంఖ్యలో వంటలు ఒక్కేసారి వండలేకపోతున్నారు. విద్యార్థులు, యువకులు ప్రత్యామ్నాయం కోసం ప్రయత్నిస్తున్నారు. ఇంటర్ పరీక్షల కారణంగా కొన్ని ప్రైవేట్ రెసిడెన్షియల్ కాలేజీలు తాత్కాలికంగా ఉపశమనం పొందినప్పటికీ, పరిస్థితి త్వరలో సాధారణం కాకపోవచ్చనే అంచనాలు నెలకొన్నాయి.

రంజాన్ వేళలు రావడంతో హోటళ్లు, ఇరానీ కాఫీ హౌసులు పెద్ద సంఖ్యలో పనిచేస్తాయి. కానీ LPG కొరత కారణంగా ప్రాధాన్యంగా బిర్యానీ, హలీమ్, తందూరీ రొట్టెలకే సిలిండర్లు వాడుతున్నారు. రాత్రి 10 గంటల నుంచి తెల్లవారుజాము వరకు పాతబస్తీ, నాంపల్లి, మెహిదీపట్నం, టోలిచౌకీ, సికింద్రాబాద్ వంటి ప్రాంతాల్లో హోటళ్లు కట్టెల పొయ్యిలతో మాత్రమే వంట చేస్తున్నారు. చాయ్, ఇతర తినుబండారాల వినియోగం కూడా తగ్గినట్లు తెలుస్తోంది.

Work from home: గ్యాస్ కొరత ఎఫెక్ట్..! ఉద్యోగులకు మళ్లీ వర్క్ ఫ్రమ్ హోమ్?

ఈ మధ్య బ్లాక్ మార్కెట్ కూడా చురుగ్గా ఉంది. డొమెస్టిక్ సిలిండర్ రూ.965కు అందితే.. కొందరు ఏజెన్సీలు రూ.1200 వరకు విక్రయిస్తున్నట్లు ఫిర్యాదులు వినిపిస్తున్నాయి. కమర్షియల్ గ్యాస్ కూడా దాదాపు రూ.2,050 నుంచి రూ.2,800 వరకు విక్రయిస్తున్నారని సమాచారం ఉంది. LPG, CNG ఆధారిత ఆటోలు, కారు ఫిల్లింగ్‌ కేంద్రాల్లో కిలోమీటర్ల పొడవునా క్యూ లైన్లు ఏర్పడుతున్నాయి. ఐదు రోజుల్లో LPG ధర 50 రూపాయల మేర పెరగడం, పెరుగుతున్న ధరల మధ్య సరఫరా కష్టం ఆటో డ్రైవర్లను ఆందోళనలో ఉంచుతోంది.

రాష్ట్రవ్యాప్తంగా పౌరసరఫరా శాఖ కనీస స్పందన లేకపోవడం పై ఆరోపణలు వినిపిస్తున్నాయి. గ్యాస్ కొరత కారణంగా వంట, హోటల్, రెస్టారెంట్, హాస్టల్, చిన్న వ్యాపారాలపై ప్రభావం తీవ్రమైంది. ప్రజలు, వ్యాపారులు LPG సరఫరా సమస్యకు తక్షణ పరిష్కారం కోసం ప్రభుత్వాన్ని ఎదురుచూస్తున్నారు. ఈ పరిస్థితి రంజాన్ వేళలలో ఆహార సేవలకు కూడా భారీ ప్రతికూల ప్రభావం చూపుతుందని నిపుణులు హెచ్చరిస్తున్నారు.