Zomato News: జొమాటోకి జీఎస్టీ నోటీసులు.. నష్టాల్లో కొనసాగుతున్న షేర్..

Zomato Shares: జూలై నెల మెుదటి రోజున ఫుడ్ డెలివరీ అగ్రిగేటర్ స్టార్టప్ జొమాటో కంపెనీ షేర్లు ఫోకస్ లో కొనసాగుతున్నాయి. దీనికి అసలు కారణం కంపెనీ 2020 ఆర్థిక సంవత్సరానికి గాను జీఎస్టీ అధికారుల నుంచి రూ.9.46 కోట్లకు పన్ను డిమాండ్ నోటీసులు పొందటమే కారణం.

కర్ణాటక వాణిజ్య పన్నుల అసిస్టెంట్ కమిషనర్ తమకు పన్ను డిమాండ్ జారీ చేసినట్లు జొమాటో ఎక్స్ఛేంజీలకు తెలియజేసింది. నోటీసు ప్రకారం జీఎస్టీ బకాయి రూ.5,01,95,462తో పాటు రూ.3,93,58,743 వడ్డీ, జరిమానా రూ.50,19,546 కలిపి మొత్తం రూ.9,45,73,751 జీఎస్‌టీ డిమాండ్‌ను కలిగి ఉంది. దీనిపై కంపెనీ స్పందిస్తూ ఆర్డర్ పై అప్పీలుకు వెళుతున్నట్లు పేర్కొంది. వాస్తవానికి ఇన్‌పుట్ టాక్స్ క్రెడిట్ అధికంగా అందుకున్నందుకు ఈ నోటీసులు అందించబడ్డాయి.

దీనికి ముందు సైతం కంపెనీ జీఎస్టీ అధికారుల నుంచి ఇలాంటి డిమాండ్ నోటీసులను గతంలో కూడా అందుకుంది. భారతదేశం వెలుపల ఉన్న దాని అనుబంధ సంస్థలకు కంపెనీ అందించిన ఎగుమతి సేవల కోసం GST డిమాండ్ రూ.11.82 కోట్ల కోసం ఏప్రిల్ 20న జొమాటో అందుకోగా.. ఏప్రిల్ 1న అదనపు ఇన్‌పుట్ ట్యాక్స్ క్రెడిట్‌ పొందినందుకు రూ.23 కోట్లకు సంబంధించిన మరో పన్ను డిమాండ్‌ను అందుకుంది. సంబంధిత అప్పీలేట్ అథారిటీ ముందు ఈ విషయాన్ని సమర్థించుకోవడానికి తమకు బలమైన మెరిట్స్ ఉన్నట్లు పేర్కొంది. అయితే నోటీసుల వల్ల కంపెనీపై ఎలాంటి ఆర్థిక ప్రభావాన్ని ఆశించడం లేదని జొమాటో స్పష్టం చేసింది.

ఈ వార్తల నేపథ్యంలో నేడు జొమాటో కంపెనీ షేర్లు స్టాక్ మార్కెట్లో ఫోకస్ లో కొనసాగుతున్నాయి. NSEలో జొమాటో షేర్ ధర ఉదయం 10.42 గంటల సమయంలో స్వల్పంగా నష్టంతో రూ.199.66 రేటు వద్ద కొనసాగుతున్నాయి. కొత్త ఫ్యూచర్స్ అండ్ ఆప్షన్స్ రూల్స్ ప్రకారం జొమాటో కంపెనీ షేర్లు నిఫ్టీ-50 సూచీలోకి వస్తాయని తెలుస్తోంది.