రేపటి నుండి నిర్మలమ్మ 2021-22 బడ్జెట్ సంప్రదింపులు

న్యూఢిల్లీ: కేంద్ర ఆర్థికమంత్రి నిర్మలా సీతారామన్ 2021-22 ఆర్థిక సంవత్సరానికి సంబంధించిన కసరత్తు ప్రారంభిస్తున్నారు. బడ్జెట్‌కు ముందు వివిధ రంగాల ప్రతినిధులతో సమావేశమవుతారు. ఇందులో భాగంగా డిసెంబర్ 14, సోమవారం నుండి నిర్మలమ్మ వివిధ వర్గాలతో సమావేశం కానున్నారు. ఈ భేటీలు వర్చువల్‌గా జరగనున్నాయి. ఈ మేరకు ఆర్థిక శాఖ ఓ ప్రకటనలో తెలిపింది.

బడ్జెట్‌ను ఫిబ్రవరి 1వ తేదీన లోకసభకు సమర్పిస్తారు నిర్మలమ్మ. వివిధ వర్గాలతో సమావేశమై, వారి అభిప్రాయాలను సేకరించి, అనంతరం బడ్జెట్‌ను తయారు చేయడం సంప్రదాయంగా వస్తోంది. వివిధ రంగాలకు చెందిన పారిశ్రామిక వర్గాలు, రైతు సంఘాలు, ఆర్థిక వేత్తలు భేటీ అవుతారు. వీరి అభిప్రాయాలు తీసుకున్న అనంతరం ప్రధాని మోడీతో వీటిపై చర్చిస్తారు.

కరోనా మహమ్మారి కారణంగా 2020-21 ఆర్థిక వ్యవస్థ తుడిచి పెట్టుకుపోయింది. ఈ ఏడాది మార్చి చివరి వారం నుండి లాక్ డౌన్ కారణంగా ఆర్థిక కార్యకలాపాలు నిలిచిపోయాయి. దీంతో మొదటి త్రైమాసికంలో జీడీపీ మైనస్ 23.9 శాతంగా నమోదయింది. రెండో త్రైమాసికంలో మైనస్ 7.5 శాతంగా నమోదయింది. పూర్తి ఆర్థిక సంవత్సరానికి ప్రతికూలంగానే ఉంటుందని అంచనాలు ఉన్నాయి. ఈ నేపథ్యంలో వచ్చే ఏడాది బడ్జెట్ కీలకంగా మారింది.