ఈ ఆర్థిక సంవత్సరానికి ద్రవ్యలోటు 7.9 శాతం: ఎస్బీఐ అంచనా

ప్రస్తుత ఆర్థిక సంవత్సరంలో ద్రవ్యలోటు రెండింతలకు పైగా పెరిగి 7.9 శాతానికి చేరుకునే అవకాశముందని SBI రీసెర్చ్ విభాగం తన నివేదికలో తెలిపింది. కరోనా ప్రభావంతో డీలాపడిన ఆర్థిక వ్యవస్థలో ఉత్తేజం నింపేందుకు ప్రభుత్వం రూ.20 లక్షల కోట్ల ప్యాకేజీ ప్రకటించిన విషయం తెలిసిందే. ఈ నేపథ్యంలో ఈ నివేదికను విడుదల చేసింది. అంతకుముందు అంచనా ప్రకారం 2020-21 ద్రవ్యలోటు 3.5 శాతం నమోదు కావొచ్చునని తెలిపింది.

గతంలో 3.5 శాతంగా అంచనా వేసిన ద్రవ్యలోటును తాజాగా 7.9 శాతంగా అంచనా వేసింది. ఉద్దీపన చర్యలకు వెచ్చించే నిధులతో పాటు అంతకుముందు, ఇప్పుడు ఎక్సైజ్ సుంకాన్ని పెంచడం, డీఏ చెల్లింపు నిలిపివేత వంటి అంశాలను పరిగణలోకి తీసుకొని ఈ సంవత్సరానికి ప్రాథమిక ద్రవ్యలోటును అంచనా వేస్తూ 7.9 శాతానికి సవరిస్తున్నట్లు తెలిపింది.

ఆదాయం తగ్గడం, అధిక వ్యయాల దృష్ట్యా ఇలా అంచనా వేసినట్లు తెలిపింది. అంతకుముందు వేసిన అంచనా ఆధారంగా చేస్తే ప్రాథమిక ద్రవ్యలోటు జీడీపీలో దాదాపు 7.1 శాతంగా నమోదు కావొచ్చునని తెలిపింది. కేంద్ర ప్రభుత్వం రూ.20 లక్షల కోట్ల ప్యాకేజీని ప్రకటించిన విషయం తెలిసిందే.