ITR News: ఓల్డ్ ట్యాక్స్ రెజీమ్‌ను రద్దు చేయనున్న కేంద్రం.. నిపుణులు ఏమంటున్నారంటే..

Income Tax News: పన్ను చెల్లింపులు, ITR ఫైలింగ్‌ వ్యవహారం ఇటీవలే ముగిసింది. గడువు తేదీ పూర్తి కావడంతో ఈ తతంగానికి శుభం కార్డు పడింది. అయితే ఫైల్ అయిన ITR డేటాను పరిశీలిస్తే కీలక విషయాలు వెలుగులోకి వస్తున్నాయి. ప్రభుత్వం భవిష్యత్ ప్రణాళిక క్లియర్ కట్‌గా అర్థమవుతోంది.

గతేడాది జూలై నెలాఖరు నాటికి 6.77 కోట్ల ITRలు దాఖలు కాగా.. ఈ సంవత్సరం ఆ సంఖ్య 7.5 శాతం పెరిగి 7.28 కోట్లకు చేరింది. ఈ ఏడాది కొత్త పన్ను విధానాన్ని ఎంచుకున్న వారి సంఖ్య గణనీయంగా పెరగడంతో, వచ్చే సంవత్సరం నుంచి పాత పన్ను విధానాన్ని నిలిపివేయాలని ఆర్థిక మంత్రిత్వ శాఖ యోచిస్తున్నట్లు నిపుణులు భావిస్తున్నారు.

'ట్యాక్స్ పేయర్స్ డేటాను పరిశీలిస్తే వారిలో 72 శాతం కొత్త పన్ను విధానాన్ని స్వీకరించారు. ప్రభుత్వం కూడా బడ్జెట్ ప్రసంగంలో పాత పన్ను విధానంలోని వారికి ఎటువంటి బెనిఫిట్ ప్రకటించలేదు. వీటన్నిటినీ కలిపిచూస్తే త్వరలో పాత పన్ను విధానాన్ని సర్కారు రద్దు చేస్తుందనడానికి ఇదో పెద్ద సూచన' అని చార్టర్డ్ అకౌంటెంట్ అంకిత భార్గవ తెలిపారు.

'పన్ను చెల్లింపుదారులు కొత్త పన్ను విధానంలోకి మారాలని ప్రభుత్వం కోరుకుంటున్నట్లు ఈ బడ్జెట్ సూచిస్తోంది. పాతపన్ను విధానంలో కేవలం 28 శాతం మంది ఉండటంతో వచ్చే ఏడాది నాటికి ఆర్థిక మంత్రి పాత విధానాన్ని పూర్తిగా రద్దు చేసినా ఆశ్చర్యపోనవసరం లేద' అని గార్గ్ అసోసియేట్స్ భాగస్వామి, టాక్స్ ప్రొఫెషనల్ సచిన్ సాహ్ అభిప్రాయపడ్డారు.

జూలై 31 నాటికి మొదటిసారి రిటర్న్ దాఖలు చేసినవారు 58.57 లక్షలుగా ఉన్నట్లు ఆదాయపు పన్ను శాఖ తెలిపింది. ఈ ఏడాది ITR ఫారమ్స్ ITR-1, ITR-2, ITR-4, ITR-6లు ఆర్థిక సంవత్సరం మొదటి రోజు 01.04.2024న ఇ-ఫైలింగ్ పోర్టల్‌లో పొందుపరచబడ్డాయి. గత సంవత్సరాలతో పోల్చితే ITR-3 మరియు ITR-5 కూడా ముందుగానే విడుదల చేసినట్లు గుర్తు చేసింది. దీనితోపాటు పాత మరియు కొత్త పన్ను విధానాల గురించి ట్యాక్స్ పేయర్స్‌కు అవగాహన కల్పించడానికి ప్రాధాన్యత ఇచ్చినట్లు చెప్పింది. ఇవన్నీ పన్ను బేస్ విస్తృతం కావడానికి కారణమని పేర్కొంది.