UCO Bank: యూకో బ్యాంక్ ఉదంతంపై ఆర్థికశాఖ అలెర్ట్.. PSU బ్యాంకులకు కీలక ఆదేశాలు

UCO Bank: అమెరికా, చైనా వంటి అగ్రదేశాల బ్యాంకింగ్ రంగం అతలాకుతలం అయిన వేళ.. భారత బ్యాంకింగ్ వ్యవస్థ మెరుగ్గా రాణించింది. అయితే అడపాదడపా సంభవించే కొన్ని అనూహ్య పరిణామాలు.. బ్యాంకుల పట్ల సామాన్యులకు ఉన్న నమ్మకం పోయేలా చేస్తున్నాయి. ఇటువంటి సంఘటనే ఒకటి ఇటీవల యూకో బ్యాంక్ ద్వారా అనుభవం అయింది.

కోల్‌కతా బేస్డ్ యూకో బ్యాంక్ లో ఇటీవల ఓ భారీ పొరపాటు దొర్లింది. దాదాపు 820 కోట్ల విలువైన తప్పిదమిది. IMPS ద్వారా అనేక మంది ఖాతాదారుల అకౌంట్లకు అనుకోకుండా నగదు జమైంది. వెంటనే స్పందించిన బ్యాంకు యాజమాన్యం FIR దాఖలు చేసి రాష్ట్ర పోలీసులను అప్రమత్తం చేసింది. దీనితో పాటు CBI దర్యాప్తును సైతం కోరింది.

తప్పుగా జమ అయిన మొత్తంలో దాదాపు 649 కోట్లను బ్యాంక్ విజయవంతంగా తిరిగి తెచ్చుకోగలిగింది. మిగిలిన 171 కోట్లను రికవరీ చేయాల్సి ఉంది. దీంతో IMPS సేవలను తాత్కాలికంగా నిలిపివేసేందుకు చర్యలు చేపట్టింది. అయితే NEFT సహా ఇతర లావాదేవీలు సాధారణంగానే పనిచేస్తున్నట్లు ప్రకటించింది. ఇది మానవ తప్పిదం లేదా సైబర్ దాడి వల్ల జరిగి ఉండవచ్చని అందరూ భావిస్తున్నారు.

ఈ ఘటనతో బ్యాంకుల డిజిటల్ సెక్యూరిటీపై అనుమానాలు తలెత్తాయి. దీంతో ఆయా బ్యాంకులు తమ సిస్టమ్స్ పై సమగ్ర సమీక్ష నిర్వహించాలని ప్రభుత్వ యాజమాన్యంలోని బ్యాంకులను ఆర్థిక మంత్రిత్వ శాఖ ఆదేశించింది. సంభావ్య బెదిరింపులకు ఎదుర్కొనేందుకు సైబర్ భద్రతను పటిష్ఠం చేసుకోవాలని సూచించింది.