Go First News: ఎట్టకేలకు గో ఫస్ట్ విమానాలకు మోక్షం.. హైకోర్టు ఆదేశాలతో DGCA చర్యలు

Airlines News: అత్యంత చవకైన విమానయాన సంస్థగా గో ఫస్ట్ ఓ వెలుగు వెలిగింది. అయితే సమస్యలు చుట్టుముట్టడంతో దాదాపు కనుమరుగైంది. అయితే ఎట్టకేలకు ఆ సంస్థ విమానాలపై నియంత్రణ సంస్థ ఓ నిర్ణయానికి వచ్చింది. ఢిల్లీ హైకోర్టు ఆదేశాలతో చర్యలు చేపట్టింది. దీంతో దాదాపు ఏడాది తర్వాత మళ్లీ ఈ వ్యవహారం ప్రాధాన్యత సంతరించుకుంది.

తాజాగా లీజుదారుల డీ-రిజిస్ట్రేషన్ దరఖాస్తులను 5 పనిదినాల్లోగా ప్రాసెస్ చేయాలని ఢిల్లీ హైకోర్టు న్యాయమూర్తి తారా వితస్తా గంజు DGCAను ఆదేశించారు. దీనితోపాటు లీజుదార్ల విమానాలు తిరిగి ఎగిరేందుకు, విమానాశ్రయాల యాక్సెస్ కల్పించేందుకు చర్యలు తీసుకోవాలని DGCAతో పాటు ఎయిర్‌పోర్ట్ అథారిటీ ఆఫ్ ఇండియా (AAI)కి సూచించారు.

న్యాయస్థానం ఆదేశాల మేరకు 'గో ఫస్ట్‌'కు చెందిన చాలా విమానాల నమోదును సివిల్ ఏవియేషన్ రెగ్యులేటర్ (DGCA) రద్దు చేసింది. ఆ ఎయిర్‌లైన్స్ సంస్థ ఫ్లీట్‌లో 54 విమానాలు ఉండగా.. అవికాస్తా గతేడాది మే 3 నుంచి నిలిపివేయబడ్డాయి. సంక్షోభానికి ముందు ఇంజిన్ సమస్యల కారణంగా కేవలం 24 విమానాలను మాత్రమే నడిపించింది. ప్రయాణీకులకు సైతం ఇబ్బందులు కలిగించడంతో ఎట్టకేలకు స్వచ్ఛంద దివాళాకు ముందుకొచ్చింది.

దీంతో గో ఫస్ట్‌కు తమ విమానాన్ని లీజుకు ఇచ్చిన వారు తమ విమానాలను వెనక్కి ఇవ్వాలంటూ కోర్టును ఆశ్రయించారు. దీంతో కోర్టు ఇప్పుడు తన నిర్ణయం తెలియజేసింది. DGCA మొత్తం 54 ఎయిర్‌క్రాఫ్ట్‌లను డీ-రిజిస్టర్ చేసిందని అధికారులు చెబుతుండగా, రెగ్యులేటర్ వెబ్‌సైట్‌లో కొన్ని నోటీసులు మాత్రమే అప్‌లోడ్ చేయబడ్డాయి.