హోంలోన్, డిస్కౌంట్... యస్ బ్యాంకు అదిరిపోయే పండుగ ఆఫర్లు

దసరా, దీపావళి పండుగ సీజన్‌ను దృష్టిలో పెట్టుకొని ప్రభుత్వ, ప్రయివేటు బ్యాంకులు తమ కస్టమర్లకు ఆఫర్లు, డిస్కౌంట్లు, క్యాష్ బ్యాక్ ప్రకటిస్తున్నాయి. యస్ బ్యాంకు కూడా ఆఫర్లు ఇచ్చింది. ప్రాసెసింగ్ ఫీజులో రాయితీ, తక్కువ ఈఎంఐలు, గిఫ్ట్ వోచర్లు, క్యాష్ బ్యాక్ ఆఫర్లు అందిస్తోంది. ఇప్పటికే ఎస్బీఐ, హెచ్‌డీఎఫ్‌సీ, ఐసీఐసీఐ, యాక్సిస్ బ్యాంకు పండుగ ఆఫర్లు ప్రకటించాయి. హోమ్ లోన్ నుండి వాహనాల లోన్ వరకు యస్ బ్యాంకు పలు ఆఫర్లు ప్రకటించింది. ఇబ్బందులు లేని పర్సనల్, బిజినెస్, వెహికిల్ లోన్ ఇస్తోంది.

వెహికిల్ లోన్

కార్ల కొనుగోలుకు 7.99 శాతం వడ్డీ రేటు నుండి రుణాలు అందిస్తోంది. ఆన్‌రోడ్ ధరపై 100 శాతం రుణాలు ఇస్తోంది. 8 ఏళ్ల కాలపరిమితితో వడ్డీ అందిస్తోంది. యూజ్డ్ కార్ల పైన వ్యాల్యూ ఆధారిత వంద శాతం రుణాలు ఇస్తోంది. ఆరేళ్ల కాలపరిమితిపై 10.49 శాతం వడ్డీ రేటును అందిస్తోంది. బైక్స్ పైన 10.99 శాతం వడ్డీ రేటుతో 12 నెలల నుండి 84 నెలల కాలపరిమితి ఉంది. టూవీలర్, ఆటో, బిజినెస్ లోన్స్ పైన ఫ్లెక్సిబుల్ పేమెంట్ ప్లాన్స్ అందుబాటులో ఉన్నాయి.

పర్సనల్ లోన్.. హోమ్ లోన్..

రూ.50 లక్షల వరకు పర్సనల్ లోన్‌పై అత్యధికంగా 72 నెలల కాలపరిమితిపై 10.45 శాతం వడ్డీ రేటు అందిస్తున్నట్లు తెలిపింది.

నెలకు రూ.9,000 ఆదాయం వచ్చే వారికి అందుబాటు ధర నివాసాల కొనుగోలుకు రుణాలు అందిస్తామని, ప్రధానమంత్రి ఆవాస్ యోజన కింద రూ.2.67 లక్షల సబ్సిడీ కూడా పొందవచ్చునని తెలిపింది.

గోల్డ్ లోన్

గోల్డ్ లోన్ పైన కూడా వడ్డీ రేటు ఆఫర్ ఉంది. బంగారు ఆభరణాల తాకట్టుపై రుణాలను 10.99 శాతం వడ్డీ రేటుపై పొందవచ్చు. బంగారం విలువలో 90 శాతం మొత్తం రుణంగా ఇస్తున్నట్లు తెలిపింది. బిజినెస్ లోన్స్ పైన 15.75 శాతం వడ్డీ ఇస్తున్నట్లు వెల్లడించింది.

క్రెడిట్ కార్డ్స్ పైన ఆకర్షణీయ రివార్డు పాయింట్ ప్రయోజనాలు ఉన్నాయి.