తప్పుడు వార్తలపై కఠిన చట్టం.. యూజర్లకు నోటీసులిచ్చిన ఫేస్‌బుక్!

తప్పుడు వార్తలపై ఫేస్‌బుక్ కొరడా ఝుళిపిస్తోంది. తప్పుడు వార్తల వ్యాప్తిని తీవ్రంగా పరిగణిస్తోంది. సింగపూర్ ప్రభుత్వం తప్పుడు వార్తల విషయంలో కఠిన చట్టం తీసుకురావడంతో స్పందించిన ఫేస్‌బుక్ మొట్టమొదటిసారిగా ఒక తప్పుడు పోస్టుకు సవరణ నోటీసు జారీ చేసింది.

వాక్ స్వాతంత్ర్యాన్ని కాపాడేందుకు సింగపూర్ ప్రభుత్వం తాజాగా ఒక చట్టాన్ని తీసుకొచ్చింది. ఓ తప్పుడు వార్తకు సంబంధించి ఫేస్‌బుక్‌కు తెలియజేయడంతో ఫేస్‌బుక్ స్పందించి ఆ మేరకు ఆ తప్పుడు పోస్టును ప్రచురించిన యూజర్‌కు నోటీసు జారీ చేసింది. అయితే ఇది సదరు ఫేస్‌బుక్ ఖాతాదారునికే తప్ప.. సింగపూర్‌లోగాని, సింగపూర్ బయటగాని ఇతర ఫేస్‌బుక్ ఖాతాదారులకు కనిపించదు.

'' ఈ పోస్టులో అసత్య సమాచారం ఉన్నట్లు సింగపూర్ ప్రభుత్వం పేర్కొంటోంది. కాబట్టి తప్పు జరిగినట్లు మీకు చెప్పాల్సిన బాధ్యత చట్టపరంగా ఫేస్‌బుక్‌ది..'' అంటూ ఆ నోటీసులో యూజర్‌ని ఉద్దేశించి పేర్కొంది. సదరు పోస్టు కిందే ఎంబెడ్ చేసిన ఈ నోటీసు సింగపూర్‌లోని కొంతమంది ఫేస్‌బుక్ ఖాతాదారులకు అందింది.

ఈ విషయమై సింగపూర్ ప్రభుత్వ ప్రతినిధి కూడా స్పందించారు. దీనిపై మాట్లాడుతూ ''కొత్త చట్టం ఇప్పుడే అమలులోకి వచ్చింది. ఈ చట్టం కారణంగా భావ ప్రకటనా స్వేచ్ఛకు ఎలాంటి ఇబ్బందీ రానీయం.. అయితే సింగపూర్ కొత్త చట్టం ప్రకారం ఆయా తప్పుడు పోస్టుల కింద ఫేస్‌బుక్ ఈ రకమైన నోటీసును అనుసంధానం చేయాల్సి ఉంటుంది. ఆయా తప్పుడు పోస్టులలోని విషయాలు అసత్యాలని సింగపూర్ ప్రభుత్వం పేర్కొంటున్నట్లుగా ఆ నోటీసుల్లో ఫేస్‌బుక్ పేర్కొనాల్సి ఉంటుందని చెప్పారు.