మధ్యతరగతి vs ధనవంతుల ఆస్తి కొనడంలో అసలు తేడా ఇదే! రియల్ ఎస్టేట్ సీక్రెట్ చెబుతున్న నిపుణులు

మనలో చాలా మందికి జీవితంలో ఒక పెద్ద కల అంటే మన సొంత ఇల్లు ఉండాలి, మన పేరు మీద ప్లాట్ ఉండాలి అన్నదే. చాలా మంది చిన్నప్పటి నుంచే ఈ లక్ష్యానికే డబ్బు సేవ్ చేస్తూ, EMIలు కట్టి, లేదా హోమ్ లోన్ తీసుకోవడానికి సిద్ధమవుతుంటారు. మనం ఇల్లు కొంటే భద్రత కలుగుతుందని, ఒక స్థిరత్వం వస్తుందని నమ్ముతాం. కానీ ఆసక్తికరమైన విషయం ఏమిటంటే ధనవంతుల ఆలోచన మాత్రం మన దానికంటే పూర్తిగా భిన్నంగా ఉంటుంది.

వారు ఇల్లు లేదా స్థలం కొంటే, దానిని "సొంతం చేసుకోవడానికి" కాదు, దానిని "స్థానం కల్పించడానికి" (positioning) ఉపయోగిస్తారు. అంటే, వారు ఆ ఆస్తిని ఎలా ఉపయోగిస్తే అది భవిష్యత్తులో ఇంకా ఎక్కువ విలువను, అవకాశాలను, లేదా రాబడులను తెచ్చిపెడుతుందో దానిపై ఆలోచిస్తారు. మనం ఇల్లు కొంటే "ఇది నా ఇల్లు" అని భావిస్తాం. కానీ ధనవంతులు ఇల్లు కొంటే "ఇది నా ఆస్తి ద్వారా వచ్చే అవకాశాల ప్రారంభం" అని చూస్తారు. ఇది రియల్ ఎస్టేట్ సలహాదారు "ఐశ్వర్య శ్రీ కపూర్" చెప్పిన ఆసక్తికరమైన పాయింట్. ఆమె Threads‌లో చేసిన పోస్ట్‌లో, రియల్ ఎస్టేట్‌ను కేవలం ఇన్వెస్ట్‌మెంట్ గా కాకుండా, ఒక వెల్త్ బిల్డింగ్ ఆర్కిటెక్చర్ గా ఎలా ఉపయోగించాలో వివరించారు.

కపూర్ చెప్పినట్టుగా, ధనవంతులు మరియు సాధారణ కొనుగోలుదారుల మధ్య ఉన్న అసలు తేడా వారి ఆలోచన విధానంలోనే ఉంటుంది. సాధారణంగా మనం ఒక ఆస్తి కొంటే, "ఇది ఐదేళ్లలో రెట్టింపు అవుతుందా?" అని ఆలోచిస్తాం. కానీ ధనవంతులు మాత్రం "ఈ ఆస్తి ఐదేళ్లలో నాకు ఏమి లాభం తెస్తుంది?" అని ఆలోచిస్తారు. అంటే మనం ధర పెరుగుదలపై దృష్టి పెడతాం, కానీ వారు ఆ ఆస్తి ద్వారా కొత్త అవకాశాలు ఎలా తెరుచుకుంటాయో చూస్తారు. ఉదాహరణకు దాన్ని లీజుకు ఇవ్వడం ద్వారా రెంటల్ ఇన్కమ్ పొందడం, దానిపై రుణం తీసుకుని మరో ఇన్వెస్ట్‌మెంట్ చేయడం, లేక ఆ భూమిని అభివృద్ధి చేసి ఎక్కువ విలువ సృష్టించడం వంటి మార్గాలు. సింపుల్‌గా చెప్పాలంటే, మనం ఆస్తిని "ఎంత పెరుగుతుంది?" అని చూస్తే, వారు "ఇది నాకు ఎలా పనిచేస్తుంది?" అని చూస్తారు.

ధనవంతులు రియల్ ఎస్టేట్‌లో పెట్టుబడి పెట్టేటప్పుడు కేవలం ప్రాపర్టీ ధర పెరుగుదల (ROI) కోసం చూడరు. వారి దృష్టిలో అది లీవరేజ్, క్యాష్ ఫ్లో, హెడ్జింగ్, మరియు పూర్తి కంట్రోల్ ఇవ్వగల ఒక సాధనం. అంటే, "ధర తగ్గినప్పుడు కొందాం" అని ఆలోచించడం కంటే, వారు భవిష్యత్తులో ఆ ఆస్తి నుండి వచ్చే అవకాశాల పై దృష్టి పెడతారు. ముఖ్యంగా, వారు సప్లై కంట్రోల్ ఉన్న ప్రాపర్టీలను ఇష్టపడతారు, అంటే మూల ప్రదేశాలు (corner plots), వెడల్పైన ఫ్రాంటేజ్ ఉన్న ప్లాట్లు, లేదా TOD (రవాణా ఆధారిత అభివృద్ధి) జోనింగ్ ఉన్న భూములు. కపూర్ చెప్పినట్లుగా, "విలువ భూమిలో ఉండదు దానితో మీరు ఏం చేయగలరో దాంట్లో ఉంటుంది. భూమి విలువ కంటే, దానిని ఉపయోగించి వచ్చే అవకాశాలు ముఖ్యం.

మనం చాలా మంది ఇన్ఫ్రాస్ట్రక్చర్ పూర్తయ్యే వరకు లేదా మార్కెట్ హైప్ వచ్చే వరకు పెట్టుబడి పెట్టమని వెయిట్ చేస్తాం. కానీ తెలివైన పెట్టుబడిదారులు మాత్రం, కొత్త రోడ్లు, మెట్రో లైన్లు లేదా ఇతర ప్రాజెక్టులు ప్రకటించబడిన వెంటనే అడుగు వేస్తారు. ఉదాహరణకు, రోడ్డు లేదా మెట్రో లైన్ ప్రకటించబడినప్పుడు, CLU (Change of Land Use) ఫైల్ ఇంకా పెండింగ్‌లో ఉన్నప్పుడు, లేదా పాలసీ ఇంకా డ్రాఫ్ట్ దశలో ఉన్నప్పుడు, వారు ఆ అవకాశాలను ముందే క్యాచ్ చేస్తారు. అంటే, మార్కెట్ ట్రెండ్స్ మొదలయ్యే ముందు, భవిష్యత్తులో వచ్చే లాభాల కోసం ముందుగానే ఇన్వెస్ట్ చేయడం వాళ్ల స్ట్రాటజీ.

ఒక హై-రైజ్ భవనం ద్వారా ధనవంతులు ఒక్కో ఆస్తి నుండే పలు రకాల లాభాలు పొందగలరు. మొదట, రెంటల్ ఇన్కమ్ ద్వారా రెగ్యులర్ ఆదాయం వస్తుంది. అదనంగా, డిప్రీషియేషన్ కారణంగా ట్యాక్స్‌లో రాయితీలు వస్తాయి. ఆ తర్వాత, భవనం ద్వారా రీఫైనాన్సింగ్ చేసి మరొక ప్రాపర్టీ కొనుగోలు చేసే లీవరేజ్ కూడా ఉంటుంది. అలాగే, భవనం అమ్మకానికి లేదా స్ట్రాటా ఎగ్జిట్ ఆప్షన్ ద్వారా లాభం పొందవచ్చు. చివరగా, భూమి విలువ పెరగడం కూడా అదనపు సంపదను ఇస్తుంది. అంటే, ఒకే భవనం లేదా ప్రాపర్టీ ద్వారా ధనవంతులు పలు మార్గాల్లో సంపదను సృష్టించగలరు. వాళ్లు ముందు రిస్క్‌ ఏంత ఉంది అనే దానిపై దృష్టి పెడతారు. ఉదాహరణకు, ఎంట్రీ రిస్క్, లిక్విడిటీ ప్రెషర్, జోనింగ్ మార్పులు, ఆస్తి విలువకు వచ్చే సమయం (టైమ్ టు వాల్యూ), మరియు బిల్డర్ ఫైనాన్షియల్స్ వంటి అంశాలను పరిశీలిస్తారు. ఈ అన్ని విషయాలు సరిగ్గా సరిపోకపోతే, వారు ఇన్వెస్ట్ చేయకుండా వెనక్కి వెళ్లిపోతారు. అంటే ధనవంతులకి ధర కంటే, పెట్టుబడిలో ఉండే రిస్క్ ముఖ్యమని చెప్పవచ్చు.

కపూర్ చెప్పినట్టు, రియల్ ఎస్టేట్‌లో భూమి చాలా ముఖ్యమైంది. భూమి ఏకంగా ఆస్తిగా మాత్రమే కాదు, అది ఎప్పుడు, ఎవరు, ఏమి కడతారో నిర్ణయించే సాధనం. ధనవంతులు భూమిని ఉంచి వదులుకోవడం మాత్రమే కాదు, దానిని ఉపయోగించి కంట్రోల్ చేయడం, భవిష్యత్తులో లాభాలు సృష్టించడం కోసం వ్యూహాత్మకంగా ఉపయోగిస్తారు. సాధారణ కొనుగోలుదారులు ఆస్తిని "సొంతం చేసుకోవడానికి" కొంటారు. కానీ ధనవంతులు ఆస్తిని "ఆడించడానికి" పొజిషన్ చేస్తారు, అంటే భవిష్యత్తులో దానితో వచ్చే అవకాశాలను ముందుగానే క్యాచ్ చేస్తారు. వారి కోసం రియల్ ఎస్టేట్ కేవలం ఇల్లు కాదు, అది ఒక స్ట్రాటజీ.