బేర్‌మన్నారు.. వారికి ఒక్కో నిమిషానికి రూ.1,000 కోట్లు నష్టం

ముంబై: స్టాక్ మార్కెట్లు సోమవారం భారీ నష్టాల్లో ముగిశాయి. వరుసగా ఐదో రోజు సూచీలు పతనమయ్యాయి. ఈ కాలంలో సెన్సెక్స్ 2400 పాయింట్ల మేర నష్టపోయింది. ఎనర్జీ, రియల్టీ, ఐటీ, టెక్నాలజీ, క్యాపిటల్ గూడ్స్ సూచీలు దాదాపు మూడు శాతం మేర నష్టాలను నమోదు చేశాయి. సెన్సెక్స్‌లో డాక్టర్ రెడ్డీస్ ల్యాబ్స్ షేర్ వ్యాల్యూ అత్యధికంగా 4.77 శాతం పడిపోయింది. అయితే మెటల్, బేసిక్ మెటీరియల్ షేర్లు లాభాల్లో ముగిశాయి. అంతర్జాతీయ మార్కెట్లలో అమ్మకాలు వెల్లువెత్తడంతో ఆ ప్రభావం మన మార్కెట్లపై పడి మరింత నష్టపోయింది.

నిమిషానికి రూ.1000 కోట్లు ఆవిరి

నిన్న బేర్ దెబ్బతో మార్కెట్ పతనం కాగా, ఇన్వెస్టర్ల సంపద పెద్ద ఎత్తున హరించుకుపోయింది. బీఎస్ఈలో ఇన్వెస్టర్ల సంపదగా పరిగణించే లిస్టెడ్ కంపెనీల మొత్తం మార్కెట్ విలువ రూ.3.71 లక్షల కోట్లు తగ్గింది. దీంతో రూ.200.26 లక్షల కోట్లకు పరిమితమైంది. ట్రేడింగ్ సమయంలో, ఇన్వెస్టర్లు నిమిషానికి రూ.1000 కోట్లకు పైగా సంపదను పోగొట్టుకున్నారు.

రిలయన్స్ రూ.2000 దిగువకు పతనం

సెన్సెక్స్ 30 షేర్లలో 27 నష్టపోయాయి. డాక్టర్ రెడ్డీస్ అత్యధికంగా 4.77 శాతం నష్టపోయింది. మహీంద్రా అండ్ మహీంద్రా, టెక్ మహీంద్రా, ఇండస్ఇండ్ బ్యాంక్, యాక్సిస్ బ్యాంక్, టీసీఎస్, ఎల్ అండ్ టీ, రిలయన్స్ 4.51 శాతం వరకు పతనమయ్యాయి. చాన్నాళ్లకు ఇటీవలే రూ.2000 దాటిన రిలయన్స్ షేర్ నిన్న బేర్ దెబ్బతో మరోసారి రూ.2000 దిగువన ముగిసింది.

రోజంతా నష్టాల్లోనే

నిన్న సెన్సెక్స్ ఉదయం 50,910 పాయింట్ల వద్ద ప్రారంభమైంది. కాసేపటికి నష్టాల్లోకి జారుకుంది. ఏ దశలోను కోలుకోలేదు. లాభాల్లోకి వచ్చినట్లు ఒకటిరెండుసార్లు కనిపించినప్పటికీ అమ్మకాల ఒత్తిడితో ఎప్పటికప్పుడు పతనమైంది. అమ్మకాలు స్థిరంగా కొనసాగడంతో ఓ దశలో 49,617.37 పాయింట్ల వద్ద కనిష్ఠానికి పడిపోయిన సెన్సెక్స్, చివరకు 1145.44 పాయింట్ల నష్టంతో 49,744.32 వద్ద ముగిసింది.