ఆర్బీఐ రెపో రేటు పెంపుకు ముందు ఊగిసలాటలో మార్కెట్లు

రిజర్వ్ బ్యాంక్ ఆఫ్ ఇండియా(RBI) బుధవారం ద్రవ్య పరపతి విధాన సమావేశానికి సంబంధించిన నిర్ణయాలను వెల్లడించనుంది. ఈ సందర్భంగా రెపో రేటును పెంచే అవకాశాలు కనిపిస్తున్నాయి. ఆర్బీఐ విధాన ప్రకటనకు ముందు దేశీయ ఈక్విటీ మార్కెట్లు ఈ వారం పేలవంగా ప్రారంభమయ్యాయి. ఈక్విటీ మార్కెట్ కదలికలు సెంట్రల్ బ్యాంకు వడ్డీ రేటు మరోసారి పెంచుతుందనేందుకు సంకేతాలుగా భావిస్తున్నారు. ఈసారి కూడా 40 నుండి 50 బేసిస్ పాయింట్ల మేరకు పెరగవచ్చునని అంచనా.

ఐటీ, రియాల్టీ, మీడియా, కన్స్యూమర్ డ్యూరబుల్స్ కౌంటర్స్‌లో అమ్మకాల ఒత్తిడి, మెటల్ స్టాక్స్ కొంత కొనుగోళ్లను చూసినప్పటికీ హెడ్ లైన్ ఇండెక్స్‌ను దిగువకు లాగాయి. బుధవారం ఆర్బీఐ రెపో రేటును 40 నుండి 50 బేసిస్ పాయింట్లు పెంచుతుందనే ఊహాగానాలతో పాటు మే నెలలో అమెరికా ఉద్యోగాలకు ఊహించిన దాని కంటే ఎక్కువ జత కలిశాయి. దీంతో ఫెడ్ వడ్డీ రేటు దూకుడు పెరుగుతుందని భావిస్తున్నారు. మరోవైపు గ్లోబల్ క్రూడ్ ధరలలో భారీ పెరుగుదల మార్కెట్ పైన ప్రభావం చూపింది. క్రూడ్ ధరల పెరుగుదల కారణంగా అధిక ద్రవ్యోల్భణం ఉండవచ్చుననే ఆందోళనలు కనిపిస్తున్నాయి.

ఈ నేపథ్యంలో నేడు సూచీలు కాస్త క్షీణించాయి. సెన్సెక్స్ ఉదయం భారీ నష్టాల్లో కనిపించినప్పటికీ ఆ తర్వాత కోలుకొని, లాభాల్లోకి వచ్చాయి. చివరకు నష్టాల్లో ముగిశాయి. అయితే ఇది స్వల్పమే. సెన్సెక్స్ 94 పాయింట్లు క్షీణించి 55,675 పాయింట్లు, నిఫ్టీ 15 పాయింట్లు క్షీణించి 16,569 పాయింట్ల వద్ద ముగిసింది. ఈ రోజు 11 స్టాక్స్ అప్పర్ సర్క్యూట్‌ను తాకగా, 7 స్టాక్స్ లోయర్ సర్క్యూట్ వద్ద పరీక్షను ఎదుర్కొన్నాయి.