Pension hike: పెన్షనర్లకు గుడ్ న్యూస్! EPS-95 మినిమం పెన్షన్ భారీగా పెరగనుందా? కొత్త లెక్కలు ఇవే!

దేశవ్యాప్తంగా లక్షలాది మంది పెన్షనర్లు ఎప్పుడెప్పుడా అని ఎదురుచూస్తున్న పెన్షన్ పెంపు (Pension hike) అంశం మళ్ళీ తెరపైకి వచ్చింది. ఉద్యోగుల పెన్షన్ పథకం (EPS-95) కింద అందుతున్న కనీస పెన్షన్ మొత్తాన్ని రూ.1,000 నుంచి రూ.9,000 కు పెంచాలని కార్మిక సంఘాలు చాలా కాలంగా డిమాండ్ చేస్తున్నాయి. ఇటీవల పార్లమెంటులో కూడా ఈ విషయంపై చర్చ జరిగింది. అయితే ఒకేసారి రూ.9,000కు పెంచడం సాధ్యమేనా? ఒకవేళ వేతన పరిమితి పెరిగితే పెన్షన్ లెక్కలు ఎలా మారుతాయి? దీని వెనుక ఉన్న ఆసక్తికర విషయాలను ఇప్పుడు చూద్దాం.

పార్లమెంట్‌ లో ప్రభుత్వం ఏమందంటే..

లోక్‌సభలో ఎంపీలు అడిగిన ప్రశ్నకు సమాధానంగా కార్మిక, ఉపాధి శాఖ సహాయ మంత్రి శోభా కరంద్లాజే స్పందిస్తూ.. కనీస పెన్షన్‌ ను పెంచాలంటూ కార్మిక సంఘాల నుంచి విన్నపాలు అందాయని ధృవీకరించారు. ప్రస్తుతం దాదాపు 47 లక్షల మంది పెన్షనర్లు నెలకు రూ.9,000 కంటే తక్కువ పెన్షన్ పొందుతున్నారని ఆమె తెలిపారు. అయితే పెన్షన్ పెంపుపై ప్రభుత్వం ఇంకా ఎటువంటి గడువును ప్రకటించలేదు. నిధుల లభ్యత, పథకం యొక్క మనుగడను దృష్టిలో ఉంచుకుని నిర్ణయం తీసుకోవాల్సి ఉంటుందని స్పష్టం చేశారు.

సుప్రీంకోర్టు ఆదేశం - వేతన పరిమితిలో మార్పులు

2026 ఆరంభంలో సుప్రీంకోర్టు కేంద్ర ప్రభుత్వానికి కీలక ఆదేశాలు జారీ చేసింది. ప్రస్తుతం ఉన్న రూ.15,000 వేతన పరిమితిని (Wage Ceiling) సమీక్షించాలని, దీనిపై నాలుగు నెలల్లో నిర్ణయం తీసుకోవాలని సూచించింది. 2014 నుంచి ఈ పరిమితి మారలేదు. ఒకవేళ ఈ వేతన పరిమితిని రూ.25,000 లేదా రూ.30,000కు పెంచితే పెన్షన్ మొత్తంలో ఆటోమేటిక్‌ గా మార్పులు వస్తాయి.

పెన్షన్ లెక్క ఎలా ఉంటుంది?

EPS-95 నిబంధనల ప్రకారం పెన్షన్‌ ను ఈ క్రింది ఫార్ములా ద్వారా లెక్కిస్తారు..

• నెలవారీ పెన్షన్ = (పెన్షనబుల్ శాలరీ × పెన్షనబుల్ సర్వీస్) / 70

ఒకవేళ ప్రభుత్వం వేతన పరిమితిని రూ.25,000 కు పెంచితే, పెన్షన్ ఎలా ఉంటుందంటే..

1. కనీస పెన్షన్ (10 ఏళ్ల సర్వీస్)..

రూ.25,000 x 10 / 70 = రూ.3,570 (నెలకు)

2. గరిష్ట పెన్షన్ (35 ఏళ్ల సర్వీస్)..

రూ.25,000 x 35 / 70 = రూ.12,500 (నెలకు)

దీనిని బట్టి చూస్తే.. కార్మిక సంఘాలు డిమాండ్ చేస్తున్న రూ.9,000 కనీస పెన్షన్ అనేది తక్కువ సర్వీస్ ఉన్న వారికి ప్రస్తుత ఫార్ములా ప్రకారం కష్టమే అనిపిస్తోంది. కానీ, వేతన పరిమితి పెరగడం వల్ల కనీసం రూ.1,000 నుంచి రూ.3,570 వరకు పెన్షన్ పెరిగే అవకాశం మాత్రం స్పష్టంగా కనిపిస్తోంది.

ఏది ఏమైనా పెన్షన్ పెంపు (Pension hike) భారీగా ఉంటుందని ఆశించే కంటే.. వేతన పరిమితి పెంపు ద్వారా వచ్చే సహజమైన మార్పుల కోసం వేచి చూడడం బెటర్. సుప్రీం కోర్టు ఆదేశాలకు ప్రభుత్వం ఎలా స్పందిస్తుందనే దానిపైనే 47 లక్షల మంది పెన్షనర్ల భవిష్యత్తు ఆధారపడి ఉంది. చివరగా పెన్షన్ ఫండ్ స్థిరత్వం దెబ్బతినకుండా ప్రభుత్వం ఒక బ్యాలెన్స్‌డ్ నిర్ణయం తీసుకుంటుందని ఆశిద్దాం.